Հա

Քաղաքական

13/07/2020 - 08:40

«Ժողովուրդը դէմ է եռեակ ուժերի միջեւ լարւածութեանը». Իսլ. յեղափոխութեան առաջնորդ

Վէճերը անհանգստացնում են ժողովրդին: Մենք բոլորս պէտք է միակամ լինենք թշնամու դէմ: Այս մասին երէկ՝ յուլիսի 12-ին 11-րդ գումարման Իսլ. խորհրդարանի պատգամաւորների հետ տեսակապի միջոցով կազմակերպւած հանդիպման ընթացքում յայտարարել է Իսլ. յեղափոխութեան առաջնորդ, այաթ. Սէյէդ Ալի Խամենէին:

«alikonline.ir» - Վէճերը անհանգստացնում են ժողովրդին: Մենք բոլորս պէտք է միակամ լինենք թշնամու դէմ: Այս մասին երէկ՝ յուլիսի 12-ին 11-րդ գումարման Իսլ. խորհրդարանի պատգամաւորների հետ տեսակապի միջոցով կազմակերպւած հանդիպման ընթացքում յայտարարել է Իսլ. յեղափոխութեան առաջնորդ, այաթ. Սէյէդ Ալի Խամենէին. հաղորդում է ԻՌՆԱ-ն:

Նորընտիր խորհրդարանին բնութագրելով որպէս «ժողովրդի յոյսի եւ ակնկալիքների մարմնաւորումը», Իսլ. յեղափոխութեան առաջնորդն ասել է. «Վստահ ենք, որ առկայ բոլոր խնդիրները կարող են լուծւել, եւ խորհրդարանը պէտք է ունենայ շօշափելի ազդեցութիւն խնդրի լուծման գործընթացի վրայ` հաւաստանշելով առաջնահերթութիւնները, խուսափելով կողմնակի խնդիրներից, եւ անկեղծօրէն աշխատելով ժողովրդի համար»: 

Այաթ. Խամենէին խորհրդարանական ընտրութիւններին ընտրողների ընդունելի տոկոսի մասնակցութիւնը, չնայած տնտեսական ծանր պայմաններին եւ թշնամական ուժերի հիասթափեցնող քարոզչութեանը, ժողովրդի յոյսի եւ ակնկալիքների ապացոյցն է համարել, եւ պատգամաւորներին յորդորել է ճիշտ գնահատել այս կապիտալը: 

Նա 11-րդ գումարման խորհրդարանը համարել է յետյեղափոխութեան ժամանակաշրջանի ամենաուժեղ եւ յեղափոխական խորհրդարաններից մէկը՝ յաւելելով, որ «մոտիւացւած, հաւատացեալ, կրթւած եւ գործունեայ երիտասարդների» ներկայութիւնը, գործադիր ոլորտում աշխատանքի փորձ ունեցող մի խումբ պատասխանատուների, ինչպէս նաեւ՝ օրէնսդրական աշխատանքային փորձ ունեցող պատգամաւորների կողքին, նորընտիր խորհրդարանը վարածել է շատ լաւ եւ յուսադրող խորհրդարանի: 

Իսլ. յեղափոխութեան առաջնորդը բարձր է գնահատել յեղափոխութեան խնդիրների հետ կապւած նորընտիր խորհրդարանի զգօն վերաբերմունքը եւ արագ աշխատելաոճը՝ նշելով, որ առաջիկայ չորս տարիները լաւագոյն առիթն են երկրի առաջընթացի ուղին յստակեցնելու եւ առկայ խնդիրների կարգաւորման համար:

Այաթ. Խամենէին տնտեսական խնդիրները համարել է երկրի կարեւոր մարտահրաւէրը, որոնք հնարաւոր է կարգաւորել, հաշւի առնելով երկրում առկայ հսկայական ներուժը եւ մարդկային ռեսուրսները:

Նա պատգամաւորներին յորդորել է աշխատել ազնւօրէն՝ յանուն ժողովրդի, խուսափել լուսանցքային հարցերից, փորձել լուծել առկայ տնտեսական խնդիրները եւ ժողովրդի կենսապահովման բարելաւման հետ կապւած հարցերը: 

Իսլ. յեղափոխութեան առաջնորդը կարեւորել է երկրի եռեակ ուժերի միջեւ գործակցութիւնը՝ նշելով, որ Գործադիր եւ Դատական ուժերը պէտք է ամբողջովին կատարեն Օրէնսդիրի ընդունած օրէնքները, իսկ Օրէնսդիրն էլ օրէնքներ ընդունելիս պէտք է հաշւի առնի երկրում առկայ իրականութիւնը, ներուժը եւ հնարաւորութիւնները:

«Խորհրդարանի եւ Կառավարութեան յարաբերութիւնները պէտք է համապատասխանեն օրէնքին եւ շարիաթին: Այսինքն՝ հարց եւ հետաքննութիւնը, որպէս խորհրդարանի իրաւունքը պէտք է իրացւի, բայց Կառավարութեան անդամների նկատմամբ անյարգալից վերաբերմունքն ու վիրաւորանքն անընդունելի է»,- ասել է այաթ. Խամենէին՝ շեշտելով, որ անհրաժեշտ է խուսափել զգացական եւ անտրամաբանական մօտեցումներից, իսկ քննադատութիւնն էլ ներկայացնել մտածւած եւ տրամաբանւած: 

«Ժողովուրդը ակնկալում է, որ եռեակ ուժերը խուսափեն լարւածութիւնից, եւ զբաղւեն առկայ խնդիրների կարգաւորմամբ»,- ընդգծել է նա:

Նշելով, որ այս տարին Կառավարութեան գործունէութեան վերջին տարին է, Իսլ. յեղափոխութեան առաջնորդն ասել է, որ անհրաժեշտ է այնպէս աշխատել, որ չտուժի երկիրը:

«Ցանկացած Կառավարութեան գործունէութեան վերջին տարին, չափազանց զգայուն տարի է: Առ այդ, հաւատացած եմ, որ Կառավարութիւնը մինչ վերջին օրը պէտք է շարունակի կատարել օրէնքով սահմանւած իր պարտականութիւնները, եւ էստաֆետը փոխանցի յաջորդ Կառավարութեանը»,- յստակեցրել է նա: 

Այաթ. Խամենէին իր խորին ափսոսանքն է յայտնել կորոնավիուսի բռնկման նոր ալիքի կապակցութեամբ, եւ կոչ է արել բոլորին լիարժէքօրէն պահպանել առողջապահական ցուցումները, որպէսզի կարճ ժամանակում հնարաւոր լինի կասեցնել հիւանդութեան տարածումը:

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։