Հա

Հասարակական

11/06/2022 - 10:35

Ցուցադրութեան հանւեց 1944-ին եւ մինչ այժմ թւագրւող արխիւներ. «Արարատ»-ը նշանաւորեց արխիւների միջազգային օրը

Այս տարի արխիւների միջազգային օրը Հ. Մ. «Արարատ» Կ.-ը նշեց բացառիկ միջոցառմամբ, ցուցադրութեան հանւեց Հ.Մ.Ա.Կ.-ի հիմնադրման՝ 1944 թւականին թւագրւող արխիւներ, խնամքով պահւած նիւթեր եւ գոյքեր:

Այս տարի արխիւների միջազգային օրը Հ. Մ. «Արարատ» Կ.-ը նշեց բացառիկ միջոցառմամբ, ցուցադրութեան հանւեց Հ.Մ.Ա.Կ.-ի հիմնադրման՝ 1944 թւականին թւագրւող արխիւներ, խնամքով պահւած նիւթեր եւ գոյքեր:

Միջոցառումը մեկնարկեց կազմակերպութեան արխիւային յանձնախմբի անդամ Արմինէ Գրիգորեանը, նա ընթերցելով օրւայ խօսքը անդրադարձաւ նոյն կազմակերպութեան արխիւային յանձնախմբի կատարած աշխատանքներին, որոնք յատուկ կարեւորում են արխիւների դերը, պահպանման նշանակութիւնը կառոյցների եւ անհատների զարգացման գործում: Նա, մասնաւորապէս նշեց, որ վերջին տարիների ընթացում հազարաւոր նիւթեր թւայնացւել են եւ պահպանւում են Հ. Մ. «Արարատ» Կ.-ի Խաժակ Արզումանեանի անւան արխիւային գրասենեակում, այդ թւում՝ թատերական ձեռագրեր, պիեսներ, հին եւ նոր տարբեր ձեռնարկների ֆիլմեր:

Այնուհետեւ, օրւայ առթիւ ելոյթ ունեցաւ Հ. Մ. «Արարատ» Կ.-ի Կենտրոնական վարչութեան նախագահ Հենրիկ Խալոյեանը: Նա իր ելոյթը մեկնարկեց անդրադառնալով արխիւների դերին կարեւորելով պատմութեան պահպանման անհրաժեշտութիւնը: Նա արխիւների պահպանումը վերագրեց մարդկութեան ինքնութեանը, յիշողութեանն ու արժէքներին:

«Վստահաբար, բոլորս կը հաստատենք, որ 21-րդ դարում մարդ արարածը դեգերում է իր ինքնութեան փնտրտուքներում եւ ինքնութեան տագնապ է ապրում: Մենք հայերս ու մանաւանդ սփիւռքահայութիւնն՝ ապրելով իր հայրենքից դուրս տագնապ է ապրում ե՛ւ «ինքնութեան» ե՛ւ «պատկանելիութեան զգացման» պարադոքսի: Մեզ նման կազմակերպութիւններն, որոնց հիմնական առաքելութիւնը սերունդների դաստիարակութիւնն է եւ հայապահպանումը եւ ապագայի տեսլականով՝ հայրենիքի եւ ազգային գաղափարաբանութիւն տարածելու համար ստեղծւած կազմակերպութիւն է, առանց ինքնութեան պահպանման անհնարին կը դառնայ առաքելութեան իրականացումը»,- իր խօսքերում նկատեց Հենրիկ Խալոյեանը:

Իր ելոյթի մէկ այլ հատւածում Հենրիկ Խալոյեանը նշեց, որ յունիսի 9-ը անհրաժեշտ է կազմակերպութիւնների ղեկավարութիւնների ուշադրութեանը յանձնել՝ բծախնդրութիւնը բարձրացնելու իմաստով, եւ վստահաբար մեր ղեկավար ընկերներն, որոնց մեծամասնութիւնը ներկայ են առաւել բծախնդիր կը հետեւեն թէ՛ անցեալի արխիւները հաւաքագրելու թէ՛ ապագայի համար իրենց ճիշտ նախաձեռնութիւններով հարստացնելու մեր անցեալի, մշակոյթների, արխիւների մեծ շտեմարանը:

Հ.Մ.Ա.Կ.-ի նախագահի ելոյթին յաջորդեց Թեհրանի հայոց թեմի առաջնորդ՝ Տ. Սեպուհ արք. Սարգսեանի խօսքը: Սրբազան Հայրը բարձր գնահատեց միջոցառման կայացման փաստը եւ նկատեց, որ արխիւների միջազգային օրը նշանաւորելն անհրաժեշտ է վերածել այն առիթի, որն մեզ կը ստիպի մտածել թէ որքան մեծ նշանակութիւն ունեն արխիւները:

Սրբազան Հայրը նկատեց, որ պատահական չէ մեր թշնամիների՝ թուրքերի կամ ազերիների այն քայլերն, որոնք կը ոչնչացնեն մեր խաչքարերը, որովհետեւ այդ խաչքարերը մեր պատմութեան վկայութիւնն են:

Ելոյթներից յետոյ, մասնակիցները այցելեցին Նորայր Պահլաւունիի անւան արխիւային գրասենեակ եւ Խաժակ Արզումանեան ցուցասրահ, որտեղ ցուցադրութեան էին հանւել տարբեր ծաւալի ու բովանդակութեան Հ. Մ. «Արարատ» Կ.-ի արխիւային պահոցներում խնամքով պահւող արխիւներ:

 

ՆԻՒԹԸ՝ ՍԻՒՆԷ ՖԱՐՄԱՆԵԱՆԻ

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։