Հա

Հասարակական

07/08/2016 - 11:50

Էրդողանը Թուրքիան վերածում է մի հսկայական Գուլագի. նրա որոշ գործողութիւններ յիշեցնում են 1915 թւականը

Աներեւակայելի վտանգաւոր զարգացումներ են տեղի ունենում Թուրքիայում՝ դաւադիրներին որսալու քողի տակ: Յուլիսի 15-ի յեղաշրջման փորձն անւանելով «նւէր Ալլահից», նախագահ Էրդողանն այս առիթը չարաշահում է իր վաղեմի երազանքն իրականացնելու համար՝ դառնալ միաժամանակ ոչ միայն Սուլթան, այլ նաեւ Ստալին ու Հիտլեր...

ՅԱՐՈՒԹ ՍԱՍՈՒՆԵԱՆ
«Կալիֆորնիա կուրիէր» թերթի հրատարակիչ եւ խմբագիր
www.TheCaliforniaCourier.com


Աներեւակայելի վտանգաւոր զարգացումներ են տեղի ունենում Թուրքիայում՝ դաւադիրներին որսալու քողի տակ: Յուլիսի 15-ի յեղաշրջման փորձն անւանելով «նւէր Ալլահից», նախագահ Էրդողանն այս առիթը չարաշահում է իր վաղեմի երազանքն իրականացնելու համար՝ դառնալ միաժամանակ ոչ միայն Սուլթան, այլ նաեւ Ստալին ու Հիտլեր...
Յեղաշրջման փորձից շատ չանցած, Էրդողանը հրամայեց ձերբակալել եւ աշխատանքից հեռացնել տասնեակ հազարաւոր սպաների (այդ թւում՝ հարիւրաւոր գեներալների եւ ծովակալների), ոստիկանների, ուսուցիչների, քաղաքացիական ծառայողների, դատաւորների եւ լրագրողների, ինչպէս նաեւ փակել հարիւրաւոր մասնաւոր դպրոցներ: Այս գործողութիւններն այնքան արագ տեղի ունեցան, որ դժւար էր հաւատալ, թէ կարճ ժամանակահատւածում հնարաւոր էր կասկածեալների նման սպառիչ ցուցակ կազմել: Իրականում, թուրքական բռնապետն ամենեւին էլ կարիք չունէր որեւէ ցուցակ նախապատրաստելու, քանի որ նա ձերբակալում եւ հեռացնում էր բոլոր նրանց, որոնք իր հետեւորդները չէին…
Յուլիսի 20-ին Թուրքիայի խորհրդարանը, ձայների 346 կողմ եւ 115 դէմ յարաբերակցութեամբ, հաւանութիւն տւեց երկրում 90-օրեայ արտակարգ դրութիւն յայտարարելու օրինագծին եւ Էրդողանին «քարտ բլանշ» տւեց 30 օր իշխել նախագահական հրամանագրերով: Այս երկու ժամկէտները, ամենայն հաւանականութեամբ, կերկարաձգւեն: 115 պատգամաւորները, որոնք համարձակւեցին դէմ քւէարկել այդ օրինագծին, կարող են թանկ վճարել իրենց անհաւատարմութեան համար, քանի որ նրանք կարող են զրկւել պատգամաւորական անձեռնմխելիութիւնից եւ մեղադրւել յեղաշրջմանը մասնակցելու համար: Թուրքիայի կառավարութիւնն իր անօրինական գործողութիւնների դատական բոլոր վերանայումները կանխելու նպատակով, տեղեկացրեց Եւրոխորհրդին, որ այլեւս չի ընդունելու Մարդու իրաւունքների եւրոպական դատարանի իրաւասութիւնը...
Նկատելի են որոշ ահազդու զուգահեռներ Էրդողանի վարչակարգի դաժան քայլերի եւ Օսմանեան կայսրութիւնում 1915-1923 թթ. ցեղասպանութիւնների ժամանակ հայերի եւ միւս քրիստոնեաների դէմ իրականացւած անգութ բռնութիւնների միջեւ.
1- Թուրքական կառավարութիւնը արգելանք է դրել յուլիսի 15-ի պետական յեղաշրջման կասկածեալների ունեցւածքի վրայ: Նրանց հաւանական դատապարտումից յետոյ, այդ ունեցւածքը կը փոխանցւի պետութեանը, ինչպէս դա եղաւ 1915 թւականից սկսած, երբ բռնագրաււեց աքսորւած ու սպանւած հայերի եւ այլոց սեփականութիւնը:
