Կարիքաւորներին օժանդակող մարմնի նախաձեռնութեամբ կազմակերպւած՝ Նոր տարւայ խրախճանք

2023 թ. դեկտեմբերի 27-ին, Կարիքաւորներին Օժանդակող մարմնի (ԿՕՄ) նախաձեռնութեամբ եւ ԿՕՄ-ի մեծ ընտանիքի ներկայութեամբ՝ Հ. Մ. «Սիփան» միութեան «Նայիրի» սրահում տեղի ունեցաւ Նոր տարւայ դիմաւորում։

Ցաւօք այս տարւայ խրախճանքին, առողջական խնդրի պատճառով հնարաւոր չեղաւ վայելել Թեհրանի հայոց թեմի առաջնորդ Տ. Սեպուհ արք. Սարգսեանի ներկայութիւնը, սակայն ստանալով նրա հայրական օրհնութիւնն ու ջերմ բարեմաղթանքները, ներկաները աղօթեցին Սրբազան Հօր շուտափոյթ ապաքինման եւ առողջութեան համար։

Ծրագրի սկզբին, Թեմական խորհրդի անդամ եւ Կարիքաւորներին Օժանդակող մարմնի հետ կապ՝ Հայրիկ Աղանեանը իր ելոյթի ընթացքում բարձր գնահատեց մարմնի աշխատանքները: Նա ընդգծեց կարեւորութիւնը հայ ընտանիքի եւ այն համարեց ազգի կարեւորագոյն հիմնասիւներից մէկը։

Այնուհետեւ Կարիքաւորներին Օժանդակող մարմնի ատենապետ Մուշեղ Ծատուրեանը բացատրութիւն ներկայացրեց մարմնի ընդհանուր աշխատանքների մասին միաժամանակ շեշտելով, որ առկայ բոլոր դժւարութիւններով հանդերձ մարմնի բոլոր անդամները իրենց առաքելութեանը հաւատարիմ մնալով, հնարաւորին չափով աշխատում են լաւագոյն կերպով կատարել իրենց վստահւած աշխատանքը:

Միջոցառման ընթացքում Տ. Վիգէն վրդ. Տալգըլճեանը սեղանը օրհնեց, եւ Նոր տարւայ նախաշեմին ողջունելով ներկաներին, մաղթեց քաջառողջութիւն եւ յաջողութիւն:

Տօնական ուրախ մթնոլորտը աւելի ջերմացաւ երգիչ՝ Հարմիկ Տէր-Մովսիսեանի գեղեցիկ կատարումներով, իսկ մանուկներին առաւել զւարճացրեց Ձմեռ պապիի ներկայութիւնը եւ նրանից ստացած նւէրները:

Ծրագրի աւարտին բաժանւեցին տօնական օրերի առիթով պատրաստւած պարէններն ու նւէրները։

ԿԱՐԻՔԱՒՈՐՆԵՐԻՆ ՕԺԱՆԴԱԿՈՂ ՄԱՐՄԻՆ (ԿՕՄ)