ՀՀ ԱԽ քարտուղարը հանդիպել է ԱԳ նախարարի եւ ԱԱԳԽ քարտուղարի հետ
«ԱԼԻՔ» – «Թեհրան երկխօսութիւն 2025» 4-րդ ֆորումին մասնակցելու համար Թեհրան ժամանած ՀՀ Անվտանգութեան խորհրդի քարտուղար Արմէն Գրիգորեանը երէկ՝ մայիսի 17-ին հանդիպել է ԱԳ նախարար Սէյէդ Աբբաս Արաղչիի եւ Ազգային անվտանգութեան գերագոյն խորհրդի քարտուղար Ալի Աքբար Ահմադիանի հետ:
Արաղչի-Գրիգորեան հանդիպման ընթացքում կողմերը քննարկել են երկկողմ յարաբերութիւնները, տարածաշրջանային եւ միջազգային վերջին զարգացումները, ինչպէս նաեւ փոխադարձ հետաքրքրութիւն ներկայացնող հարցեր։
Արաղչին նշել է, որ Իրանի Իսլամական Հանրապետութիւնը մեծ նշանակութիւն է տալիս Հայաստանի Հանրապետութեան հետ իր յարաբերութիւններին բոլոր ոլորտներում, քանի որ Թեհրանի եւ Երեւանի միջեւ երկկողմ յարաբերութիւնները վերելք են ապրում։
Նա ընդգծել է Իրանի յստակ դիրքորոշումն ու աջակցութիւնը ՀՀ տարածքային ամբողջականութեանն ու ինքնիշխանութեան անձեռնմխելիութեանը:
Արաղչին ներկայացրել է նաեւ Իրանի ժողովրդի խաղաղ նպատակներով միջուկային էներգիան օգտագործելու իրաւունքի պաշտպանութեան հարցում երկրի սկզբունքային եւ թափանցիկ դիրքորոշման մասին։
Իր հերթին, Արմէն Գրիգորեանը երկու երկրների միջեւ յարաբերութիւնները գնահատել է որպէս «շատ լաւ եւ դրական» եւ ընդգծել է Հայաստանի կառավարութեան լուրջ կամքը՝ Իրանի հետ համապարփակ յարաբերութիւնները զարգացնելու, մասնաւորապէս՝ տնտեսական եւ առեւտրային ոլորտներում։ Նա շեշտել է Իրանի եւ ԵԱՏՄ անդամ երկրների միջեւ ազատ առեւտրի համաձայնագրի շուրջ աշխատանքներն աւարտելու կարեւորութիւնը։
Ահմադիան-Գրիգորեան հանդիպման ընթացքում կողմերը գոհունակութեամբ ընդգծել են յաճախակի դարձած փոխայցելութիւնների կարեւորութիւնը եւ դրանց նպաստը երկկողմ բազմաոլորտ համագործակցութեան զարգացմանը:
Երկու գործընկերները անդրադարձ են կատարել Հարաւային Կովկասի տարածաշրջանի անվտանգային իրավիճակին եւ կարեւորել անվտանգային մարտահրաւէրներին դիմակայելու շուրջ համատեղ ջանքերի գործադրման շարունակականութիւնը:
