Աշակերտութեան հետ մշակութային հանդիպում՝ Թաւրիզի «Ռոստոմ-Գասպար» գրադարանում
Ատրպատական, ազգային առաջնորդարան, Թաւրիզ – Երեքշաբթի, փետրւարի 6-ին, ժամը 18:00-ին, ազգային առաջնորդարանի «Ռոստոմ-Գասպար» գրադարանում, վարչութեան կազմակերպութեամբ աշակերտութեան հետ մշակութային հանդիպում տեղի ունեցաւ, հովանաւորութեամբ Ատրպատականի հայոց թեմի առաջնորդ Տ. Գրիգոր արք. Չիֆթճեանի եւ Թեմական խորհրդի: Ներկայ էր գրադարանի մեծ ընտանիքն ու Թաւրիզի հայոց դպրոցի աշակերտութիւնը, առաջնորդութեամբ տեսչուհի Սիլւա Աշըղեանի: Սրբազան Հօր կողքին ներկայ էին Թեմական խորհրդի ատենադպիր Վարդան Կարապետեանը եւ խորհրդատու անդամ Քաթրին Դիլանեանը:
Բացման խօսքը կատարեց եւ բոլորին բարի գալուստ մաղթեց գրադարանի վարչութեան երիտասարդ անդամներից Շարա Բաղդասարեանը: Նա շեշտելով առիթը, ուսման ու գիտութեան իրենց քայլերը վերցրած հայոց դպրոցի աշակերտութեան ներկայացրեց «Ռոստոմ-Գասպար» գրադարանի շուրջ մէկ դարեայ անցեալը, եւ այն շինիչ դերակատարութիւնը, որը այն ունեցել է թաւրիզահայ նոր սերնդի մտաւոր կազմաւորման գործում: Նա յիշեց նաեւ օրւայ հանդիպման առիթը՝ Իրանի Իսլամական Յեղափոխութեան տօնը:
Իրանի Յեղափոխութեան եւ Իսլամական Հանրապետութեան հիմնադրման նախաքայլերի մասին փոխն ի փոխ դասախօսեցին, վարչութեան երիտասարդուհի անդամներից Շարիս Վարդանեանն ու Իզաբէլ Սարգսեանը: Նրանք պատանիներին ու պարմանուհիներին հասկանալի ու պարզացւած ոճով ներկայացրին Իրանում 45 տարիներ առաջ տեղի ունեցած յեղափոխութիւնը, եւ դրա շրջագծում՝ իրանահայ համայնքի իրաւունքներն ու վայելած ազատութիւնը: Ի դէպ, դասախօսական ելոյթներին ընկերակցում էր պատմական մի շարք լուսանկարների պատկերասփռում Անդրու Մկրտչեանի միջոցով, որոնք աւելի տպաւորիչ էին դարձնում ներկայացւած նիւթերը:
Փակման եւ օրհնութեան խօսքով, Սրբազան Հայրը մանկավարժական ոճով հայ աշակերտութեանը իր մտքերին հաղորդակից դարձրեց: Նա գնահատեց գրադարանի վարչութիւնը, գլխաւորութեամբ Նայիրի Շահմուրադեանի, որը իր շուրջ հաւաքելով նոր սերնդին, նրանց մէջ վառ է պահում հայ գրքի հանդէպ սէրը, յատկապէս ներկայ «թւայնացած դար»-ում: Սրբազան Հայրը նաեւ բացատրեց «կրօնական ազատութիւն» եւ «կրօնական հանդուրժողութիւն» եզրերը, որոնք բացառիկ օրինականութեամբ եւ պետական պաշտպանւածութեամբ տեղ ունեն Իրանի Իսլամական Հանրապետութիւնում: Այս առիթով նա շնորհաւորեց բոլորին, մաղթելով, որ Աստւած իր հովանու ներքոյ պահպանի Իրանը, իր բոլոր հատւածներով, ազգութիւններով ու կրօններով:
Աւարտին գրադարանի վարչութիւնը յատուկ ծաղկեկողովով պատւեց Սրբազան Հօրը, Սրբց. Ղեւոնդեանց հոգեւորականաց տօնը շնորհաւորելով, որից յետոյ տեղի ունեցաւ հիւրասիրութիւն: Ներկայ աշակերտութիւնը առիթ ունեցաւ, գրադարանի գիտաժողովների դահլիճում ուսումնասիրել ցուցադրւած մամուլը, որի ընտրեալ համարները ներկայացնում էին Իրանի Յեղափոխութեան նիւթեր, համապատասխան լուսանկարներով:
