Հա

Քաղաքական

03/03/2021 - 10:45

«Ի՞նչ է նշանակում՝ սխալ զեկուցել, իսկ եթէ պատերազմի ժամանակ «սխալ զեկուցէին», սա մանկական թոթովանք է, անգամ սերժանտներն են ծիծաղում․ Ստ․ Տարասովը՝ «Իսկանդերի» վերաբերեալ միջադէպի մասին»․ «Հրապարակ»

Մանէ Գէորգեանի յայտարարութիւնից յետոյ, թէ Նիկոլ Փաշինեանին սխալ են զեկուցել «Իսկանդերի» հետ կապւած, հայ-ռուսական միջադէպը թերեւս կարելի է համարել սպառւած՝ Դմիտրի Պեսկովը յայտարարեց, որ Կրեմլին բաւարարում են Երեւանի յայտարարութիւնները: Ռուսական լրատւամիջոցները, սակայն, համակ ուշադրութեամբ հետեւում ու լուսաբանում են թէ՝ ընդդիմութեան հանրահաւաքները, թէ՝ Փաշինեանի կոնտր-հանրահաւաքը ու երկրում տեղի ունեցող իրադարձութիւնները: Հայաստանի ներքաղաքական իրավիճակի մասին «Հրապարակ»-ը զրուցել է ռուս քաղաքագէտ Ստանիսլաւ Տարասովի հետ:

«alikonline.ir» - «Մանէ Գէորգեանի յայտարարութիւնից յետոյ, թէ Նիկոլ Փաշինեանին սխալ են զեկուցել «Իսկանդերի» հետ կապւած, հայ-ռուսական միջադէպը թերեւս կարելի է համարել սպառւած՝ Դմիտրի Պեսկովը յայտարարեց, որ Կրեմլին բաւարարում են Երեւանի յայտարարութիւնները: Ռուսական լրատւամիջոցները, սակայն, համակ ուշադրութեամբ հետեւում ու լուսաբանում են թէ՝ ընդդիմութեան հանրահաւաքները, թէ՝ Փաշինեանի կոնտր-հանրահաւաքը ու երկրում տեղի ունեցող իրադարձութիւնները: Հայաստանի ներքաղաքական իրավիճակի մասին «Հրապարակ»-ը զրուցել է ռուս քաղաքագէտ Ստանիսլաւ Տարասովի հետ:

 

- Ձեզ հասկանալի՞ է, թէ ինչ է նշանակում «սխալ զեկուցել»:

- Դէ, դա յիմարութիւն է: Ի՞նչ է նշանակում՝ սխալ զեկուցել: Իսկ եթէ պատերազմի ժամանակ «սխալ զեկուցէին»: Սա մանկական թոթովանք է, սրա ի՞նչը մեկնաբանես: Նա պարզապէս փորձում է դուրս գալ ստեղծւած իրավիճակից: Նրան փորձում են հաշտեցնել զինւորականների հետ: Լաւ են անում: Բայց դէ, էդ «Իսկանդերի» պատմութիւնը... ոչ մի ձեւ: Անգամ սերժանտներն են ծիծաղում, էլ գեներալների մասին չեմ խօսում։

 

- Բայց, ըստ Կրեմլի, միջադէպը սպառւած է:

- Դէ, հա, փորձում են... երեւի ճիշտ են անում: Բայց ձերոնք շատ կոպիտ են գործում, անտաղանդ:

 

- Գուցէ պատահականութի՞ւն էին այս խօսքերը, լեզւի սայթաքում:

- Սա թատերականացւած ներկայացում էր: Յիշեցնենք, որ այն սկսւեց Սերժ Ազատովիչ Սարգսեանից, յետոյ նրա կարթն ընկաւ Փաշինեանը՝ իր անգրագէտ յայտարարութեամբ, քանի որ «Իսկանդերը» չի կարող 10 տոկոսով պայթել, ինչպէս չի կարող կինը ծննդաբերել 10 տոկոսով: Բայց քանի որ սա հնչում է Հայաստանի գերագոյն հրամանատարից...

 

- Իսկ հաշտեցնողներն ովքե՞ր են:

- Եթէ միայն Արմէն Սարգսեանին յաջողւի հաշտեցնել Գլխաւոր շտաբին ու Փաշինեանին, սա պլիւս կը լինի: Բայց, միեւնոյն է, հակամարտութիւնը շարունակւում է: Հանգուցալուծումը պէտք է լինի, եթէ ոչ հիմա, ապա չգիտեմ, աւելի ուշ ինչ-որ մէկը պէտք է հեռանայ:

 

- Ո՞վ, այնուամենայնիւ:

