Թաւրիզի Խնամակալ մարմնի միջինքի երեկոյթը

Ատրպատական, ազգային առաջնորդարան, Թաւրիզ – Չորեքշաբթի, փետրւարի 28-ի երեկոյեան ժամը 20:00-ից սկսեալ, Թաւրիզի եկեղեցիների Խնամակալ մարմնի կազմակերպութեամբ, Մեծ Պահքի կէսի՝ Միջինքի առիթով, տեղի ունեցաւ երեկոյթ, ազգային առաջնորդարանի «Համազասպ Ոսկանեան» սրահում:

Երեկոյթը հովանաւորում էր եւ նախագահում՝ Ատրպատականի հայոց թեմի առաջնորդ՝ Տ. Գրիգոր արք. Չիֆթճեանը, Թեմական խորհրդի հետ միասին: Հանդիսութեան բացման եւ բարի գալստեան խօսքը կատարեց վարչութեան ատենապետուհի Էմմա Յարութիւնեանը: Նա ուրախութիւն յայտնեց, որ եկեղեցին միջնաբերդ լինելով իւրաքանչիւր համայնքի, կարողանում է ո՛չ միայն հոգեւոր տունը հանդիսանալ տւեալ համայնքի, այլեւ հոգեւորապէս միաւորել դրա աստւածապաշտ զաւակներին:

Միջինքի նշանակութեան ու հոգեւորապէս մարդը կազմաւորելու բարձր արժէքին անդրադարձաւ Խնամակալ մարմնի անդամ Լուսիկ Դանղեանը: Մեծ Պահքի կէսի հասած լինելով, հաւատացեալ մարդը գիտակցում է թէ ունի դեռեւս 24 օրերի ժամանակահատւած, բարեպաշտօրէն կատարելու համար Աւետարանի այն պատւէրները, որոնք եկեղեցական օրացոյցի սոյն օրերին, կարո՛ղ են փոփոխութիւն առաջացնել հաւատացեալ մարդու կեանքում:

Թաւրիզահայութեան գրեթէ բոլոր հաւաքոյթներին ձեռնահասօրէն հանդիսավարութիւնը ստանձնող Կարէն Սարգսեանը բեմ բարձրացաւ: Նա յիշեց Միջինքը նշելու հոգեւոր ու ազգային պարտաւորութիւնը հայ քրիստոնեային, եւ Խնամակալ մարմնի բոլոր անդամներին մաղթեց յաջողութիւն եւ նորանոր ծրագրերի իրագործում:

Գեղարւեստական կոկիկ յայտագիր կիրարկւեց, որի ընթացքում երգերով եւ ասմունքներով կամաւորապէս իրենց մասնակցութիւնը բերեցին երաժիշտ Վարդան Վահրամեանը, Դէյւիդ Գալստեանը, դոկտ. Արա եւ Անի Մելիքեանները, Սիլւա Ալեքսանեանը, Ռեբեկա Սարգսեանը, Ռեբեկա Մարկոսեանը, Այիդա Յարութիւնեանը եւ Միրօ Աբրահամեանը:

Ներկայ բազմութիւնը իր մասնակցութեամբ, ցոյց տւեց այն մեծ սէրն ու յարգանքը, որը ունեն սոյն միութեան եւ ընդհանրապէս հայ առաքելական մեր եկեղեցու հանդէպ, գնահատելով հայ կանանց եկեղեցանւէր ծառայութիւնը:

Խնամակալ մարմնի կանանց միասնական աշխատանքով պահեցողութեան կերակրատեսակներով էին զարդարւել սեղանները, պահքի ընթացքում իսկ ճոխութեան ու առատութեան ազգային տոհմիկ նկարագիրը արտայայտելով:

Երեկոյի կարեւոր պահերից մէկը հանդիսացաւ Միջինքի գաթայի հատման պահը: Իւրաքանչիւր սեղանի բախտաւորները վերջում մրցեցին իրարու հետ, եւ Թեմական խորհրդի անդամ Քաթրին Դիլանեանը տարւայ բախտաւորը ընտրւեց: Տեղի ունեցաւ նաեւ վիճակախաղ: Տիրամօր ձեռամբ ընտրւեց թիւը, եւ բախտաւոր հանդիսացաւ Հելենա Օրդուխանեանը:

