Հա

Քաղաքական

18/05/2020 - 08:40

Նեթանեահուն Քնեսեթին է ներկայացրել Իսրայէլի նոր կառավարութեանը

Մայիսի 17-ին Բենիամին Նեթանեահուն Քնեսեթին է ներկայացրել Իսրայէլի նոր կառավարութեան կազմը:

«alikonline.ir» - Մայիսի 17-ին Բենիամին Նեթանեահուն Քնեսեթին է ներկայացրել Իսրայէլի նոր կառավարութեան կազմը. հաղորդում է BBC-ն:

Իսրայէլի թւով 35-րդ կառավարութիւնը ձեւաւորւել է Բենիամին Նեթանեահուի եւ ընդդիմութեան առաջնորդ Բենի Հանցի համաձայնութեան արդիւնքում, որը հնարաւոր է դարձրել «Լիկուդ» կուսակցութեան եւ «Կախոլ Լաւան» (Սպիտակ եւ կապոյտ) դաշինքի մասնակցութեամբ կոալիցիոն կառավարութեան ձեւաւորումը:

Կողմերի միջեւ ստորագրւած համաձայնագրի համաձայն՝ Բենիամին Նեթանեահուն առաջիկայ 18 ամիսների ընթացքում կը զբաղեցնի վարչապետի պաշտօնը, որից յետոյ նրան կը փոխարինի Բենի Հանցը, որը Նեթանեահուի վարչապետութեան շրջանում կը զբաղեցնի պաշտպանութեան նախարարի պաշտօնը:

Յիշեցնենք, որ Իսրայէլն անցած մէկ տարւայ ընթացքում յայտնւել էր իր պատմութեան ընթացքում նախադէպը չունեցող քաղաքական փակուղային վիճակում՝ անցկացնելով երեք անընդմէջ խորհրդարանական ընտրութիւններ, որոնց արդիւնքում որեւէ կուսակցութեան կամ դաշինքի չէր յաջողւել կառավարութիւն ձեւաւորել:

Ներկայացնելով նոր կառավարութեանը խորհրդարանին, Նեթանեահուն յայտարարել է, որ նոր կառավարութիւնը պէտք է տարածի Իսրայէլի ինքնիշխանութիւնն Արեւմտեան ափի հրէական բնակավայրերի վրայ. «Ճիշտ է՝ Յորդանան գետի Արեւմտեան ափին եւ Յորդանանի հարթավայրում է հրեայ ժողովուրդը ստեղծւել եւ զարգացել։ Ժամանակն է տարածել Իսրայէլի ինքնիշխանութիւնն ու կը բացենք եւս մէկ հիանալի հատոր սիոնիզմի պատմութեան մէջ»,- պնդել է նա։

Պաղեստինեան առաջնորդները եւ իսրայէլական արաբական կուսակցութիւնները խստօրէն քննադատել են Հանցի եւ Նեթանեահուի համաձայնագրի այն կէտը, որում նշւած է, որ Իսրայէլի նոր կառավարութիւնը յուլիսի 1-ից կարող է սկսել քննարկումները՝ Հրէական բնակավայրերի եւ Արեւմտեան ափի որոշակի շրջանների անեքսիանացման վերաբերեալ:

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։