Հա

Քաղաքական

19/09/2020 - 13:30

Անդրադարձ. Պայմանաժամի երկարաձգման քաղաքականութեան պատճառն ու պարունակած վտանգները

Պէյրութի մէջ մեծ աւեր գործած 4 օգոստոսի պայթումէն ետք, Ֆրանսայի նախագահ Էմանուէլ Մաքրոն երկու առիթներով այցելեց Լիբանան եւ հանդիպումներ ունեցաւ լիբանանեան քաղաքական ուժերուն հետ:

ՎԱՀՐԱՄ ԷՄՄԻԵԱՆ

 

Պէյրութի մէջ մեծ աւեր գործած 4 օգոստոսի պայթումէն ետք, Ֆրանսայի նախագահ Էմանուէլ Մաքրոն երկու առիթներով այցելեց Լիբանան եւ հանդիպումներ ունեցաւ լիբանանեան քաղաքական ուժերուն հետ:

Մաքրոն Լիբանան իր այցելութեան ընթացքին նշեց. «Եթէ Ֆրանսան իր դերակատարութիւնը չկատարէ, լիբանանեան ներքին հարցերուն պիտի միջամտեն իրանցիները, թուրքերն ու սէուտցիները, որոնց տնտեսական ու աշխարհաքաղաքական շահերը հաւանաբար ի վնաս լիբանանցիներուն ըլլան»: Այն տպաւորութիւնը ստեղծելով, թէ ի տարբերութիւն նշեալներուն` ֆրանսական միջամտութիւնը պարզապէս Լիբանանի եւ լիբանանցի ժողովուրդին նկատմամբ սիրոյ արտայայտութիւն է, այլասիրական ու ոչ շահադիտական է եւ զուտ բարեգործական նպատակներու համար: Իրողութեան մէջ անիկա կապ ունի Ֆրանսա-Թուրքիա պարանաձգութեան հետ:

Իրադարձութիւնները` Ֆրանսայի արտաքին գործոց նախարար Ժան-Իվ Լը Տրիանի, նախագահ Էմանուէլ Մաքրոնի եւ պաշտպանութեան նախարար Ֆլորանս Փարլիի Լիբանան իրերայաջորդ այցելութիւնները, պաշտօնական հանդիպումները, Մաքրոնի այցելութեան առիթով քաղաքական ուժերու ներկայացուցիչներու ֆրանսական դեսպանատան մէջ համախմբումն ու նոր կառավարութեան կազմութեան եւ քաղաքական նոր ուխտի մը ձեւաւորման հարցերով ֆրանսական նախաձեռնութիւնները ցոյց կու տան, թէ լիբանանեան կացութեան կարգաւորումը իր նախագահական ընտրութեան օրակարգով զբաղած ամերիկեան կողմի օրհնութեամբ վստահուած է Լիբանանի «Գթասիրտ մօր»:

Լիբանանի մէջ Ֆրանսայի «առաքելութիւնը» մէկ ակներեւ երեւոյթն է արեւելեան Միջերկրականի շրջանին մէջ ֆրանսական աշխուժացման, որուն դրդապատճառը թրքական վտանգն է: Պատահական չէր, որ երբ Թուրքիան 4 օգոստոսի պայթումէն անմիջապէս ետք առաջարկեց վերանորոգել Պէյրութի նաւահանգիստը, Մաքրոն շտապեց Լիբանան այցելելով փակել Անգարայի ճամբան եւ այդպիսով շուքի մատնեց իր այցելութենէն երկու օր ետք` 8 օգոստոսին Թուրքիոյ փոխնախագահ Ֆուաթ Օքթայի եւ արտաքին գործոց նախարար Մեւլութ Չաւուշօղլուի Լիբանան այցելութիւնը: 14 օգոստոսին ֆրանսական ծովուժի ուղղաթիռակիր «Թոներ» մարտանաւի` Պէյրութի նաւահանգիստ հասնիլը այդ ուղղութեամբ ֆրանսական յստակ պատգամ մըն էր Անգարային, սակայն ոչ միայն անոր: Մարտանաւին ժամանումով շեփորուող ֆրանսական պատգամը աւելի քան յստակ էր. «Բոլորդ ե՛տ կանգնեցէք, Ֆրանսան է լիբանանեան թղթածրարին տէրը»: Բայց եւ այնպէս, խաղը տակաւին չէ աւարտած…

Մաքրոն «Ֆրանսական նախաձեռնութեան» ծիրին մէջ լիբանանեան քաղաքական ուժերուն 15 օրուան պայմանաժամ ճշդած էր կառավարութիւն կազմելու: Այդ պայմանաժամը, սակայն, չորեքշաբթի, 16 սեպտեմբերին աւարտեցաւ եւ երկարաձգուեցաւ 24 ժամով, ապա երրորդ անգամ ըլլալով երկարաձգուեցաւ, այս անգամ մինչեւ կիրակի, 20 սեպտեմբեր: Երկարաձգումներ, որոնք կը վտանգեն Ֆրանսայի եւ անոր նախագահին վարկը: Իրողութիւն մը, որ առաւել քան յստակ կերպով ցոյց կու տայ, թէ ֆրանսական կողմը մեծ գրաւ դրած է իր նախաձեռնութեան յաջողութեան վրայ եւ ամէն ջանք ու ճիգ կը թափէ եւ ռիսքի կը դիմէ փրկելու համար զայն` քաջ գիտնալով, որ ատոր ձախողութեան գինը շատ սուղ է: Ահա թէ ինչու, հակառակ այն իրողութեան, որ լիբանանեան թղթածրարը յանձնուած է Ֆրանսայի արտաքին հետախուզութեան ղեկավար, Լիբանանի մէջ Ֆրանսայի նախկին դեսպան Պեռնար Էմիէի, Մաքրոն ուղղակիօրէն ձեռնամուխ կը դառնայ «Ֆրանսական նախաձեռնութեան» առաջին կէտին` կառավարութեան կազմութեան իրագործման առջեւ ծառացած խնդիրներու լուծման ջանքերուն: Պէտք է նշել, սակայն, որ երկարաձգումի քաղաքականութիւնը առաւել եւս կը բարձրացնէ ձախողութեան սուղ գինը, որմէ ֆրանսական կողմը իրաւամբ կը զարհուրի:

Արդէն իսկ շրջանառութեան մէջ դրուած է տեղեկութիւն` կառավարութեան կազմութեան պայմանաժամի մինչեւ յառաջիկայ չորեքշաբթի օր երկարաձգման մասին: Սակայն յստակ է, թէ այս երկարաձգման քաղաքականութիւնը չի կրնար անվերջ շարունակուիլ. Փարիզ կրնայ ի վերջոյ ստիպուիլ «անձեռոցը նետելու», ինչ որ մեծ աւետիս մը պիտի ըլլայ անոր անմիջական հակառակորդին` Թուրքիոյ համար, որ ախորժակը սրած կը սպասէ, բնականաբար նաեւ հաւանաբար գաղտագողի կ՛աշխատի «Ֆրանսական նախաձեռնութիւն»-ը ձախողցնելու եւ ատոր տեղ  առաջարկելու թրքականը կամ իր շահերուն նպաստաւոր մէկ այլ առաջարկի մը աջակցելու համար:

 

«Ազդակ»

Յարակից լուրեր

  • Ամերիկեան դիւանագիտութեան վերաշխուժացումն ու Արցախի հարցին մէջ դերակատարութեան վերականգնումը
    Ամերիկեան դիւանագիտութեան վերաշխուժացումն ու Արցախի հարցին մէջ դերակատարութեան վերականգնումը

    27 սեպտեմբեր 2020-ին շղթայազերծուած թուրք-ատրպեճանական յարձակումն ու ատոր ուղղակի հետեւանքը եղող Հայաստանի վարչապետին, Ռուսիոյ ու Ատրպէյճանի նախագահներուն` 9 նոյեմբերին ստորագրած եռակողմ յայտարարութիւնը ծանր հարուած էին ԵԱՀԿ Մինսքի խմբակի ձեւաչափին ու անոր հեղինակութեան։ Իրողութիւն մը, որ կարելի դարձաւ Մինսքի խմբակի եռանախագահութեան անդամներէն Միացեալ Նահանգներու` իրենց ներքին լուրջ խնդիրներով՝ նախագահական ընտրութեան ու ներքաղաքական լարուած մթնոլորտով զբաղած ըլլալնուն հետեւանքով ստեղծուած բացին պատճառով։

  • Նկատումներ Մինսքի խմբակի աշխատանքի վերականգնման մասին
    Նկատումներ Մինսքի խմբակի աշխատանքի վերականգնման մասին

    Միացեալ Նահանգներու Քոնկրեսի հարիւր անդամներ Միացեալ Նահանգներու արտաքին գործոց եւ պաշտպանութեան նախարարներուն իրենց ուղղած նամակին մէջ ամերիկեան վարչակազմին կոչ ուղղեցին` վերստին մասնակցելու Արցախի ինքորոշման իրաւունքի վրայ հիմնուած, Արցախի անվտանգութիւնը պաշտպանող եւ մէկ այլ պատերազմի չծագիլը երաշխաւորող շրջանային կայուն լուծման որոնումներուն, ճանչնալու Արցախի ժողովուրդի ինքնորոշման իրաւունքը եւ այդ ժողովուրդին դերը` իբրեւ այդ հակամարտութեան լուծման օրինական բանակցային կողմ, ինչպէս նաեւ` առանցքային դեր ունենալու հայ գերիներու անյապաղ ազատ արձակումը ապահովելու գործին մէջ:

  • Քաղաքական Քայլ Եւ Ոչ Թէ Զիջում
    Քաղաքական Քայլ Եւ Ոչ Թէ Զիջում

    Ռուսիոյ եւ Թուրքիոյ պաշտպանութեան նախարարները 11 նոյեմբեր 2020 թուականին ստորագրեցին Արցախի մէջ զինադադարի հսկողութեան ռուս¬թրքական միացեալ կեդրոնի հաստատման վերաբերեալ յուշագիր մը: Կեդրոնը սկսաւ գործել 30 յունուար 2021-ին: Կեդրոնի բացման մասնակցեցան` Ազրպէյճանի պաշտպանութեան նախարար Զաքիր Հասանովը, Ռուսիոյ պաշտպանութեան փոխնախարար Ալեքսանտր Ֆոմինը եւ Թուրքիոյ պաշտպանութեան փոխնախարար Եունուս Էմրէ Քարաօսմանօղլուն:

  • Մակրոնն անւանել է ՆԱՏՕ-ն «կազմակերպութիւն, որն այլեւս չկայ»
    Մակրոնն անւանել է ՆԱՏՕ-ն «կազմակերպութիւն, որն այլեւս չկայ»

    Ֆրանսիայի նախագահ Էմանուէլ Մակրոնը քննադատել է ՆԱՏՕ-ի հետ պայքարը, քանի որ այդ կազմակերպութիւնն այլեւս արդի չէ:

  • Մակրոնը կոչ է արել երկխօսել Ռուսաստանի հետ
    Մակրոնը կոչ է արել երկխօսել Ռուսաստանի հետ

    Ֆրանսիայի նախագահ Էմանուէլ Մակրոնը եւս մէկ անգամ մատնանշել է Եւրոպայում անվտանգութեան ճարտարապետութիւն կառուցելու համար Ռուսաստանի հետ երկխօսութիւն վարելու անհրաժեշտութիւնը: Այս մասին ըստ Tert.am-ի՝ գրում է «ՌԻԱ Նովոստի» գործակալութիւնը:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։