«ԱԼԻՔ», Կ. Դ. – Իրանում Սրբազան Պաշտպանութեան շաբաթւայ առիթով, երէկ՝ երեկոյեան Թեհրանի Նոր Բուրաստան գերեզմանատան Նահատակների բաժնում տեղի ունեցաւ յատուկ արարողութիւն:
Արարողութեան ընթացքում Թեհրանի հայոց թեմի առաջնորդ Տ. Սեպուհ արք. Սարգսեանը աղօթեց նահատակների հոգիների խաղաղութեան համար, բարձր գնահատելով նահատակներին, ովքեր իրենց կեանքը նւիրաբերեցին յանուն Իրանի տարածքային ամբողջականութեան պահպանման: Ապա Սրբազան Հայրը, Իսլամական խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը, Թ. Հ. Թ. Պատգամաւորական ժողովի ատենապետ դոկտ. Սեւակ Հաթամեանը եւ ատենադպիր Արտոյտ Զոհրաբեանը, Թ. Հ. Թ. Թեմական խորհրդի ներկայացուցիչ Ռաֆիկ Մելիքսեթեանը, Իրանի Նահատակների հիմնարկի պատասխանատու անձինք, Նոր Բուրաստանի վարչութիւնը եւ նահատակների հարազատները ծաղիկներ մատուցեցին նահատակների շիրիմներին:
Վերջում Նոր Բուրաստանի դահլիճում կազմակերպւել էր ընդունելութիւն:
