Հա

Քաղաքական

17/09/2014 - 12:10

Միջին Արեւելքում դիմագրաւած մարտահրաւէրներն ու Ցեղասպանութեան հարիւրամեակը դարձան Արամ Ա կաթողիկոսի մամլոյ ասուլիսի գլխաւոր նիւթերը՝ Վաշինգտոնում

Երեքշաբթի, սեպտեմբերի 9-ին, Վաշինգտոնում, Միջին Արեւելքի քրիստոնէութեան նւիրւած միջազգային համագումարը շարունակում է իր աշխատանքները, մասնակցութեամբ շուրջ 500 հոգիների, որոնց շարքում բարձրաստիճան հոգեւորականներ, սենատորներ, պատգամաւորներ, Կոնգրեսի անդամներ եւ ոչ-կառավարական կազմակերպութիւններին պատկանող պատասխանատուներ: 

«Ազդակ» - Երեքշաբթի, սեպտեմբերի 9-ին, Վաշինգտոնում, Միջին Արեւելքի քրիստոնէութեան նւիրւած միջազգային համագումարը շարունակում է իր աշխատանքները, մասնակցութեամբ շուրջ 500 հոգիների, որոնց շարքում բարձրաստիճան հոգեւորականներ, սենատորներ, պատգամաւորներ, Կոնգրեսի անդամներ եւ ոչ-կառավարական կազմակերպութիւններին պատկանող պատասխանատուներ: Ամերիկեան ու միջազգային տեղեկատւական օրգանները յատուկ ուշադրութեամբ են հետեւում համագումարի աշխատանքներին:
Համագումարի առաջին օրը, պաշտօնական մամլոյ մի ասուլիս տեղի ունեցաւ Վաշինգտոնի Ազգային տեղեկատւական կենտրոնում, որին ներկայ էին բազմաթիւ լրատւական աղբիւրների ներկայացուցիչներ: Սոյն մամլոյ ասուլիսին ներկայ էին նաեւ՝ Մեծի Տանն Կիլիկիոյ Ն.Ս.Օ.Տ.Տ. Արամ Ա կաթողիկոսը եւ իր խօսքը ուղղեց, շեշտելով թէ Միջին Արեւելքից այստեղ չենք եկել Միացեալ Նահանգների աջակցութիւնը խնդրելու, այլ ամերիկացի ժողովրդին տեղեակ պահելու մեր մտահոգութիւնների շուրջ՝ շրջանում տեղի ունեցող զարգացումների ամբողջական ու յստակ պատկերը ներկայացնելով: Երկրորդ, մենք այստեղ չենք եկել, այս կամ այն խմբակցութեան դէմ պայքար կազմակերպելու, այլ միասնաբար մտածելու, թէ ինչպէս կարելի է ահաբեկչութեան դէմ պայքարել, այն արմատախիլ անելով մարդկային կեանքից: Ահաբեկչութիւնը տարբեր անուններով եւ կերպերով, տարբեր տեղեր ինքն իրեն է արտայայտում, այն մարդկային արժէքները արհամարհող ու նոյնիսկ մարդկային գոյութեանը սպառնացող մի չարիք է, որի դէմ պէտք է պայքարեն բոլոր կրօններն ու բոլոր ազգերը, եւ միասնաբար: Երրորդ, ճիշտ չէ ասել թէ քրիստոնեաները հալածւում են, այլ իրականութիւնը այն է, որ խղճի ազատութիւնն ու մարդկային հիմնական իրաւունքներն են, որ այսօր բռնաբարւում են Միջին Արեւելքում, եւ այս մտահոգութիւնը միայն քրիստոնեաներին յատուկ չէ, այլ համամարդկային մի մտահոգութիւն է, հետեւաբար՝ համաշխարհային հանրութիւնը համապատասխան վերաբերում պէտք է ճշտի: Չորրորդ, ինչ որ այսօր տեղի է ունենում Միջին Արեւելքում, քրիստոնեայ-իսլամ գոյակցութեան խնդիր չէ: Երկու կրօնները երկար դարեր գոյակցել են ու պէտք է շարունակեն գոյակցել: Մի խումբ մարդիկ այսօր փորձում են իսլամի ուսուցումները եւ արժէքները եղծել ու շահագործել՝ ի խնդիր իրենց քաղաքական նպատակների: Հետեւաբար՝ մեր սպասումն է, որ իսլամ քաղաքական ու կրօնական պատասխանատուներ հրապարակային կեցւածք ճշտեն այս մտահոգիչ կացութեան նկատմամբ:
Յիշեալ պաշտօնական ու հրապարակային մամլոյ ասուլիսից յետոյ՝ Վեհափառ Հայրապետը հարցազրոյցներ ունեցաւ «CNN»-ի, «Fox News»-ի, «Catholic News Services»-ի, «LBC»-ի, «Noursat»-ի եւ այլ ամերիկեան ու միջազգային մամլոյ ներկայացուցիչների հետ: Այս հարցազրոյցների ընթացքում Վեհափառ Հայրապետը անդրադարձաւ հետեւեալ կէտերին.
Ա- Քրիստոնէութիւնը պատկանում է Միջին Արեւելքին. այն կառչած կը մնայ իր արմատներին՝ հակառակ իր դիմագրաւած դժւարութիւններին:
Բ- Միաստւածեան երեք կրօնների միջեւ համագործակցութիւնը հրամայական է՝ նկատի ունենալով կրօնի առանցքային տեղը՝ հասարակութեան կեանքում:
Գ- Համաշխարհային հանրութիւնը լուռ մնաց Հայոց Ցեղասպանութեան ընթացքում, այսօր նա չպէտք է անցեալի սխալները կրկնի, անտարբեր մնալով մարդկութեան դէմ գործւած ոճիրների նկատմամբ:

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։