Իրանի արտգործնախարար դոկտ. Մոհամմադջաւադ Զարիֆը հեռախօսազրոյց ունենալով Եւրոմիութեան արտաքին քաղաքականութեան պատասխանատու Քաթրին Աշտոնի հետ՝ Իրանի պատրաստակամութիւնն է յայտնել յստակ ժամանակացոյցով նպատակային բանակցութիւններ վարելու համար:
«ԻՌՆԱ» - Իրանի արտգործնախարար դոկտ. Մոհամմադջաւադ Զարիֆը հեռախօսազրոյց ունենալով Եւրոմիութեան արտաքին քաղաքականութեան պատասխանատու Քաթրին Աշտոնի հետ՝ Իրանի պատրաստակամութիւնն է յայտնել յստակ ժամանակացոյցով նպատակային բանակցութիւններ վարելու համար:
Հեռախօսազրոյցի ընթացքում Քաթրին Աշտոնը շնորհաւորել է դոկտ. Մոհամմադջաւադ Զարիֆի նշանակումը:
Նա Զարիֆի հետ զրուցել է Իրանի ատոմական ծրագրի, տարածաշրջանի իրադարձութիւնների, ի մասնաւորի՝ Եգիպտոսի ծանր պայմանների, այդ երկրում ծայրայեղականութեան վտանգի, ճգնաժամից դուրս գալու եւ սպանութիւններին ու արիւնահեղութեանը վերջ տալու ելքերի շուրջ:
Զրոյցի ընթացքում դոկտ. Զարիֆը շեշտել է Իրանի ատոմական հարցի կարգաւորման համար վճռական եւ քաղաքական կամքի առկայութեան անհրաժեշտութիւնը: Քաթրին Աշտոնը յոյս է յայտնել, որ ինչքան շուտ՝ վերսկսւեն Իրանի եւ «5+1»-ի միջեւ բանակցութիւնները: Նա նաեւ յոյս է յայտնել, որ մօտ ապագայում ՄԱԿ-ի Ընդհանուր ժողովի շրջագծում հանդիպում կունենայ դոկտ. Զարիֆի հետ:
* «Ֆարս» լրատւական գործակալութեան հաղորդմամբ՝ շաբաթ երեկոյեան ՄԱԿ-ի գլխաւոր քարտուղար Բան Կի Մունի հետ հեռախօսազրոյցի ընթացքում Իրանի արտգործնախարար Մոհամմադջաւադ Զարիֆը, քննարկելով Եգիպտոսի ներկայ ճգնաժամի կարգաւորման հնարաւոր ելքերը, ասել է. «Եգիպտոսի անմեղ ժողովրդի կոտորածը դատապարտելի է եւ անյապաղ պէտք է վերջ դնել այդ երկրում սպանութիւններին ու արիւնահեղութեանը»:
Բան Կի Մունը խօսել է ճգնաժամի խաղաղ կարգաւորման եւ լարւածութիւնը մեղմելու համար այդ կազմակերպութեան կողմից տարւող ջանքերի մասին:
ՄԱԿ-ի գլխաւոր քարտուղարը շնորհաւորելով Մոհամմադջաւադ Զարիֆին՝ Իրանի արտգործնախարարի պաշտօնում նշանակւելու կապակցութեամբ, Իրանի նախագահ Հասան Ռոհանիին հրաւիրել է ներկայ գտնւել Նիւ Եօրքում ՄԱԿ-ի Ընդհանուր ժողովի տարեկան նիստին:
