Հռոմի Ֆրանցիսկոս պապն իր «Ես աղաչում եմ քեզ Տիրոջ անունով. տասը աղօթք ապագայի յոյսի համար» գրքում, որը կը թողարկւի հոկտեմբերի 18-ին, գրել է. «Պատերազմները երբեք խնդիրներ չեն լուծում»:
«alikonline.ir» - Հռոմի Ֆրանցիսկոս պապն իր «Ես աղաչում եմ քեզ Տիրոջ անունով. տասը աղօթք ապագայի յոյսի համար» գրքում, որը կը թողարկւի հոկտեմբերի 18-ին, գրել է. «Պատերազմները երբեք խնդիրներ չեն լուծում»: Գրքի հատւածները հրապարակել է La Stampa թերթը։ Գրում է News.am-ը:
Նրա խօսքով, նորագոյն պատմութիւնը նոյնիսկ ցոյց է տալիս «շահարկւած պատերազմների» օրինակներ, որոնց պարագայում կեղծ յաւակնութիւններ են ստեղծւել եւ ապացոյցներ են կեղծւել՝ այլ պետութիւնների վրայ յարձակումն արդարացնելու համար։
Նա կոչ է արել քաղաքական իշխանութիւններին՝ վերջ տալ շարունակւող պատերազմներին, չշահարկել տեղեկատւութիւնը եւ չխաբել իրենց ժողովուրդներին՝ փորձելով հասնել ռազմական նպատակների։
Պապի խօսքով՝ չկայ դէպք, երբ պատերազմը կարելի է արդարացնել:
Նա պատերազմն անւանել է անարդիւնաւէտ պատասխան, քանի որ այն երբեք չի լուծում առաջ քաշւած խնդիրները։
«Արդեօ՞ք Եմէնը, Լիբիան կամ Սիրիան, նշելով մի քանի ժամանակակից օրինակներ, աւելի լաւ են ապրում, քան մինչ հակամարտութիւնները»,- նշել է Պապը:
