Արցախի նախկին պետնախարար Ռուբէն Վարդանեանն իր ֆէյսբուքեան էջում գրում է.
«alikonline.ir» - Արցախի նախկին պետնախարար Ռուբէն Վարդանեանն իր ֆէյսբուքեան էջում գրում է.
«Ադրբեջանը հարիւր օր առաջ Արցախը Հայաստանին ու արտաքին աշխարհին կապող միջանցքը փակելով նպատակ ունէր մեկուսացնել մեզ` այստեղ ապրող հայերիս: Դա ճնշման գործիք էր մեզ խեղճացնելու, մեր կամքը կոտրելու ու Արցախից մեզ դուրս հանելու համար: Բայց Ադրբեջանը ոչ միայն չհասաւ իր նպատակին, այլեւ այդ քայլն ունեցաւ հակառակ արդիւնք: Դա սթափեցրեց մեզ բոլորիս, եկաւ յիշեցնելու, որ մենք, մեր բոլոր տարբերութիւններով հանդերձ, նոյն նպատակն ունենք՝ արժանապատիւ ու խաղաղ ապրել մեր հայրենիքում:
Այս 100-օրեայ շրջափակման ընթացքում կարող ենք արձանագրել հետեւեալը.
1. Դիմադրութիւն: Չնայած զրկանքներին ու ծանր ձմռանը՝ Արցախի ժողովրդի բացառիկ տոկունութիւնն ու անկոտրում կամքը ցոյց տւեց, որ իրենք պատրաստ են դիմադրել ճնշումներին ու շարունակել 35 տարի առաջ սկսւած պայքարը:
2. Համախմբում: Ճգնաժամը մեզ համար համախմբման իւրայատուկ ժամանակահատւած դարձաւ: Դեկտեմբերի 25-ի հանրահաւաքով ժողովուրդը ցոյց տւեց, որ պատրաստ է համախմբման:
3. Արժանապատիւ դիմակայում։ Մեր տղաները մարտի 5-ին արժանի հակահարւած տւեցին ադրբեջանական ահաբեկչական գործողութիւններին՝ ցոյց տալով, որ եթէ պայքարում ես ոգով ու կամքով, քեզ յաղթել հնարաւոր չէ։ Այդ արժանապատւութեան օրինակով մենք պէտք է առջանորդւենք։
4. Միջազգային ուշադրութիւն: Մենք կարողացանք գրաւել միջազգային հանրութեան, տարբեր երկրների եւ միջազգային կառոյցների ուշադրութիւնը, լսելի դարձնել Արցախի ձայնը աշխարհում:
5. Կողք կողքի, բայց ոչ միասին: Ադրբեջանի այս գործողութիւնները ցոյց տւեցին, որ Արցախը չի կարող լինել Ադրբեջանի ենթակայութեան ներքոյ: Արցախի կարգավիճակը պէտք է որոշւի այստեղ ապրող մարդկանց կամարտայայտման իրաւունքի իրացման հիման վրայ:
6. Սփիւռքի արձագանգ: Արցախի ուժը Հայկական աշխարհին ստիպեց աւելի մեծ ուշադրութիւն դարձնել Արցախին եւ տարբեր հարթակներում բարձրացնել Արցախի հարցը:
7. Արցախի հարցն Ադրբեջանի ներքին խնդիրը չէ: Ադրբեջանին չյաջողւեց հասնել իր ծրագրերի իրականացմանը եւ ցոյց տալ, որ Արցախի հարցն իր ներքին խնդիրն է:
8. Միջազգային դատապարտում: Միջազգային մի շարք կառոյցներ դատապարտեցին Ադրբեջանի գործողութիւնները, Մարդու իրաւունքների եւրոպական դատարանն ու ՄԱԿ-ի արդարադատութեան դատարանը որոշում կայացրեցին՝ պահանջելով անյապաղ վերականգնել Հայաստանի հետ կապը:
9. Ինւետարիզացիա: Ճգնաժամը թոյլ տւեց գնահատել մեր թոյլ կողմերը եւ հասկանալ, թէ ինչ է պէտք է անել՝ դրանք ուժեղացնելու համար:
10. Բացթողումներ: Ի յայտ եկաւ նաեւ «հարց լուծողներ» եւ «իրավիճակից օգտւողների» մի զանգւած, որոնք այդպէս էլ չգնահատեցին եւ չհասկացան իրավիճակի ողջ լրջութիւնը:
11. Խուսափում կոլապսից: Ծանր ձմռան, էներգետիկ ճգնաժամի, միւս բոլոր ոլորտներում առաջացած դժւարութիւնները հնարաւոր եղաւ յաղթահարել առանց կոլապսի:
100 օր առաջ սկսւած ու շարունակւող շրջափակումը մեզ կրկին յիշեցնում է՝ Արցախի համար պայքարելու ենք միշտ, քանի կանք ու ապրում ենք: Մեր ճանապարհը հեշտ չէ, բայց դա նաեւ մեզ սովորեցրել է լինել աներեւակայելի յամառ: Սա հերթական անգամ ցոյց տւեց նաեւ, որ արցախեան հարցը ոչ միայն Արցախում ապրող հայերի, այլ ողջ հայութեան հարցն է: Ես աւելի քան վստահ եմ, որ եթէ մենք գործենք Արցախ, Հայաստան, Սփիւռք միասնութեան մէջ՝ յստակ նպատակով ու տեսլականով, մեզ յաղթել ոչ ոք չի կարողանայ»:
