ԱԳ նախարար Մոհամմադ Ջաւադ Զարիֆն ու ՄԱԿ-ի գլխաւոր քարտուղար Անտոնիօ Գուտերեշը հեռախօսազրոյց են ունեցել, որի ընթացքում քննարկել են Եմէնի հակամարտութեան իրադարձութիւնները եւ կարեւորել են պատերազմի անյապաղ դադարեցումը:
«alikonline.ir» - ԱԳ նախարար Մոհամմադ Ջաւադ Զարիֆն ու ՄԱԿ-ի գլխաւոր քարտուղար Անտոնիօ Գուտերեշը հեռախօսազրոյց են ունեցել, որի ընթացքում քննարկել են Եմէնի հակամարտութեան իրադարձութիւնները եւ կարեւորել են պատերազմի անյապաղ դադարեցումը. հաղորդում է ԻՌՆԱ-ն:
Հեռախօսազրոյցի ընթացքում Գուտերեշը ներկայացնելով Եմէնում պատերազմը դադարեցնելուն, արդար խաղաղութիւն հաստատելուն եւ Եմէնում քաղաքական բանակցութիւններ սկսելուն ուղղւած ՄԱԿ-ի վերջին գործողութիւնները՝ Իրանին կոչ է արել շարունակել Եմէնում խաղաղութեան հաստատմանն ուղղւած իր կարեւոր ջանքերը:
Յայտարարելով Իրանի Իսլամական Հանրապետութեան աջակցութիւնը Եմէնում արդար խաղաղութիւն հաստատելուն ուղղւած ՄԱԿ-ի ջանքերին՝ Զարիֆը շեշտել է պատերազմը դադարեցնելու, շրջափակումը վերացնելու եւ Եմէնի ժողովրդին մարդասիրական օգնութիւն ցուցաբերելու անհրաժեշտութիւնը: Նա յոյս է յայտնել, որ միջեմէնական բանակցութիւնների եւ ներառական կառավարութեան ձեւաւորման արդիւնքում, Եմէնում խաղաղութեան եւ կայունութեան կայացման ականատեսը կը լինենք:
