Ընկ. Յարութիւն Քիւրքճեանի հրաժեշտը
Դեռ ամիս մը առաջ, կրթական մշակ, գրագէտ, դասագիրքերու հեղինակ, յօդւածագիր, դասախօս, հասարակական գործիչ Յարութիւն Քիւրքճեան Լիզբոնի մէջ, գործօն մասնակցութիւն բերած էր «Գիւլբենգեան» Հիմնարկութեան կազմակերպած «Հաւասարում նորոգ/սերունդներու զրոյց մը» գիտաժողովին: Նոյնինքն այս հաւաքը կազմակերպւած էր ներշնչւած Սփիւռքագէտ Քիւրքճեանի 1968-ի գրափորձէն:
Հազիւ ամիս մը ետք, օգոստոսի 9, 2024-ին, ընկեր Յարութիւն Քիւրքճեան զոհ գնաց պսակաձեւ ժահրին (Կովիդ)։
Ծնած 1943-ին՝ Բէյրութ, ան նախնական եւ երկրորդական կրթութիւնը ստացած է «Նշան Փալանճեան» Ճեմարան, 1956-1963։ Ուսումը շարունակած Բէյրութի Ֆրանսական համալսարանին Փիլիսոփայութեան դպրոցին մէջ եւ ապա Փարիզ անցնելով, աւարտած «Սորբոն»-ի համալսարանը, տիրանալով Փիլիսոփայութեան Մագիստրոսութեան տիտղոսին՝ 1978 թւականին։
Մասնագիտացած մանկավարժ եւ ուսուցիչ, ան ուսումի տարիներուն ընթացքին եւ ետք՝ շուրջ քսան տարի՝ 1964-էն 1984, Բէյրութի հայկական կրթական հաստատութիւններու մէջ՝ «Նշան Փալանճեան ճեմարան, «Հայկազեան» համալսարան եւ «Համազգային»-ի Հայագիտական հիմնարկ, դասաւանդած է հայերէն՝ իբր մայրենի կամ երկրորդ լեզու, ֆրանսերէն, հայ գրականութիւն եւ փիլիսոփայութիւն։
Երիտասարդ տարիքէն ՀՅԴ-ի շարքերուն միացած, ընկեր Քիւրքճեան ամենայն բծախնդրութեամբ ՀՅԴ-ի պատմութեան եւ գաղափարաբանութեան խմբագրումը կատարած է:
1982-ին հաստատւած է Աթէնք, ուր տիկնոջ՝ Մարօ Քալայճեանի հետ հրատարակած է մայրենի լեզւի եւ գրականութեան դասագիրքերու «Հայրենի աղբիւր» եւ «Հայ կեանք եւ գրականութիւն» շարքերը։
Հեղինակ է բազմաթիւ ուսումնասիրական յօդւածներու, ինչպէս նաեւ յատկանշական հատորի մը՝ «Փորձ Տարագրութեան մասին» (1978) խորագրով։
Յարութիւն Քիւրքճեան ունի հարուստ մանկավարժական, գրական եւ քաղաքապատմական գործեր։ Բացի իր հեղինակած աշխատանքներէն, ներդրում ունեցած է նաեւ ուրիշ հեղինակներու գրական գործերուն մէջ, իբր սրբագրիչ եւ թարգմանիչ:
