Թուրքիայի Օրդու նահանգի Ալթընօրդու շրջանում մէկ օրւայ տարբերութեամբ մահացել են տեղի վերջին հայերից բժիշկ Տիգրան Թորամանը (90տ.) եւ նրա քոյրը դեղագործ Արտեմ Թորամանը (86տ.):
«alikonline.ir» - Թուրքիայի Օրդու նահանգի Ալթընօրդու շրջանում մէկ օրւայ տարբերութեամբ մահացել են տեղի վերջին հայերից բժիշկ Տիգրան Թորամանը (90տ.) եւ նրա քոյրը դեղագործ Արտեմ Թորամանը (86տ.): Այս մասին տեղեկացնում է Ermenihaber.am-ը:
Շրջանի Զաֆերիմիլլի թաղամասը, որտեղ բնակւում էին Թորամանները, ըստ թուրքական Takvim լրատւականի տւեալների, ժամանակին բնակեցւած է եղել աւելի քան 12 հազար հայերով եւ կոչւել է հայկական թաղամաս:
Նշւում է, որ հանգուցեալները իրենց ողջ կեանքում, բացի Ստամբուլում բժշկական կրթութիւն ստանալու տարիներից, ապրել են Ալթընօրդուում եւ մասնագիտութեան բերումով շփւել շրջանի բնակչութեան հետ՝ նրանցից շատերին օգնելով առանց դրամական փոխհատուցման: Դոկտոր Տիգրան Թորամանը 25 տարի եղել է նաեւ «Օրդուսփոր» ակումբի բժիշկը՝ ըստ թուրքական աղբիւրի այդ պարտականութիւնները կատարելով բոլորովին անվճար:
Շրջանում եկեղեցի ու հոգեւորական չլինելու պատճառով երկուսի հոգեհանգստի արարողութիւններն էլ կատարւել են թաղմասի մզկիթում, իսկ յուղարկաւորութեան արարողութիւնը կատարւել է մուսուլման հոգեւորականի մասնակցութեամբ:
Աւելի ուշ յայտարարութիւն է տարածել նաեւ Պոլսի հայոց պատրիարքարանը՝ նշելով, որ իրենց տեղեկութիւն չի տրամադրւել հայ քաղաքացիների մահւան վերաբերեալ եւ միայն մամուլից են իմացել կատարւածի մասին: Նշւել է նաեւ, որ տեղեկանալու դէպքում իրենց հոգեւորականին կը գործուղէին Օրդու՝ հանգուցեալների հոգեհանգստի արարողութիւնն իրենց կրօնի կանոններով անցկացնելու համար: Յայտարարութեան մէջ տեղեկացւել է նաեւ կիրակի օրը Ստամբուլի Ֆերիքեոյ շրջանի Ս. Վարդանանց եկեղեցում հանգուցեալների համար հոգեհանգստի կարգ անցկացնելու մասին:
