Հա

Քաղաքական

27/01/2021 - 12:15

Ուշացածը, փոխան ճիշդ պահու բանաձեւին

Եւրոպական խորհրդարանը 20 յունուարին որդեգրեց «Ընդհանուր արտաքին եւ անվտանգային քաղաքականութիւն» եւ «Ընդհանուր անվտանգային ու պաշտպանական քաղաքականութիւն» տարեկան զեկուցում-բանաձեւերը, որոնցմէ առաջինին մէջ առանձին կէտով անդրադարձ կը կատարուի Լեռնային Ղարաբաղի խնդիրին:

ՎԱՀՐԱՄ ԷՄՄԻԵԱՆ

 

Եւրոպական խորհրդարանը 20 յունուարին որդեգրեց «Ընդհանուր արտաքին եւ անվտանգային քաղաքականութիւն» եւ «Ընդհանուր անվտանգային ու պաշտպանական քաղաքականութիւն» տարեկան զեկուցում-բանաձեւերը, որոնցմէ առաջինին մէջ առանձին կէտով անդրադարձ կը կատարուի Լեռնային Ղարաբաղի խնդիրին:

Եւրոպական խորհրդարանը խիստ կերպով քննադատեց խաղաղ բնակչութեան եւ քաղաքացիական ենթակառոյցներու, սրբավայրերու թիրախաւորումը, տարանջատուող ռումբերու օգտագործումը եւ այդ առնչութեամբ կոչ ուղղեց Հայաստանին ու Ազրպէյճանին` վաւերացնելու տարանջատուող զինատեսակներու մասին հռչակագիրը:

Այսպիսով եւրոպացի երեսփոխանները, որոնք պարզ է, որ անտեղեակ չեն, թէ ո՛ր կողմը օգտագործած է տարանջատուող եւ ֆոսֆորային ռումբերը, եւ անոնցմէ ոմանք Եւրոպական խորհրդարանի 7 դեկտեմբերի նիստի ընթացքին դատապարտած էին այդ իրողութիւնը, կը յարգեն ու չեն շեղիր եւրոպական տարբեր կառոյցներու կողմէ նախայարձակն ու զոհը նոյն նժարի վրայ դնելու երկարամեայ գործելաոճէն. աւանդութիւն մը, որ տարիներու ընթացքին աւելի յանդուգն դարձուցին Պաքուն, քաջալերեցին անոր յարձակողապաշտութիւնը եւ ի վերջոյ յանգեցուցին 27 սեպտեմբերի յարձակումի շղթայազերծման: Ուստի եւրոպական տարբեր կառոյցները` Եւրոպական Միութիւնը, ԵԱՀԿ¬ն ու անոր Մինսքի խմբակը պատասխանատուութիւնը կը կրեն այդ յարձակումին ու անոր հետեւանքներուն:

Եւրոպական խորհրդարանի 7 դեկտեմբերի նիստին երեսփոխաններու ճնշող մեծամասնութիւնը յստակօրէն եւ խիստ կերպով քննադատեց Թուրքիոյ դերը տագնապի սրման մէջ, ինչպէս նաեւ` Ազրպէյճանին աջակցութիւն ցուցաբերելուն համար, որոշ երեսփոխաններ դատապարտեցին վերջինիս կողմէ արգիլուած զէնքերու կիրարկումը, սակայն այդ բոլորէն ետք խորհրդարանը չորդեգրեց բանաձեւ մը եւ բաւարարուեցաւ անհատական ելոյթներով ու Եւրոպական Միութեան արտաքին քաղաքականութեան բարձրագոյն յանձնակատար Ճոնզեփ Պորելին ուղղուած արագ գործողութիւններու ձեռնարկելու անհատական կոչերով, որոնք բաղդատմամբ խորհրդարանին կողմէ կոչին, շատ աւելի տկար քաղաքական կշիռ ու լրջութիւն ունենալնուն պատճառով գործնական որեւէ արդիւնքի չհասան:

Եւրոպական խորհրդարանը 7 դեկտեմբերին չորդեգրեց ճիշդ պահու բանաձեւը եւ աւելի քան մէկ ամիս ետք որդեգրեց անոր ուշացած տարբերակը` այդ ալ իբրեւ տարեկան զեկուցում-բանաձեւերու մէկ բաժին եւ ոչ թէ անջատ, Արցախի հարցով յատուկ բանաձեւ:

