Հա

Քաղաքական

07/09/2013 - 11:25

ՀԱՐՑԱԶՐՈՅՑ - «yerkir.am»-ի հարցազրոյցը՝ Վահան Յովհաննիսեանի հետ

Ինչպէս յաճախ է պատահում մեր իրականութեան մէջ, որեւէ լուր կամ նորութիւն որոշ լրատւամիջոցներ արհեստականօրէն վերածում են սկանդալային ինտրիգի՝ հաղորդելով դրան սենսացիոն բնոյթ: Անցած օրերին ես հետաքրքրութեամբ էի ծանօթանում տարատեսակ մեկնաբանութիւններին, որոնց մէջ սակաւաթիւ լուրջ արձագանգների կողքին՝ յաճախ յայտնւում էին մաղձոտ կամ պարզապէս անտրամաբանական մեկնաբանութիւններ: 

Վահան Յովհաննիսեան.

«Այո, ես ստացել եմ Հայաստանն արտասահմանում ներկայացնելու առաջարկ»

Հ.- Պարո՛ն Յովհաննիսեան, վերջին օրերին մամուլը ողողւած է Ձեր դեսպան նշանակւելու լուրերով: Նշւում է նոյնիսկ երկիրը՝ Գերմանիան:

Պ.- Ինչպէս յաճախ է պատահում մեր իրականութեան մէջ, որեւէ լուր կամ նորութիւն որոշ լրատւամիջոցներ արհեստականօրէն վերածում են սկանդալային ինտրիգի՝ հաղորդելով դրան սենսացիոն բնոյթ: Անցած օրերին ես հետաքրքրութեամբ էի ծանօթանում տարատեսակ մեկնաբանութիւններին, որոնց մէջ սակաւաթիւ լուրջ արձագանգների կողքին՝ յաճախ յայտնւում էին մաղձոտ կամ պարզապէս անտրամաբանական մեկնաբանութիւններ: Կարծում եմ՝ հիմա որոշ պարզաբանումներ տալու ժամանակն է: Ես դա կանեմ կէտ առ կէտ, եւ եթէ հարցեր մնան, պատրաստ եմ դրանց նոյնպէս պատասխանել:
1- Այո, ես ստացել եմ Հայաստանն արտասահմանում ներկայացնելու առաջարկ:
2- Առաջարկն ուղղւած է ինձ անձնապէս, ոչ թէ Հայ Յեղափոխական Դաշնակցութեանը: Սա կուսակցութեան հետ համագործակցելու կամ ինչ-որ նոր դաշինք կազմելու առաջարկ չէ: Կրկնում եմ՝ առաջարկն արւած է ինձ անձնապէս, եւ իմ կողմից եղել է ընդունելի: Բնականաբար, սակայն, հարցը ներկայացրել եմ կուսակցութեանը, եւ կուսակցութիւնը եւս տւել է իր համաձայնութիւնը:
3- Ինձ համար այս առաջարկութեան մէջ արտառոց որեւէ բան չկայ: Ես արդէն իսկ վերջին երեք տարիներին աշխատում եմ արտաքին յարաբերութիւնների ասպարէզում՝ մինչեւ վերջերս ղեկավարելով Հայաստանի խորհրդարանի պատւիրակութիւնը՝ Եւրանեսթ Պառլամենտական վեհաժողովում, իսկ ներկայում այդ միջազգային կառոյցի փոխնախագահն եմ: Ես նախկինում էլ ակտիւօրէն ներգրաււած եմ եղել խորհրդարանական դիւանագիտութեան ասպարէզում՝ 2000-ականների սկզբին դառնալով ՆԱՏՕ-ի Խորհրդարանական վեհաժողովում (ԽՎ) առաջին պատւիրակութեան ղեկավարը, հետագայում ղեկավարելով մեր պատւիրակութիւնը ԵԱՀԿ ԽՎ-ում եւ հանդիսանալով Հայ-ռուսական միջխորհրդարանական յանձնաժողովի համանախագահ: Սակայն, շեշտում եմ յատկապէս վերջին երեք տարիները, քանի որ Հայաստանի եւրոինտեգրացման քաղաքականութեան պայմաններում Եւրոնեսթի աշխատանքը դարձել է ամենօրեայ լիարժէք դիւանագիտական աշխատանք: Եւ չնայած բաւականին ոչ-նպաստաւոր պայմաններին, որ ստեղծւել են մեզ համար ՎՈՒԱՄ երկրների պատւիրակութիւնների կողմից, մեր պատւիրակութիւնը մինչ այժմ արձանագրել է լուրջ յաջողութիւններ: Սխալւում են նրանք, ովքեր կարծում են, թէ խորհրդարանական դիւանագիտութիւնը տրամագծօրէն տարբերւում է պաշտօնական դիւանագիտութիւնից: Ըստ էութեան, այս երկուսը ընթանում են զուգահեռաբար եւ, չնայած մասնաւոր առանձնայատկութիւններին, նոյն գործի տարբեր ճակատներն են ու չեն կարող միմեանց հակասել: Այլ կերպ կարող են կարծել, մասնաւորապէս, նրանք, ում համար միջազգային բեմերը Հայաստանում սեփական անկարողութիւնը քողարկող եւ երկրի վրայ ցեխ լցնող ելոյթների ասպարէզ է միայն: Ես դրանց թւին չեմ պատկանում:
4- Արւած առաջարկն ունի գործնական բնոյթ եւ չի հանդիսանում իմ քաղաքական հայեացքների փոփոխութիւնների հետեւանք, հետեւաբար՝ չի կարող դառնալ նմանատիպ փոփոխութեան պատճառ: Միւս կողմից՝ այս առաջարկն անողը, վստահօրէն, քաջատեղեակ է եղել իմ հայեացքներին եւ իր համար եւս խնդիր չի առաջացել: Նշանակում է, որ այս հարցում չի լինելու հակասութիւն, առաւել եւս՝ դիրքորոշումները վերանայելու խնդիր:


