Խօսք երախտիքի
![](/wp-content/uploads/2024/03/20240310183735-780x470.jpg)
Իրանահայ համայնքի սիրելի՛ հայրենակիցներ,
Իմ երախտագիտութիւնն եմ յայտնում Ձեզ՝ 12-րդ գումարման Իսլամական խորհրդարանի ընտրութիւններին խուռներամ մասնակցութեան համար: Ձեր գիտակցւած մասնակցութեամբ, Դուք ի ցոյց դրեցիք բարձր յանձնառութիւնը՝ ազգային-քաղաքացիական պարտականութիւնը կատարելու ուղղութեամբ:
Ցանկանում եմ շնորհակալութիւն յայտնել նաեւ ինձ տրւած վստահութեան բարձր քւէի համար, որն ինձ հնարաւորութիւն ընձեռեց վերընտրւելու որպէս Թեհրանի եւ հիւսիսային իրանահայութեան պատգամաւոր:
Երախտագիտութիւն եմ յայտնում նաեւ պրն. Ալեքս Կարապետեանին, ով ինքնաբացարկ ներկայացրեց յօգուտ ինձ, ինչպէս նաեւ միւս թեկնածուներին, ովքեր ընտրապայքարը շարունակեցին արժանապատւօրէն:
Սիրելի՛ հայրենակիցներ,
Անցած քառամեայ գործունէութեան տարիներն ինձ համար եղել են կարեւոր եւ բազմաբովանդակ շրջափուլ, որի իւրաքանչիւր օրն ունեցել է մէկ նպատակ եւ տեսլական. ապահովել մեր համայնքային շահերը, եւ գործել յանուն մեր հայրենակիցների բարօրութեան:
Հաւաստիացնում եմ, որ առաջիկայ չորս տարիների ընթացքում նոյնպէս ճիգ ու ջանք չեմ խնայելու եւ նոր եռանդով լծւելու եմ շարունակելու մեր համայնքային շահերի պաշտպանման եւ իրացման կարեւոր գործը: Անցեալ չորս տարիների պէս իմ գործունէութեան առանցքում լինելու է Իրանին եւ իրանահայ համայնքին ծառայութիւնը:
Դիմում եմ երիտասարդութեանը, ազգային մարմինների, կառոյցների եւ միութիւնների պատասխանատուներին՝ առաջարկներ, դիտարկումներ ու նկատառումներ ներկայացնելու խնդրանքով, որպէսզի համատեղ արդիւնաւէտ աշխատանքի միջոցով, միասնաբար յաղթահարենք մարտահրաւէրները եւ կարգաւորենք առկայ խնդիրները:
Մաղթում եմ բոլորիդ քաջառողջութիւն եւ յաջողութիւն:
ԻՐԱՆԻ ԻՍԼԱՄԱԿԱՆ ԽՈՐՀՐԴԱՐԱՆՈՒՄ
ԹԵՀՐԱՆԻ ԵՒ ՀԻՒՍԻՍԱՅԻՆ ԻՐԱՆԱՀԱՅՈՒԹԵԱՆ ՊԱՏԳԱՄԱՒՈՐ՝
ԱՐԱ ՇԱՀՎԵՐԴԵԱՆ
06.03.2024