- Չեմ կարող ասել: Մենք այստեղ՝ Մոսկւայում, անհանգստութեամբ ենք հետեւում: Եթէ դուք՝ հայերդ, չէք կարողանում հասկանալ, ապա կարծում էք մենք այստեղ Լոմոնոսովնե՞ր ենք, ինչ է: Հասկանում էք՝ ամէն ինչ ողբերգական է, վտանգաւոր: Երկրի կառավարման համակարգը կտրուկ անկում է ապրում: Խօսքը հայկական պետականութեան լինել-չլինելու մասին է, ոչ թէ այն մասին, թէ ով կը լինի: Դուք շատ բան կորցրիք Արցախեան պատերազմում, հիմա կորցնում էք պետականութիւնը: Իսկ այստեղ ամբիցիաներ են. երկու հայ ընդհարւել են, փորձում են իրար ինչ-որ բան ապացուցել:

Կողմեր են յայտնւում: Այս ամենի հետեւում լուրջ գործընթացներ են: Շատ բան չի ասւում, շատ բան, որը մենք չգիտենք, կուլիսներում է: Նկատի ունեմ նախկին նախագահ Սարգսեանի կազմակերպած արտահոսքերը, յետոյ՝ Փաշինեանի հռետորաբանութիւնը: Բայց ես ասել եմ, որ պէտք է ուսումնասիրւէին պատերազմի հանգամանքները, պետական յանձնաժողովը չի աշխատում: Եւ առհասարակ՝ որ կողմին հաւատալ: Ձեր գործակալութիւնը, օրինակ, գրել էր, որ նախագահ Արմէն Սարգսեանն ապշահար դուրս է եկել Գլխաւոր շտաբից, որտեղ նրան պատմել են, թէ ինչեր է արել Փաշինեանը պատերազմի ժամանակ: Մենք չգիտենք՝ հաւատանք, թէ չէ: Չկան փաստական տւեալներ, փաստաթղթեր, որոնք թոյլ կը տային լուրջ եզրայանգումներ անել: Իսկ այն, ինչ տեսնում ենք, միայն ապակայունացում է, պետականութեան կորուստ, դեգրադացիա, որը երկար չի կարող շարունակւել, քանի որ կարող է Հայաստան պետութեան համար աւարտւել աղէտով: Իսկ թէ ով կը լինի Հայաստանի ղեկավար, մեզ համար արդէն սկզբունքային նշանակութիւն չունի:

 

- Ինչպէս թէ չունի... խելացի ղեկավարն ամէն ինչ կանի, որ Հայաստանը շտկի մէջքը:

- Իհարկէ, մենք էլ ենք մտածում, որ պէտք է սթափ դատող, ադեկւատ մարդ, որը իրավիճակին ադեկւատ գնահատական կը տայ, կունենայ ահաւոր ճգնաժամից երկիրը դուրս բերելու ծրագիր: Մենք դրան ենք սպասում, որ հայերը վերջապէս կը գտնեն նման մարդու: Մենք նրանց համարում էինք աշխարհի ամենախելացի ժողովուրդներից մէկը, կիրթ: Մի տեսէք, թէ մեզ մօտ՝ Ռուսաստանում, հայերն ինչպիսին են՝ բիզնեսներ, կարիերաներ, խելօք մարդիկ են, եւ հարց՝ ինչո՞ւ հայերը ռուսական միջավայրում կարողանում են կայանալ ու բարգաւաճել, գեղեցիկ ապրել, փող աշխատել, իսկ Հայաստանում իրար կոկորդ են կրծում:

 

- Փաշինեանի հանրահաւաքը Ձեզ տպաւորե՞ց:

- Հանրահաւաքները ձեր ներքին խնդիրն են: Ինչքան ուզում էք՝ արէք: Մենք նայում ենք՝ ամէն օր այսուայնկողմ են գնում: Ինչպէս մի երգչուհի ունէինք՝ Զիկինա, բեմի վրայ այս կողմ էր գնում, այն կողմ: Անգամ անեկդոտ կար. Երբ նա Բաքւում ելոյթ էր ունենում, դէ, մի կատարում, 10, 15, արդէն «բիս» են կանչում, նա էլ՝ գեղեցիկ կին, ասում է՝ դէ, ընկերներ, էլ չեմ կարող, յոգնել եմ: Նրանք էլ, թէ. «Իսկ դու երգիր, մի գնայ այս կողմ, այն կողմ»: Ու ձեզ մօտ էլ՝ այս կողմ, այն կողմ, մէկ վրան, մէկ խորոված, մէկ երաժշտութիւն են լսում:

 

- Թուրքիայի նախագահի ու արտգործնախարարի յայտարարութիւնների ֆոնին, որ կատարւածը յեղաշրջման փորձ է, որոշ շրջանակներ ակնարկում են, որ Թուրքիան կարող է կրկին միջամտել...

- Յիմարութիւն, ձեզ մօտ ռուսներն են կանգնած»,- գրում է թերթը: 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։