Մենք պատասխանատու ենք ապագայ սերունդների առջեւ Հայոց պետականութեան պահպանման համար

Հայաստանին անհրաժեշտ է հաւասարակշռւած, գրագէտ հաշւարկւած եւ ռացիոնալ արտաքին քաղաքականութիւն, որտեղ առաջնային կը լինեն Հայաստանի, այլ ոչ թէ այլ պետութիւնների ազգային շահերը. գերտէրութիւնների միջեւ շարունակւող միջազգային հակամարտութեան մէջ Հայաստանին ներքաշելը յանգեցնելու է անդառնալի հետեւանքների: Ինչպէս փոխանցում է Yerevan.today-ը՝ այս մասին ասւած է Ex Oriente Հայաստանի Արեւելագէտների միութեան խորհրդի տարածած յայտարարութիւնում։

«Հայաստանի շուրջ վերջին զարգացումները՝ տարածաշրջանում շարունակւող անկայունութեան եւ լայնածաւալ միջազգային հակամարտութիւնների համատեքստում, խորացրել են մեր երկրի անկախութեան, անվտանգութեան, ինքնիշխանութեան եւ տարածքային ամբողջականութեան համար առկայ սպառնալիքները։

Մեր խորին համոզմամբ՝ Հայաստանին անհրաժեշտ է հաւասարակշռւած, գրագէտ հաշւարկւած եւ ռացիոնալ արտաքին քաղաքականութիւն, որտեղ առաջնային կը լինեն Հայաստանի, այլ ոչ թէ այլ պետութիւնների ազգային շահերը։ Գերտէրութիւնների միջեւ շարունակւող միջազգային հակամարտութեան մէջ Հայաստանին ներքաշելը յանգեցնելու է անդառնալի հետեւանքների:

Միջպետական յարաբերութիւնների զարգացումը նոր գործընկերների հետ չպէտք է իրականացւի պատմականօրէն ձեւաւորւած եւ իրաւականօրէն ձեւակերպւած դաշնակցային յարաբերութիւնների հաշւին։ Հայաստանի իշխանութիւնները պէտք է գործեն Հայաստանի ու այլ երկրների շահերի համադրման եղանակով, եւ ոչ մի պարագայում չգայթակղւեն այդ շահերի հակադրման շնորհիւ ենթադրեալ դիւիդենտներ քաղելու հեռանկարով։ Միջպետական յարաբերութիւնների վերաբերեալ անորոշ ու առճակատման տրամաբանութեամբ արւող յայտարարութիւնները ոչնչով չեն նպաստելու Հայաստանի անվտանգային միջավայրի ամրապնդմանը, այլ միայն լրացուցիչ ռիսկեր եւ վտանգներ են առաջացնելու։ Հայկական դիւանագիտութիւնը պէտք է ամրապնդի գոյութիւն ունեցող դաշինքները եւ հաստատի նոր գործընկերային յարաբերութիւններ, ոչ թէ ձեռք բերի հերթական հակառակորդներ:

Աշխարհն օրէցօր սրւող գլոբալ հակամարտութեան մէջ է, որը աննախադէպ լարւածութիւն է ստեղծում միջազգային յարաբերութիւնների համակարգում։ Մեր տարածաշրջանը եւս դարձել է հակասական շահերի բախման խաչմերուկ: Այս ծայրայեղ վտանգաւոր իրավիճակում, միայն իրատեսական արտաքին քաղաքականութիւնը եւ պետականամէտ որոշումները թոյլ կը տան պաշտպանել հայ ժողովրդի կենսական շահերն ու անվտանգութիւնը։ Մենք պատասխանատու ենք ապագայ սերունդների առջեւ Հայոց պետականութեան պահպանման համար»,- նշւած է յայտարարութիւնում։