Նշեալ զեկուցում-բանաձեւերը որդեգրուեցան 27 սեպտեմբերին Արցախի հանրապետութեան դէմ վարձկան ահաբեկիչներու աջակցութեամբ շղթայազերծուած թուրք-ազրպէյճանական յարձակումի աւարտէն աւելի քան երկու ամիս ետք` ուշացում մը, որ կու գայ վկայելու անոնց արժէքի գերագնահատման ու կարեւորութեան գերարժեւորման անտեղիութեան մասին:

 

«Ազդակ»

Յարակից լուրեր

  • Ուշագրաւ շրջադարձ ու հաւանական երեք բեմագրութիւններ
    Ուշագրաւ շրջադարձ ու հաւանական երեք բեմագրութիւններ

    Սէուտական Արաբիոյ գահաժառանգ Մոհամետ պըն Սալման իշխանը 27 ապրիլին սէուտական պատկերասփիւռի կայանին յայտնեց. «Իրանի հետ լաւ յարաբերութիւններու կը ձգտինք», աւելցնելով, որ «Տարածաշրջանին մէջ մեր գործընկերներուն հետ աշխատանք կը տանինք Իրանի հետ տարակարծութիւնները յաղթահարելու»: Յայտարարութիւնը ուշագրաւ է, որովհետեւ ան չորս տարի առաջ այդ կարելիութիւնը բացառելով` յայտարարած էր. «Ծայրայեղական գաղափարաբանութեան վրայ հիմնուած վարչակարգի մը հետ ի՞նչպէս երկխօսութիւն կը կատարես»:

  • Նկատառումներ` արձանագրուած քաղաքական մեծ կէտի վերաբերեալ
    Նկատառումներ` արձանագրուած քաղաքական մեծ կէտի վերաբերեալ

    Միացեալ Նահանգներու նախագահ Ճօ Պայտըն Հայոց Ցեղասպանութիւնը ճանչնալով, իբրեւ Միացեալ Նահանգներու այդ քայլը կատարած առաջին նախագահ` ապահովեց պատմութեան մէջ իր պատուական տեղը:

  • Դիրքորոշման ծանուցում կամ հրապարակում
    Դիրքորոշման ծանուցում կամ հրապարակում

    9 նոյեմբեր 2020-ին Հայաստանի, Ազրպէյճանի եւ Ռուսիոյ ղեկավարներու հրապարակած եռակողմ յայտարարութեամբ ԵԱՀԿ-ի Մինսքի խմբակի համանախագահներու ձեւաչափին կողքին ստեղծուեցաւ նոր ձեւաչափ մը: Ռուսիոյ նախագահ Վլատիմիր Փութին յայտարարեց, որ ինք է այդ յայտարարութեան կէտերուն հեղինակը: Ռուսական կողմը, նոյն ատեն, չբացառեց համանախագահներուն դերակատարութեան շարունակութիւնը:

  • Աք Սարայի մէջ «Սոֆակէյթ». Կիներու իրաւունքի անտեսում
    Աք Սարայի մէջ «Սոֆակէյթ». Կիներու իրաւունքի անտեսում

    Պարզ անուշադրութեան հետեւանք կամ երկրորդական սխալ մը չէր եղածը՝ «Սոֆակէյթ»-ը (Ուաթըրկէյթէն ներշնչուած), որ պատահեցաւ Երեքշաբթի, Ապրիլ 6-ին, Թուրքիոյ նախագահական նստավայր Սպիտակ պալատին՝ Աք Սարային մէջ, Անգարա: Անոր պատճառով, արդարօրէն յուզում բարձրացաւ, ու դեռ շա՜տ փոթորիկներ կրնան ստեղծուիլ:

  • «Մի կողմից անհրաժեշտ է պաշտպանել Հայաստանը, բայց միւս կողմից չի կարելի վիճել Անկարայի հետ». ռուս փորձագէտները մեկնաբանել են Պուտին-Էրդողան վերջին հեռախօսազրոյցը
    «Մի կողմից անհրաժեշտ է պաշտպանել Հայաստանը, բայց միւս կողմից չի կարելի վիճել Անկարայի հետ». ռուս փորձագէտները մեկնաբանել են Պուտին-Էրդողան վերջին հեռախօսազրոյցը

    Ռուսաստանի եւ Թուրքիայի ղեկավարներ Վլադիմիր Պուտինը եւ Ռեջեփ Թայիփ Էրդողանն ապրիլի 9-ին հեռախօսային բանակցութիւններ են անցկացրել Լիբիայում, Սիրիայում, Դոնբասում եւ Լեռնային Ղարաբաղում տիրող իրավիճակի վերաբերեալ: 

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։