2- Էրդողանի կողմնակիցները, որոնք սպանւել կամ վիրաւորւել էին յեղաշրջման փորձի ընթացքում, փոխհատուցում կը ստանան կասկածեալ դաւադիրների բռնագրաււած ունեցւածքի հաշւին: Համանման գործողութիւն իրականացւեց նաեւ Հայոց Ցեղասպանութեան ժամանակ՝ հայերից թալանւած ունեցւածքը բաժանւեց Բալկաններից ներգաղթած թուրքերին եւ երիտթուրքերի առաջնորդների ընտանիքներին, որոնք սպանւել էին հայ վրիժառուների ձեռքով:
Ընդդիմադիր «Ջումհուրիէթ» թերթի խմբագիր Ջան Դիւնդարը, մեծ ռիսկի դիմելով, համարձակօրէն պնդեց, որ արտակարգ դրութեան պայմաններում Թուրքիան կունենայ «բռնապետական ռեժիմ, որտեղ կը սահմանափակւեն ազատութիւնները, գրաքննութեան կենթարկւեն լրատւամիջոցները եւ կը վերանայ խորհրդարանը»: Ցաւօք, Դիւնդարը չնշեց, որ այդ բռնութիւնները Թուրքիայում վաղուց գոյութիւն ունէին, պետական յեղաշրջման փորձից առաջ: Իրօք, Էրդողանը իր բռնատիրական ծրագրերը բացայայտել է աւելի քան 10 տարի առաջ, յայտարարելով՝ «Ժողովրդավարութիւնը գնացքի նման է: Դու նստում ես, որ մի տեղ գնաս, իսկ յետոյ իջնում ես»...
Էրդողանը, հասնելով իր «գնացքով ճանապարհորդութեան» աւարտին, այժմ յայտարարել է, որ ինքը կարող է վերականգնել մահապատիժը «յեղաշրջման դաւադիրների» նկատմամբ, իր քաղաքական մրցակիցներից ձերբազատւելու համար... Եւրոմիութեան պաշտօնեաները զգուշացրել են թուրք ղեկավարին, որ նման քայլը մշտապէս կարգելափակի Թուրքիայի անդամակցութիւնը Եւրոմիութեանը...
Բացի այդ, «Ամնիսթի Ինտերնէյշնլ» կազմակերպութիւնն անցեալ շաբաթ ջախջախիչ զեկոյց հրապարակեց, փաստագրելով կալանաւորների իրաւունքների բազմաթիւ խախտումներ եւ մեղադրելով Էրդողանի անվտանգութեան ուժերին՝ զինւորների խոշտանգումներին, սոված պահելուն եւ նոյնիսկ բռնաբարութիւններին մասնակցելու մէջ... Կալանաւորները նաեւ զրկւած էին իրենց փաստաբաններին հանդիպելու հնարաւորութիւնից:
Էրդողանը, իր քաղաքական հակառակորդներին վերացնելու մոլուցքով տարւած, պահանջել է Միացեալ Նահանգներից Թուրքիային արտայանձնել իր գլխաւոր մրցակից, իսլամական հոգեւորական Ֆաթօլլահ Գիւլէնին՝ մեղադրելով նրան յուլիսեան յեղաշրջման կազմակերպման մէջ: Էրդողանի համախոհները, ռասիստական մօտեցմամբ փորձեցին վարկաբեկել Գիւլէնին, մեղադրելով նրան նաեւ հայկական ծագում ունենալու եւ 50 տարի առաջ Պոլսոյ հայոց պատրիարքին Հայոց Ցեղասպանութիւնը ճանաչող նամակ գրելու համար...
Ազդեցիկ Իրաւաբանների միջազգային յանձնաժողովը (ԻՄՅ) երկու զեկոյց է հրապարակել յուլիսի 18-ին եւ 21-ին՝ Էրդողանի վարչակարգի կոշտ միջոցները որակելով որպէս «կամայական եւ օրէնքի գերակայութեան հիմնարար սկզբունքին հակասող»: Աւելին, ԻՄՅ-ի գլխաւոր քարտուղար Վայդլեր Թէյլորը զգուշացրել է Թուրքիային. «Կան մարդու իրաւունքներ, որոնք երբեք չեն կարող սահմանափակւել, նոյնիսկ արտակարգ դրութեան ժամանակ, յատկապէս կեանքի իրաւունքը, խոշտանգումների կամ դաժան վերաբերմունքի արգելանքը եւ կամայական ազատազրկման հիմնական տարրերն ու արդար դատաքննութեան իրաւունքը»:
Նախագահ Էրդողանը աւելի մեծ վնաս է հասցրել թուրք ժողովրդին, քան այսպէս կոչւած դաւադիրները՝ ձերբակալելով եւ աշխատանքից հեռացնելով 60 հազար զինւորականների, պետական պաշտօնեաների եւ այլ քաղաքացիական անձանց, դրանով իսկ տկարացնելով երբեմնի հզօր ռազմական ուժը եւ վտանգելով երկրի ապահովութիւնը:

Թարգմանութիւնը՝
ՌՈՒԶԱՆՆԱ ԱՒԱԳԵԱՆԻ

Յարակից լուրեր

  • «Հայրենիք»-ի խմբագրական. Դատարկ փաղաքշանք
    «Հայրենիք»-ի խմբագրական. Դատարկ փաղաքշանք

    Վերոյիշեալ կարգախօսը կը ցոլացնէ Չորեքշաբթի, Նոյեմբեր 13-ին, Սպիտակ Տան նախագահական գրասենեակին հանդիպումը Միացեալ Նահանգներու նախագահ Տանըլտ Թրամփի եւ իր թուրք պաշտօնակից Ռեճէպ Թայիպ Էրտողանի միջեւ։

  • Վետօ կիրառած ԱՄՆ կոնգրեսականի կապը թուրքական լոբբինգի հետ
    Վետօ կիրառած ԱՄՆ կոնգրեսականի կապը թուրքական լոբբինգի հետ

    «Ամերիկեան հետազօտութիւնների հայկական կենտրոնը» ֆէյսբուքեան էջում հրապարակել է տեղեկութիւններ, որով պարզ է դառնում ԱՄՆ կոնգրեսական Լինդսի Գրահամի կապը թուրքական լոբբինգի հետ: Նշենք, որ Գրահամն այն կոնգրեսականն է, որը երկու օր առաջ Էրդողանի հետ հանդիպումից յետոյ վետօ էր դրել Հայոց Ցեղասպանութեան բանաձեւի վրայ:

  • «ԱՄՆ-ի եւ Թուրքիայի միջեւ տեղի ունեցաւ հերթական գործարքը, որով խոչընդոտւեց պատմական արդարութեան ճանաչման ընթացքը». թուրքագէտ
    «ԱՄՆ-ի եւ Թուրքիայի միջեւ տեղի ունեցաւ հերթական գործարքը, որով խոչընդոտւեց պատմական արդարութեան ճանաչման ընթացքը». թուրքագէտ

    Թուրքագէտ Ռուբէն Սաֆրաստեանը Yerkir.am-ի հետ զրոյցում նշեց, որ սպասելի էր, որ Հայոց Ցեղասպանութեան թեմայի հետագայ ընթացքն արդէն պէտք է կախւած լինէր անդրկուլիսեան բանակցութիւններից, որի գագաթնակէտը եղաւ Թրամփի եւ Էրդողանի հանդիպումը՝  սենատոր Լինդսի Գրահամի մասնակցութեամբ, որը Էրդողանի հետ հանդիպումից յետոյ գնացել եւ Սենատում վետօ էր դրել  բանաձեւի վրայ:

  • Պէտք է շարունակենք մեծ թափ հաղորդել այս գործընթացին
    Պէտք է շարունակենք մեծ թափ հաղորդել այս գործընթացին

    ԱՄՆ նախագահ Դոնալդ Թրամփի հետ համատեղ մամուլի ասուլիսի ժամանակ Թուրքիայի նախագահ Ռեջեփ Թայիփ Էրդողանը քննադատեց ԱՄՆ Ներկայացուցիչների պալատին՝ Հայոց Ցեղասպանութիւնը ճանաչելու վերաբերեալ բանաձեւն ընդունելու համար ու դիմեց Սենատին՝ իր խօսքում դարձեալ ժխտելով Հայոց Ցեղասպանութիւնը։ Tert.am-ի հետ զրոյցում անդրադառնալով ԱՄՆ Սենատում Հայոց Ցեղասպանութեան բանաձեւի ընդունումը սենատոր Լինդսի Գրահամի կողմից արգելափակելու որոշմանը՝ ասաց Ամերիկայի Հայ Դատի յանձնախմբի մամուլի քարտուղար Եղիսաբեթ Չուլջեանը։

  • Էրդողանի հակահայկական ելոյթը Թրամփի հետ հանդիպման ժամանակ
    Էրդողանի հակահայկական ելոյթը Թրամփի հետ հանդիպման ժամանակ

    Երէկ ուշ երեկոյեան տեղի ունեցաւ ԱՄՆ նախագահ Դոնալդ Թրամփի եւ Թուրքիայի նախագահ Ռեջեփ Թայիփ Էրդողանի հանդիպումը: Հանդիպման թեմաները շատ էին՝ Սիրիա, քրդական հարց, S-400-«Պատրիոտ» համակարգեր, ահաբեկիչներ եւ այլն: Սակայն մեզ համար աւելի ուշագրաւ էր հանդիպման ընթացքում Հայոց Ցեղասպանութեան թեմային անդրադարձը:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։