Ամանորի խանդավառ տօնավաճառ Հ.Մ.Ա.Կ.-ի Թաւրիզի մասնաճիւղում
Ատրպատական, ազգային առաջնորդարան, Թաւրիզ – Դեկտեմբերի 15-ի կ. յ. ժամը 16:00-ից մինչեւ երեկոյեան ժամը 21:00-ն, Հ.Մ.Ա.Կ.-ի Թաւրիզի մասնաճիւղի վարչութեան կազմակերպութեամբ բացւած յայտարարւած Ամանորի տօնավաճառը թաւրիզահայութեան սիրտը լցրեց տօնական ուրախութեամբ, երբ արդէն մօտենում է 2024 թւականի արշալոյսը:
Ատրպատականի հայոց թեմի առաջնորդ՝ Տ. Գրիգոր արք. Չիֆթճեանի եւ Թեմական խորհրդի բարձր հովանաւորութիւնը վայելող այս ձեռնարկի պաշտօնական բացումը կատարւեց, երբ Սրբազան Հայրը Թեմական խորհրդի ընկերակցութեամբ մուտք գործեց կենտրոնատեղիի սրահ, դիմաւորւելով վարչութեան անդամների եւ ներկայ բազմութեան կողմից: Քաղաքում գործող տարբեր միութիւններ եւ կազմակերպութիւններ, ինչպէս նաեւ անհատ արւեստագէտներ իրենց սեղաններն էին ապահովել, շուկայիկ առուվաճառքից աւելի, Ամանորի համն ու բոյրը փոխանցելով համայնքին:
Տօնական զարդերից, տորթերից ու նւէրի յատուկ իրեղէններից բացի, արւեստի գործեր էին ցուցադրւել յատուկ սեղանների վրայ, որոնք համայնքի երիտասարդ արւեստագէտ-ուհիների ձեռքի աշխատանքներն էին, այնքան գեղեցիկ, տօնի յարմարանքով, որոնք այնքան գնահատւեցին ներկաների կողմից: Միւս կողմից, իւրաքանչիւր տարւայ աւանդութեան համաձայն, յատուկ անկիւն էր վերապահւել սլաքախաղին, որը իր գլխին էր հաւաքել աղմկայարոյց եւ խանդավառ մի երիտասարդական ամբոխի: Իւրաքանչիւր սլաքապտոյտից յետոյ յայտարարւող յաղթանակը տօնւում էր հաւաքաբար, ցուցադրւած առարկաների ընտրութիւնը կատարելով ըստ ճաշակի:
Սրահի բուֆէն ունենալով նոր տնօրէնութիւն, յանձիս Շարա Բաղդասարեանի, համեղ ուտեստներ էր մատակարարում ցանկացողներին: Բուֆէի աշխատանքը մեծ աշխուժութեամբ իրականացնում էին Քաթրին Դիլանեանը, Այիա Յարութիւնեանը եւ Անիտա Գէորգեանը: Նրանք Սրբազան Հօրը, Թեմական խորհրդին եւ վարչութեանը հիւրասիրեցին, տօնական օրերի առթիւ պատրաստւած պատառներով եւ քաղցրեղէններով:
Սրբազան Հայրը այս առիթով իր բարձր գնահատանքը յայտնեց վարչութեանը եւ Հ.Մ.Ա.Կ.-ի Թաւրիզի մասնաճիւղի բոլոր բաժանմունքներին, շնորհաւորելով առաջիկայ Նոր տարին եւ Սուրբ Ծնունդը, նորանոր յաջողութիւնների եւ գոյապայքարի օրհնալից մաղթանքներով:
Տեղի ունեցաւ նաեւ վիճակախաղ, ղեկավարութեամբ հանդիսավար Կարէն Սարգսեանի: «Արարատ»-ի մեծ ընտանիքի անունից նա շնորհաւորեց բոլոր ներկաներին: Ներկայ երեխաներից մէկը վերցրեց մի թիւ եւ բախտաւոր դուրս եկաւ Օհանեան ընտանիքը: Կազմակերպութեան ի նպաստ տեղի ունեցած սոյն ծրագրին մասնակցել էին բոլորը անխտիր, քաջալերելու համար երիտասարդութեան կեանքով բաբախուն ազգային այս մեծ տան՝ «Արարատ»-ի գործունէութիւնը:
Տօնական ապրումների եւ քաղցր յուշերի ու յիշատակների Ամանորի ապրումները իրենց սրտին, ներկաները վերադարձան իրենց տները, բացումը կատարած լինելով Նոր տարւայ առաջիկայ ծրագրերի:
