Իրանի Իսլամական Հանրապետութեան յեղափոխութեան 45-ամեակի նշումը՝ Ուրմիայի «Արամ Մանուկեան» սրահում

Ատրպատական, ազգային առաջնորդարան, Թաւրիզ – Հինգշաբթի, փետրւարի 1-ին, ժամը 16:30-ին, Ուրմիայի Ս. Ստեփանոս ծխական եկեղեցու «Արամ Մանուկեան» հանդիսասրահում նշւեց Իրանի Իսլամական յեղափոխութեան 45-ամեակը հանդիսապետութեամբ Ատրպատականի հայոց թեմի առաջնորդ՝ Տ. Գրիգոր արք. Չիֆթճեանի: Հանդիսութեանը ներկայ գտնւեցին Իրանի Իսլամական խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը, ազգային բարերար Էդիկ Մեջլումեանը, Թեմական խորհրդի ատենադպիր Վարդան Կարապետեանը, Ուրմիայի Գործակալական խորհրդի ատենապետ Վանիկ Յակոբեանցը, Ուրմիայի շրջանի պատգամաւորներ, ասորի հոգեւոր հովիւ՝ Իլիուշ Ազիզ քահանան, ԻԻԽ-ում ասորիների պատգամաւոր Շառլի Էնւիէ Թեքիէն եւ ուրմիահայեր:

Հանդիսութեանը հրաւիրւել էին պետական բարձրաստիճան պատասխանատուներ, որոնք անձամբ կամ ներկայացուցիչներով պատւել էին ուրմիահայ համայնքին: Այսպէս, նրանց շարքում էին նահանգապետարանի քաղաքականութեան եւ ընտրութեան տնօրէն՝ դոկտ. Մադադին, Մշակոյթի հաստատութեան գլխաւոր տնօրէն Նովրուզիի, փոքրամասնութեան գրասենեակի տնօրէն Միրսադրին, Ռադիօ-հեռուստատեսութեան գլխաւոր տնօրէն Հեջազիֆարն, ոստիկանութեան տնօրէն գնդ. Բաբային, Իսլամական քարոզչութեան համակարգող խորհրդի ղեկավար հոջ. Նասեր Աղային, Ասորիների խորհրդի նախագահ՝ Սթալին Սիմոնը, դատարանում փոքրամասնութիւնների լուծման խորհրդի նախագահ Վիլսոնն եւ Նիքսոն Իւնանը եւ այլ հրաւիրեալներ:

Բացման խօսքով հանդիսավար Արմէն Բադալեանը վեր հանեց 45 տարիներ առաջ կրօնական մեծ առաջնորդ այաթ. Իմամ Խոմէյնիի իրականացրած Յեղափոխութիւնը, որի հովանու ներքոյ Իրանի Իսլամական Հանրապետութիւնում եղբայրաբար ապրում են տարբեր կրօնների եւ ազգութիւնների պատկանող ժողովուրդներ: Այս առիթով, ուրմիահայութեան անունից միանգամ եւս հաւատարմութիւն յայտնեց նա Իրանի Իսլամական Հանրապետութեան, նրա կրօնական առաջնորդ այաթ. Խամենէին, ինչպէս նաեւ երախտագիտութիւն այն բոլոր բարիքների համար, որը պետութիւնը ընձեռում է յատկապէս փոքրամասնութիւններին:

Գեղարւեստական ծրագրով ելոյթ ունեցան ՀՕՄ-ի Ուրմիայի մասնաճիւղի «Նայիրի» մանկապարտէզ-նախակրթարանի երեխաները, որոնք իրանեան հայրենիքին նւիրւած երգեր կատարեցին, ղեկավարութեամբ ուսուցչուհի Օֆելիա Սայեադեանի: Նրանք նաեւ ձեռքի աշխատանքներ էին կատարել, որոնք սրահի մուտքի մօտ էին ցուցադրւել: Ուրմիայի հայոց «Մասիհա» դպրոցի աշակերտուհի Մարիպէլ Ասլանեանը պարսկերէն ասմունքով հանդէս եկաւ, վեր հանելով նահատակութեան եւ անձի ընծայաբերման ոգին:

Ծրագրի այս բաժնում խօսքը տրւեց պատգամաւոր դոկտ. Արա Շահվերդեանին: Պետական անձի հաստատամտութեամբ Թեհրանի եւ հիւսիսային իրանահայութեան պատգամաւորը շեշտեց Իրանի Իսլամական Հանրապետութեան տարածքում 45-տարիներ առաջ տեղի ունեցած Յեղափոխութեան կարեւորութիւնը, ինչպէս նաեւ իրանահայութեան հաւատարմութիւնը սոյն յեղափոխութեան սկզբունքներին եւ հաւասարութեան ու եղբայրութեան կանոններին:

Սրբազան Հայրը յիշատակելի սոյն օրւայ առիթով իր պատգամը յղելով ներկաներին, շեշտեց «խաղաղութիւն» հասկացութեան բնոյթը, որը լոկ գաղափար լինելուց կեանքի վերածւելու համար, պայման ունի մի ուրիշ կարեւոր իրողութիւնը, որը արդարութիւնն է մարդկութեան կեանքում. «Առանց արդարութեան՝ չկայ խաղաղութիւն»,- ասաց Սրբազան Հայրը, օրինակ բերելով մինչեւ օրս չարչարւող ու տագնապահար ժողովուրդների կեանքը. «Նայեցէ՛ք հայ ժողովրդին, նայեցէ՛ք պաղեստինցի ժողովրդի առօրեային… արդարութեան ծարաւի են բոլոր անիրաււած ժողովուրդները… եւ նման իրադրութեան մէջ խաղաղութի՞ւն ենք փնտրում: Խաղաղութիւնը պայմանաւորւած է հասարակական եւ քաղաքական կեանքի արդարութեամբ: Իրենք իրենց զարգացած ու յառաջադէմ երկրներ համարող պետութիւնները հարկ է, որ կարեւորութեամբ նկատի ունենան արդարութեան հաստատումը մարդկութեան կեանքում»,- շեշտեց Սրբազան Հայրը, աւելացնելով, որ «Արդարութեան հաստատման համար աշխատող մարդիկ եւ պետութիւններ, Ամենակալ Աստծու կամքը կատարած կը լինեն այս աշխարհում»:

Օրւայ պատգամաբերների գլխաւորն էր նահանգապետարանի քաղաքականութեան եւ ընտրական բաժանմունքի տնօրէն դոկտ. Մադադին, ով շնորհաւորեց բոլորի տօնը, ինչպէս նաեւ իր բարձր գնահատանքը յայտնեց ներկաներին, եւ մանաւանդ բոլոր մասնակիցներին՝ երեխաներին եւ երիտասարդներին, որոնք այնքան սիրով նախապատրաստւել էին գեղարւեստական ծրագրին:

Յայտնենք, որ ծրագրի աւարտական փուլում բեմ բարձրացաւ Հ.Մ.Ա.Կ.-ի Ուրմիայի մասնաճիւղի երգչախումբը: Հայրենասիրական երգերի մի շարան ներկայացրեց խումբը, խանդավառելով ներկայ հիւրերին եւ ազգայիններին:

Հանդիսութեան աւարտին բեմ հրաւիրւեցին պաշտօնական անձինք, գլխաւորութեամբ Սրբազան Հօր, նւէրներ բաշխելու գեղարւեստական ծրագրի մասնակիցներին: Գործակալական խորհրդի ատենապետ Վանիկ Յակոբեանցը բեմ հրաւիրեց այն հինգ երեխաներին, ե՛ւ դպրոցից, ե՛ւ մանկապարտէզ-նախակրթարանից, որոնք նահանգապետարանի հարցաթերթիկը լրացնողների միջից բախտով ընտրւել էին գնահատւելու համար: Բոլոր մասնակիցներին նւէրներ էր պատրաստել նաեւ ազգային բարերար Էդիկ Մեջլումեանը, որոնք նրանց յանձնւեցին Սրբազան Հօր ձեռամբ:

Սոյն ծրագրով բացումը կատարւեց Յեղափոխութեան 45-աեմակին նւիրւած ձեռնարկների Արտպատականի հայոց թեմում, որը շարունակւելու է տաս օրեր, մինչեւ Յեղափոխութեան առիթով ամէն տարի կազմակերպւող քայլարշաւը: