Առողջապահութեան համաշխարհային կազմակերպութեան (ԱՀԿ) գլխաւոր տնօրէն Թեդրոս Ադհանոմ Գեբրէյեսուսը վստահ է, որ 2023 թ.-ին COVID-19-ի համավարակը կաւարտւի, եւ այս հիւանդութեան պատճառով յայտարարւած միջազգային արտակարգ իրավիճակը կը վերացւի։
«alikonline.ir» - Առողջապահութեան համաշխարհային կազմակերպութեան (ԱՀԿ) գլխաւոր տնօրէն Թեդրոս Ադհանոմ Գեբրէյեսուսը վստահ է, որ 2023 թ.-ին COVID-19-ի համավարակը կաւարտւի, եւ այս հիւանդութեան պատճառով յայտարարւած միջազգային արտակարգ իրավիճակը կը վերացւի։ «Արմէնպրես»-ի փոխանցմամբ՝ Գեբրէյեսուսը նման յայտարարութիւն է արել Թոմաս Ֆրենսիս կրտսերի մեդալով պարգեւատրման արարողութեան ժամանակ: ԱՀԿ-ի ղեկավարը նման մեդալի է արժանացել առողջապահութեան ոլորտում ունեցած աւանդի համար։
«Վստահ եմ, որ մինչեւ այս տարւայ վերջ մենք կը կարողանանք ասել, որ COVID-19-ն աւարտւել է որպէս հանրային առողջապահութեան ոլորտում միջազգային մտահոգութեան արժանի արտակարգ իրավիճակ եւ որպէս համավարակ»,- ասել է Գեբրէյեսուսը:
Նա յիշեցրել է, որ մարտի 11-ին լրացաւ ուղիղ երեք տարին «այն պահից, երբ ԱՀԿ-ն առաջին անգամ յայտարարեց, որ COVID-19-ի համաշխարհային բռնկումը կարելի է բնութագրել որպէս համավարակ»։
«Այժմ մենք, անշուշտ, շատ աւելի լաւ վիճակում ենք, քան երբեւէ համաճարակի ժամանակ»,- ասել է ԱՀԿ-ի գլխաւոր տնօրէնը:
Նա ուշադրութիւն է հրաւիրել այն փաստի վրայ, որ «առաջին անգամ շաբաթական գրանցւած մահերի թիւն այժմ աւելի քիչ է», քան այն ժամանակ, երբ ԱՀԿ-ն առաջին անգամ օգտագործեց «համավարակ» բառը՝ բնութագրելով SARS-CoV-2-ի տարածումը:
ԱՀԿ-ի ղեկավարը շեշտել է, որ հարկաւոր է ազնւօրէն գնահատել համավարակը եւ դրանից դասեր քաղել, «որպէսզի այլեւս չկրկնեն նոյն սխալները»:
Համավարակի «դասերի» թւում, Գեբրէյեսուսն անւանել է առաջին հերթին ամուր հանրային առողջապահական համակարգը՝ կոչ անելով բոլոր երկրներին ներդրումներ անել այդ ոլորտում:
Երկրորդ դասը գիտութեան կարեւորութիւնն է: ԱՀԿ-ի ղեկավարը շեշտել է, որ համավարակի ողջ ընթացքում գիտութիւնը մարդկանց տրամադրել է գործիքներ՝ հասկանալու, թէ ինչպէս է վիրուսը տարածւում եւ ինչպէս կանգնեցնել այն:
Իսկ երրորդ դասն, ըստ Գեբրէյեսուսի, համագործակցութիւնն է: Ըստ նրա՝ կորոնավիրուսի համավարակի ընթացքում կար համագործակցութեան եւ համակարգման պակաս, քանի որ պետութիւնները չէին կարողանում համահունչ գլոբալ արձագանգ ձեւաւորել:
