Print this page
03/11/2019 - 11:00

Բոզոյեան. «ՌԴ-ն միանշանակ կը շահի մեր հանդէպ դիւերսիֆիկացւած քաղաքականութիւնից»

Քաղաքագէտ Երւանդ Բոզոյեանն անդրադարձել է հայ-ռուսական յարաբերութիւնների ներկայ փուլին եւ այն հարցերին, որոնք առաջնահերթ լուծման կարիք ունեն:

«alikonline.ir» - Քաղաքագէտ Երւանդ Բոզոյեանն անդրադարձել է հայ-ռուսական յարաբերութիւնների ներկայ փուլին եւ այն հարցերին, որոնք առաջնահերթ լուծման կարիք ունեն:

Հայ-ռուսական փոխգործակցութիւնը չի կարող չզարգանալ, որովհետեւ երկու երկրների յարաբերութիւնները ռազմավարական բնոյթ ունեն, եւ դրանց ենթատեքստում, բնականաբար, կան մի շարք խնդիրներ, որոնք պէտք է հետաքրքրեն կողմերից իւրաքանչիւրին: Sputnik Արմենիայի հետ զրոյցում այս մասին ասաց քաղաքագէտ Երւանդ Բոզոյեանը` նկատի ունենալով սպառազինութիւնների խնդիրը, գազի գնի հարցը:

Բոզոյեանի խօսքով` համապատասխան քայլերի շրջանակում այդ խնդիրները պէտք է քննարկւեն եւ համալիր լուծումներ ստանան:

«Այդուհանդերձ, հայ-ռուսական յարաբերութիւններում որոշ հարցեր ճշգրտման կարիք ունեն: Շատ կարեւոր է, որ մենք կարողանանք լուծել մեր սպառազինութեան հետ կապւած խնդիրը, որպէսզի վերականգնենք հաւասարակշռութիւնը հարեւան Ադրբեջանի հետ: Ի տարբերութիւն մեզ՝ Ադրբեջանն ունի նաւթադոլարներ, հետեւաբար պէտք է կարողանանք կոմպենսացնել այդ հանգամանքը»,- նշում է քաղաքագէտը:

Բոզոյեանի համար հասկանալի է, որ ՌԴ-ն ուզում է իր ազդեցութիւնը պահպանել նաեւ Ադրբեջանի վրայ, նոյնիսկ ընկալելի է զէնքի վաճառքի գործարքը, սակայն միւս կողմից մենք պէտք է ամէն ինչ անենք, որպէսզի վերականգնենք ռազմական հաւասարակշռութիւնը Ադրբեջանի նկատմամբ: Կարեւոր է նաեւ, որ հայկական կողմը ՌԴ-ից սպառազինութիւններ գնի մատչելի գնով: Հաւասարակշռութիւնը բխում է նաեւ Ռուսաստանի շահերից, որովհետեւ դրա խախտումը կարող է բերել անկանխատեսելի հետեւանքների, անգամ պատերազմի:

«Երկրորդ կարեւոր գործօնն առնչւում է գազի գնին, որն անչափ յուզում է մեր ազգաբնակչութեանը եւ ընդհանրապէս կենսական նշանակութիւն ունի Հայաստանի տնտեսութեան բնականոն կենսագործունէութեան համար»,- նշում է նա։

Քաղաքագէտը մատնանշում է այն հանգամանքը, որ երկու երկրների քաղաքական վերնախաւերի միջեւ ՀՀ-ում տեղի ունեցած վերջին փոփոխութիւններից յետոյ որոշ հարցերում առաջացել է իրողութիւններն աւելի խորքային ընկալելու անհրաժեշտութիւն: Ըստ այդմ՝ Ռուսաստանը պէտք է վերանայի ՀՀ-ի հանդէպ իրականացւող «մէկ պատուհանի» քաղաքականութիւնը եւ սկսի աշխատել հասարակութեան աւելի լայն շերտերի հետ:

Բոզոյեանի համոզմամբ՝ ՌԴ-ն միանշանակ կը շահի մեր հանդէպ դիւերսիֆիկացւած քաղաքականութիւնից:

Յարակից լուրեր