Այս տարի եւս, Խնամակալ մարմինը գնահատեց յարատեւօրէն եկեղեցի յաճախող անձեր: Նրանց շարքում յատուկ գնահատանքի արժանացաւ Քարմէն Աբրահամեանը, որ ամէն կիրակի Առաքելական նամակն է ընթերցում եկեղեցում:

Քաջալերանքի խօսքով հանդէս եկաւ Պատգամաւորական ժողովի ատենապետուհի Արմինէ Վահրամեանը: Ծրագիրը կազմակերպողների եւ այն յաջողութեամբ վարողների աստւածատուր շնորհքները գովաբանեց նա, յատկապէս յիշելով հանդիսավար Կարէն Սարգսեանին, որ Թաւրիզում տեղի ունեցող գրեթէ բոլոր ծրագրերի հանդիսավարութիւնն է ստանձնում այնքան ձեռնահասութեամբ: Արմինէ Վահրամեանը կարեւորութեամբ ընդգծեց Խնամակալ մարմնի դերակատարութիւնը ազգային-եկեղեցական կեանքում:

Եզրափակիչ եւ օրհնութեան խօսքով, Սրբազան Հայրը իր պատգամը փոխանցեց, բարձր գնահատելով Խնամակալ մարմնի կանանց ծառայութիւնը եկեղեցուն եւ համայնքին. «Թաւրիզի եկեղեցիների բարեզարդման եւ կանոնաւոր պահպանման գլխաւոր առաքելութիւնը ունենալով իբրեւ նպատակ, Խնամակալ մարմինը միշտ խնամքով է պահպանում մեր եկեղեցիները, սկսեալ Ս. Սարգիս եկեղեցուց, որտեղ ամէն կիրակի ս. պատարագ է մատուցւում եւ խորհրդակատարութիւններն են տեղի ունենում, Մարալանի ուխտավայր մատուռը, Ս. Աստւածածին մայր եկեղեցին եւ վերջապէս Ս. Շողակաթը»,- ասաց Սրբազան Հայրը: Նոյն առիթով նա շեշտեց, որ Թաւրիզը օժտւեց նաեւ մնայուն սարկաւագով խորանի վրայ, յանձին Սեւան սրկ. Ենովքեանի. «Հեշտ չէր այս ընտրութիւնը, յատկապէս նոր ժամանակներում, երբ երիտասարդութիւնը շուտ եւ շատ փող աշխատելու համար ամէն միջոցի դիմում է, նոյնիսկ զեղծարարութեան, մի երիտասարդ համաձայնւեց իր համեստ ծառայութիւնը բերել եկեղեցուն: Խորանի վրայ եւ ամէն եկեղեցական արարողութիւններին, դրական ներկայութիւն է Սեւանը, որ նախ ինքը պատիւ է զգում Աստծու եկեղեցուն ծառայելու իր գործով»,- ասաց Սրբազան Հայրը եւ յատուկ նւէրով պարգեւատրեց նրան: Այս առիթով Սրբազան Հայրը գնահատեց նաեւ սարկաւագաց եւ դպրաց դասերին, «Կոմիտաս» երգչախմբին եւ նրա նւիրեալ խմբավար՝ երաժիշտ Վարդան Վահրամեանին, որոնք իրենց աստւածատուր ձայնով ծաղկեցնում են սուրբ պատարագը:

Իր խօսքի վերջում, Սրբազան Հայրը բարձր գնահատեց Խնամակալ մարմնի անդամներին, գլխաւորութեամբ ատենապետուհի Էմմա Յարութիւնեանի եւ իր ընկերակից վարչականներին՝ Հելենա Օրդուխանեանին, Արմինէ Մնացականեանին, Ռեբեկա Սարգսեանին եւ Կարինէ Գրիգորեանին, որոնք իրենց ծառայութիւնն են բերում եկեղեցու բարեզարդման աշխատանքներին: