Հա

Հասարակական

17/03/2020 - 12:40

Երկու Վեհափառ Հայրապետներու որոշումով մինչեւ Աւագ հինգշաբթի 9 ապրիլ բոլոր եկեղեցիներէն ներս Սուրբ եւ Անմահ Պատարագը եւ եկեղեցական արարողութիւնները տեղի պիտի ունենան առանց հաւատացեալներու ներկայութեան

Երէկ առաւօտ, երկու Վեհափառ Հայրապետները՝ Ն.Ս.Օ.Տ.Տ. Գարեգին Բ Ամենայն Հայոց կաթողիկոս եւ Ն.Ս.Օ.Տ.Տ. Արամ Ա Մեծի Տանն Կիլիկիոյ կաթողիկոս, խորհրդակցութիւն մը ունեցան Քորոնավիրուսի ստեղծած համաճարակին եւ մեր ժողովուրդի կեանքէն ներս անոր յառաջացուցած հետեւանքներուն մասին:

Երէկ առաւօտ, երկու Վեհափառ Հայրապետները՝ Ն.Ս.Օ.Տ.Տ. Գարեգին Բ Ամենայն Հայոց կաթողիկոս եւ Ն.Ս.Օ.Տ.Տ. Արամ Ա Մեծի Տանն Կիլիկիոյ կաթողիկոս, խորհրդակցութիւն մը ունեցան Քորոնավիրուսի ստեղծած համաճարակին եւ մեր ժողովուրդի կեանքէն ներս անոր յառաջացուցած հետեւանքներուն մասին: Երեկոյեան Վեհափառ Հայրապետը հանդիպում մը ունեցաւ Անթիլիասի Մայրավանքի եպիսկոպոսներուն հետ: Արդարեւ, մեկնելով մեր ժողովուրդի անվտանգութեան նկատմամբ մեր ունեցած նախանձախնդրութենէն, միաժամանակ հետեւելով բժիշկներու ու մասնագէտներու թելադրութիւններուն, որոշուեցաւ որ մինչեւ Աւագ հինգշաբթի 9 ապրիլ մեր եկեղեցիներէն ներս Սուրբ եւ Անմահ Պատարագը մատուցուի եւ բոլոր եկեղեցական արարողութիւնները տեղի ունենան առանց հաւատացեալներու ներկայութեան: Նոյն որոշումը առնուեցաւ նաեւ Ամենայն Հայոց կաթողիկոսութեան կողմէ:

Հետեւաբար, ջերմօրէն կը թելադրենք մեր հաւատացեալ ժողովուրդին.-

1) Անթիլիասի ուխտի օրը՝ կիրակի, 29 մարտ 2020-ի յետմիջօրէին միայն հաւատացեալներ առանձնաբար եւ իրենց ընտանիքի անդամներով մօտենան Ս. Խորանին՝ Սուրբ Գրիգոր Լուսաւորչի Սուրբ Աջին օրհնութիւնը ստանալու: Նոյնպէս Ծաղկազարդի օրը՝ կիրակի, 5 ապրիլ 2020-ի յետմիջօրէին միայն եկեղեցի երթան՝ ստանալու օրհնուած ձիթենիի ճիւղեր:

2) Հոգեհանգիստները բնական կերպով պիտի կատարուին՝ միշտ առանց սգակիրներու ու հաւատացեալներու ներկայութեան: Անհրաժեշտ է այս գծով նախապէս տեղեակ պահել եկեղեցւոյ պատկան մարմինները կամ քահանայ հայրերը:

3) Թելադրելի է որ մեր ժողովուրդի զաւակները ընկերային ցանցերու, հեռատեսիլներու եւ ձայնասփիւռներու ճամբով հետեւին սուրբ եւ անմահ պատարագին:

4) Բնականաբար, մեր եկեղեցիները միշտ բաց պիտի մնան հաւատացեալներու առջեւ, որոնք օրուան ընթացքին կ’ուզեն եկեղեցի գալ խոկումի ու աղօթքի համար:

5) Մկրտութեան եւ թաղման արարողութիւնները կատարել սահմանափակ թիւով անձերու ներկայութեան:

Վստահ ենք որ մեր ժողովուրդի զաւակները հասկացողութիւն եւ պատասխանատու վերաբերում պիտի ցուցաբերեն վերոյիշեալ թելադրութիւններուն գծով: Ինչպէս Վեհափառ Հայրապետը մեր ժողովուրդին ուղղած իր հայրական պատգամին մէջ ըսաւ.-

Աղօ՛թքը պէտք է դառնայ մղիչ ոյժը մեր կեանքին, մեր մտածումներուն ու գործերուն: Հաւատքով շաղախուած աղօթքն է, որ մեզի հոգեկան քաջութիւն կու տայ դիմագրաւելու կեանքի բոլոր չարիքները: Մեր Տէրը Յիսուս Քրիստոս ըսաւ՝ «Ինչ որ աղօթքով խնդրէք, հաւատացէք որ պիտի ստանաք եւ ձեր խնդրանքը պիտի տրուի ձեզի» (Մր 11.24): Սիրելի հայորդիներ, «միշտ աղօթեցէ՛ք, որ արժանի ըլլաք այս պատահելիքներէն ազատելու» Աստուծոյ Որդւոյն խոստումին համաձայն: Հետեւաբար, եկէ՛ք դառնանք Քրիստոսի ու Սաղմոսին աղօթասաց բառերով ըսենք.- Դո՛ւն ես իմ յոյսը, Տէր, … ինձմէ հեռու մի մնար, փութա՛, ինծի օգնութեան հասիր (71. 5, 12):

 

Ազգային Կեդրոնական Վարչութեան Կրօնական Ժողով

16 մարտ 2020

Անթիլիաս

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։