Մեծ Բրիտանիայի նախկին վարչապետ Բորիս Ջոնսոնը պատրաստ է մասնակցել Պահպանողական կուսակցութեան ղեկավարի եւ, համապատասխանաբար, կառավարութեան յաջորդ ղեկավարի ընտրութիւններին, դրա համար նա ընդհատել է արձակուրդը:
«alikonline.ir» - Մեծ Բրիտանիայի նախկին վարչապետ Բորիս Ջոնսոնը պատրաստ է մասնակցել Պահպանողական կուսակցութեան ղեկավարի եւ, համապատասխանաբար, կառավարութեան յաջորդ ղեկավարի ընտրութիւններին, դրա համար նա ընդհատել է արձակուրդը:
Ինչպէս տեղեկացնում է «Արմէնպրես»-ը, այս մասին յայտնում է Sky News-ը՝ վկայակոչելով Ջոնսոնի գործընկերոջը։
«Պահպանողական» կուսակցութեան պատգամաւոր Ջէյմս Դադրիջը հեռուստաալիքին ասել է, որ Ջոնսոնը ծրագրում է մասնակցել Մեծ Բրիտանիայի ղեկավարի պաշտօնի համար պայքարին։
Նա յաւելել է, որ այժմ նախկին վարչապետը վերադառնում է արձակուրդից, որն անցկացնում էր Կարիբըան ծովում։
Ընտրութիւններին մասնակցելու համար Ջոնսոնին անհրաժեշտ է պահպանողական պատգամաւորների 100 ձայն ստանալ: Այս պահի դրութեամբ նրան հրապարակային աջակցել է 43 պատգամաւոր: Մեծ Բրիտանիային ֆինանսների նախկին նախարար Ռիշի Սունակին հրապարակային աջակցել է 74 պատգամաւոր, իսկ Համայնքների պալատի ղեկավար Փենի Մորդոնտը, որը միակն է, ով պաշտօնապէս յայտարարել է ընտրութիւններին մասնակցելու մասին, ստացել է 18 պատգամաւորի աջակցութիւն:
Բորիս Ջոնսոնը Մեծ Բրիտանիայի վարչապետի պաշտօնը զբաղեցրել է 2019-2022 թւականներին: 2022 թւականի սեպտեմբերի 6-ին Ջոնսոնը հրաժարական էր տւել, նրանց այդ պաշտօնում փոխարինել էր Լիզ Թրասը:
