Մարտի 25-ին Ադրբեջանի զինւած ուժերը, հերթական անգամ կոպտօրէն խախտելով 2020 թւականի նոյեմբերի 9-ի եռակողմ յայտարարութեամբ ստանձնած պարտաւորութիւնները, հատել են ԱՀ զինւած ուժերի հետ շփման գիծը եւ որոշակի դիրքային առաջխաղացում ապահովել Արցախի Հանրապետութեան տարածքում՝ Ստեփանակերտ-Լիսագոր գրունտային ճանապարհի ուղղութեամբ: Այս կապակցութեամբ Արցախի արտաքին գործերի նախարարութիւնը յայտարարութիւն է տարածել, որում ասւած է․
«alikonline.ir» - Մարտի 25-ին Ադրբեջանի զինւած ուժերը, հերթական անգամ կոպտօրէն խախտելով 2020 թւականի նոյեմբերի 9-ի եռակողմ յայտարարութեամբ ստանձնած պարտաւորութիւնները, հատել են ԱՀ զինւած ուժերի հետ շփման գիծը եւ որոշակի դիրքային առաջխաղացում ապահովել Արցախի Հանրապետութեան տարածքում՝ Ստեփանակերտ-Լիսագոր գրունտային ճանապարհի ուղղութեամբ: Այս կապակցութեամբ Արցախի արտաքին գործերի նախարարութիւնը յայտարարութիւն է տարածել, որում ասւած է․
«Նման գործողութիւններով Ադրբեջանը ձգտում է էլ աւելի խստացնել Արցախի շրջափակումը` խզելով միակ կապը մայրաքաղաք Ստեփանակերտի եւ հանրապետութեան Շուշիի շրջանի մի շարք գիւղերի միջեւ։ Միաժամանակ, ադրբեջանական կողմը փորձում է իրականութեան հետ որեւէ առնչութիւն չունեցող եւ շինծու յայտարարութիւններով արդարացնել իր իսկ անօրինական գործողութիւններն ու սադրանքները։
Արցախի շուրջ օղակը սեղմելու Ադրբեջանի գործողութիւնները ցինիկ պատասխան են Արցախը Հայաստանի հետ կապող Լաչինի միջանցքի անյապաղ ապաշրջափակման վերաբերեալ Արդարադատութեան միջազգային դատարանի որոշմանը, եւ մարտահրաւէր՝ միջազգային իրաւակարգին։
Ակնկալում ենք, որ ՌԴ խաղաղապահ զօրակազմը գործնական քայլեր կը ձեռնարկի՝ վերացնելու Ադրբեջանի կողմից 2020 թ. նոյեմբերի 9-ի եռակողմ յայտարարութեան դրոյթների հերթական խախտման հետեւանքները, ինչպէս նաեւ կանխարգելելու նոր հնարաւոր խախտումները:
Նման պայմաններում հրամայական է միջազգային հանրութեան կողմից միասնական կոշտ դիրքորոշման որդեգրումը՝ ստիպելու Ադրբեջանին վերադառնալ իրաւական դաշտ եւ կատարել իր միջազգային պարտաւորութիւնները։ Միջազգային հանրութիւնը եւ, մասնաւորապէս, ՄԱԿ-ի Անվտանգութեան խորհուրդը պէտք է կոնկրետ հաւաքական քայլեր ձեռնարկի՝ ուղղւած Լաչինի միջանցքի անյապաղ բացմանն ու Ադրբեջանի ցեղասպան քաղաքականութեան զսպմանը»։