Հ.- Սակայն որոշ լրատւամիջոցներ այն կարծիքն են յայտնում, որ Ձեր նշանակումը կարող է Դաշնակցութեան քաղաքական ուղեգծի փոփոխութեան մասին վկայել:
Պ.- Որոշ լրատւամիջոցներ սխալւում են, ինչպէս դա շատ յաճախ է պատահում: Դա արւում է միտումնաւոր՝ հանրութեանն ապակողմնորոշելու համար, իբր թէ հարցը թիւրըմբռնման արդիւնք է. չեմ ուզում քննարկել: Բայց, բոլորը գիտեն՝ Դաշնակցութեան քաղաքական ուղեգիծը չի որոշւում նրա անդամների կամ նոյնիսկ ղեկավարների աշխատանքի վայրով, զբաղեցրած պաշտօնով եւ այլն: Ես չեմ կարծում, որ իմ կամ մէկ այլ դաշնակցական պատասխանատուի քննադատական ելոյթը մեր կոալիցիայում եղած ժամանակ եւ հիմա շատ է տարբերւում իր բովանդակութեամբ: Ով չի հաւատում՝ կարող է համեմատել: Մենք նոյնն ենք կոալիցիայում կամ դրանից դուրս, ընդդիմութեան շարքերում կամ դրանից դուրս: Մեր նպատակները չեն փոխւում: Ուրեմն՝ այս կամ այն դաշնակցականի կողմից, նոյնիսկ եթէ ղեկավար է, անհատապէս պետական աշխատանք ստանձնելը կուսակցութեանը բացարձակապէս չի կաշկանդում, եթէ այդ աշխատանքն իր բնոյթով համընկնում է այն ասպարէզին, ուր պետական կառոյցների հետ կուսակցութեան համագործակցութիւնը հիմնւած է կուսակցութեան որոշումների եւ հայեցակարգի վրայ եւ ունի աւանդական բնոյթ: Գաղտնիք չէ, որ արտաքին յարաբերութիւնների ասպարէզում մեր կուսակցութիւնը միշտ էլ համագործակցել է Հայաստանի իշխանութիւնների հետ այն բոլոր հարցերում, որտեղ համատեղ աշխատանքը, հայկական շահերի ապահովման առումով, աւելի մեծ արդիւնք է խոստացել: Դա ճիշտ է բոլոր ժամանակների համար: Այդպէս էր նոյնիսկ ԼՏՊ-ի իշխանութեան օրօք, երբ կուսակցութիւնը Հայաստանում հալածւած էր, բայց իր պարտքը Հայաստանի նորանկախ պետականութեան առջեւ կատարում էր արտերկրում: Այսօր էլ շատ արձանագրւած յաջողութիւններ արդիւնք են ՀՅԴ Հայ Դատի գրասենեակների ու հայ դիւանագէտների համագործակցութեան: Հայաստանի իրական շահերի պաշտպանութեան հարցում որեւէ առաջարկ մենք երբեք չենք մերժել, յատկապէս, երբ երկիրը կանգնած է լուրջ փորձութիւնների առջեւ:


Հ.- Բայց չէ՞ որ կան նաեւ հակասութիւններ: Դաշնակցութիւնը միշտ անհամաձայնութիւն է յայտնել հայ-թուրքական արձանագրութիւնների վերաբերեալ: Պահանջել է նոյնիսկ արտգործնախարար Էդւարդ Նալբանդեանի հրաժարականը: Ինչպէ՞ս էք պատրաստւում նրա հետ աշխատել:
Պ.- Իհարկէ, հակասութիւններ, նոյնիսկ՝ լուրջ հակադրութիւններ գոյութիւն ունէին եւ հիմա էլ կան: Միայն ձեր մատնանշած հարցը չէ, կան նաեւ այլ խնդիրներ, օրինակ՝ Արցախի հետ պաշտպանութեան ոլորտում համագործակցութեան պայմանագիր կնքելու հարցը եւ այլն: Ինչ վերաբերում է հայ-թուրքական արձանագրութիւններին, չպէտք է մոռանալ, որ մեր կուսակցութիւնը եւ մեր քաղաքական գծի կողմնակիցները, որ թէ՛ Սփիւռքում, թէ՛ Հայաստանում կազմում էին մեր հասարակութեան մեծամասնութիւնը, հիմնականում հասան իրենց նպատակին: Յիշէք Սահմանադրական դատարանի որոշումը: Եւ կրկնում եմ՝ Դաշնակցութեան լիդերներից մէկի աշխատանքը դիւանագիտական ասպարէզում ոչ մի կերպ չի կաշկանդում կուսակցութեանը: Դիւանագէտի աշխատանքը, իհարկէ, ենթադրում է որոշակի էթիկայի կանոններով թելադրւած սահմանափակումներ, բայց դա նորմալ երեւոյթ է: Իսկ հայ-թուրքական արձանագրութիւնների սնանկութիւնը հէնց Թուրքիայի եւ նրա դաշնակիցների պահւածքով բոլորին հասկանալի դարձաւ:


Հ.- Եւս մէկ հարց այլ ասպարէզից՝ ճի՞շտ են այն լուրերը, որ Դուք գեղարւեստական գիրք էք գրել:
Պ.- Այո:


Հ.- Դա ի՞նչ է, վէ՞պ:
Պ.- Այո, բայց այդ մասին եկէք խօսենք մէկ ուրիշ անգամ:

Հարցազրոյցը՝ «yerkir.am»-ի

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։