Լաբորատորիայից արտահոսքը եղել է COVID-19 համավարակի ամենահաւանական աղբիւրը, որը քաոս է առաջացրել ամբողջ աշխարհում:
«alikonline.ir» - Լաբորատորիայից արտահոսքը եղել է COVID-19 համավարակի ամենահաւանական աղբիւրը, որը քաոս է առաջացրել ամբողջ աշխարհում, ըստ News.am-ի՝ գրում է Wall Street Journal-ը՝ վկայակոչելով ԱՄՆ էներգետիկայի նախարարութեան տւեալները:
Ըստ գաղտնի հետախուզական զեկոյցի, որը ներկայացւել է Սպիտակ տանը եւ Կոնգրեսի հիմնական անդամներին, մահացու վիրուսը, հաւանաբար, տարածւել է չինական լաբորատորիայում անսարքութեան պատճառով:
ԱՄՆ էներգետիկայի նախարարութիւնը նախկինում չի որոշել վիրուսի աղբիւրը։
Այս եզրակացութիւնը բացատրւում է հետախուզական նոր տւեալներով, սակայն գաղտնի զեկոյցին ծանօթ աղբիւրների համաձայն՝ նախարարութիւնն իր դատողութիւնն արել է «վստահութեան ցածր աստիճանով», գրում է ամերիկեան հրատարակութիւնը։
Զեկոյցում նաեւ ասւում է, որ միւս գերատեսչութիւնները կարծում են, թէ վիրուսի տարածումը, ամենայն հաւանականութեամբ, եղել է բնական փոխանցման հետեւանք, մինչդեռ միւսները դեռեւս չեն կողմնորոշւել:
Աւելի վաղ Առողջապահութեան համաշխարհային կազմակերպութիւնը դադարեցրել էր SARS-CoV-2 վիրուսի ծագման հետաքննութիւնը, որը կորոնավիրուսի համավարակ էր առաջացրել՝ պատճառաբանելով Չինաստանում քննադատական հետազօտութիւններ իրականացնելու փորձերի հետ կապւած խնդիրները: Այս մասին յայտնում է Nature միջազգային գիտական ամսագիրը։ Այս տեղեկութիւնն ամսագրին հաստատել է ԱՀԿ փորձագէտ Մարիա վան Կերկխովէն։
Նրա տեղեկատւութեամբ ԱՀԿ-ն նախատեսել է համապատասխան աշխատանք իրականացնել փուլ առ փուլ, սակայն այս ծրագիրը փոխւել է։ Փորձագէտի խօսքով՝ ամբողջ աշխարհում անցկացւող քաղաքականութիւնը խանգարում է SARS-CoV-2-ի ծագումը հասկանալու առաջընթացին։
