«ԱԼԻՔ» – Անվտանգութեան նախարար հոջ. Սէյէդ Էսմայիլ Խաթիբը երէկ՝ յունիսի 8-ին հաստատել է, որ նախարարութեանը յաջողւել է ձեռք բերել Իսրայէլի միջուկային գործունէութեան վերաբերեալ յոյժ կարեւոր ռազմավարական փաստաթղթեր եւ տւեալներ՝ յայտարարելով, որ այդ փաստաթղթերը շուտով կը հրապարակւեն։
Նախարարն ասել է, որ Անվտանգութեան նախարարութեան մշակած լայնածաւալ, բազմաշերտ եւ բարդ գործողութեան արդիւնքում ձեռք են բերւել Սիոնիստական ռեժիմի վերաբերեալ շատ կարեւոր ռազմավարական փաստաթղթեր եւ տեղեկութիւններ։
Ըստ նրա՝ գործողութիւնը ներառել է ներթափանցում, աղբիւրների ներգրաւում, աղբիւրներին հասանելիութեան ստացում եւ հասանելիութեան ընդլայնում, ինչի արդիւնքում ձեռք են բերւել գաղտնի փաստաթղթեր։
Պատասխանելով IRIB-ի լրագրողի այն հարցին, թէ արդեօք այդ փաստաթղթերը որեւէ այլ, ոչ միջուկային տւեալներ են պարունակում, հոջ. Խաթիբն ասել է. «Դրանք ներառում են նաեւ ԱՄՆ-ի, Եւրոպայի եւ այլ երկրների հետ յարաբերութիւնների, ինչպէս նաեւ հետախուզական փաստաթղթերի վերաբերեալ այլ փաստաթղթեր, որոնք կարող են բարձրացնել մեր երկրի յարձակողական հզօրութիւնը»։
Նա բացատրել է, որ փաստաթղթերը Իրան փոխանցելու եղանակը նոյնքան կարեւոր է, որքան հէնց փաստաթղթերը։
«Մենք գաղտնի կը պահենք փոխանցման մեթոդները եւ այդ փաստաթղթերը։ Թէեւ գործողութեան մասին յայտարարելու համար որոշ ժամանակ պահանջւեց, որպէսզի փաստաթղթերն անվնաս երկիր հասնեն, փոխանցման մեթոդները, բնականաբար, գաղտնի կը պահւեն եւ չեն հրապարակւի։ Սակայն փաստաթղթերը շուտով կը հրապարակւեն», – յայտարարել է նախարարը։
Նշենք, որ IRIB լրատւական գործակալութիւնը, յղում անելով տեղեկացւած աղբիւրներին, շաբաթ օրը յայտնել էր, որ մեր երկրի յատուկ ծառայութիւնները ստացել են զգալի ծաւալի տւեալներ, ինչպէս նաեւ Սիոնիստական ռեժիմի ռազմավարական եւ գաղտնի փաստաթղթեր, այդ թւում՝ հազարաւոր փաստաթղթեր նրա միջուկային ծրագրերի եւ օբիեկտների վերաբերեալ։
Ըստ գործակալութեան՝ Իրանին փոխանցւած փաստաթղթերի քանակն այնքան մեծ է, որ դրանց բոլորի, այդ թւում՝ պատկերների եւ տեսանիւթերի ուսումնասիրութիւնը զգալի ժամանակ է պահանջում:
