Թուրքիայի պաշտպանութեան նախարար, բանակի գեներալ Յուլուսի Աքարը CNN TÜRK-ի հետ զրոյցում յայտնել է, որ F-16 կործանիչների հարցով իրենք Անկարայում ԱՄՆ-ի ռազմական կցորդի միջոցով դիմել են Վաշինգտոնին։ Խօսել են ամերիկացի գործընկերների հետ, որից յետոյ ամերիկեան կողմը 2 անգամ պատւիրակութիւն է գործուղել Թուրքիա։
«alikonline.ir» - Թուրքիայի պաշտպանութեան նախարար, բանակի գեներալ Յուլուսի Աքարը CNN TÜRK-ի հետ զրոյցում յայտնել է, որ F-16 կործանիչների հարցով իրենք Անկարայում ԱՄՆ-ի ռազմական կցորդի միջոցով դիմել են Վաշինգտոնին։ Խօսել են ամերիկացի գործընկերների հետ, որից յետոյ ամերիկեան կողմը 2 անգամ պատւիրակութիւն է գործուղել Թուրքիա։ Տեղի են ունեցել մի շարք քննարկումներ պատւիրակութիւնների ձեւաչափով, որոնք, ըստ Յուլուսի Աքարի, անցել են բաւականին դրական եւ կառուցողական մթնոլորտում։ Գրում է Ermenihaber.am-ը։
«Այժմ գործընթացը Կոնգրեսի տիրոյթում է»,- պարզաբանել է նախարարը։
Քննարկումների արդիւնքները ամերիկեան կողմը կամփոփի եւ կը ներկայացնի Միացեալ Նահանգների Կոնգրեսին, քանի որ գործարքի իրականացման համար անհրաժեշտ է վերջինիս հաւանութիւնը։ Անկարան էլ ուշի ուշով հետեւելու է գործընթացի հետագայ հունին։
Բանն այն է, որ Թուրքիան ցանկանում է ԱՄՆ-ից գնել 40 միաւոր F-16 կործանիչների նորագոյն տարբերակից՝ Block 70-ից, եւ արդիականացնել իր օդուժը։
Թուրքական աղբիւրը շեշտում է, որ նախատեսւում է F-35-ի համար Թուրքիայի վճարած գումարը փոխանցել F-16-ի գնմանն ու արդիականացմանը, բայց հայկական եւ յունական լոբբին ճնշում են բանեցնում գործընթացի վրայ, որպէսզի ԱՄՆ Կոնգրեսը հաւանութիւն չտայ ու վաճառքը չկատարւի։
