Գիտնականները մարդու մաշկի տակ գտել են միացութիւններ, որոնք երիտասարդացնող յատկութիւններ ունեն

Մարդիկ մեծ ջանքեր են գործադրում իրենց մաշկը երիտասարդ պահելու համար՝ դիմակների, քսուքների եւ շիճուկների միջոցով: Այժմ գիտնականները յայտնաբերել են մեր մաշկի տակ թաքնւած միացութիւններ, որոնք ունեն երիտասարդացնող յատկութիւններ: Արեան մէջ մանրէների կողմից արտադրւող երեք մոլեկուլներ նւազեցնում են մարդու մաշկի բջիջների վնասը եւ բորբոքումը:

Արդիւնքները, որոնք հրապարակւել են Ամերիկեան քիմիական ընկերութեան եւ Ամերիկեան ֆարմակոգնոզիայի ընկերութեան կողմից Natural Products ամսագրում, կարող են յանգեցնել ծերացող մաշկի բուժման նոր մեթոդների մշակման։

Գիտնականները քիչ բան գիտեն այն մասին, թէ ինչպէս են արեան մէջ մտնող մանրէների կողմնակի մթերքներն (մետաբոլիտներ) ազդում մարդու առողջութեան վրայ: Յատկապէս հետաքրքիր է ինդոլային միացութիւններ կոչւող մետաբոլիտների դասը, որոնք ունեն երիտասարդացնող, հակաբորբոքային եւ հակամիկրոբային յատկութիւններ: 2015 թ. արեան մէջ յայտնաբերւել է Paracoccus sanguinis անունով ինդոլային միացութիւններ արտադրող մանրէն։

Գիտնականներ Չունգ Սաբ Կիմը, Սալիմ Լին եւ նրանց գործընկերները հետաքրքրւել են P. sanguinis-ով եւ ուսումնասիրել դրա ինդոլ պարունակող մետաբոլիտները: Նրանք ուսումնասիրել են P. sanguinis-ը, քանի որ արիւնից ստացւած մանրէները հետազօտութեան համեմատաբար չուսումնասիրւած ոլորտ են:

Թիմը երեք օր շարունակ աճեցրել է P. sanguinis-ի մեծ խմբաքանակ, ապա մշակել մանրէների կողմից արտադրւած մետաբոլիտների խառնուրդը: Վերլուծական մեթոդների համադրութիւնը, ներառեալ սպեկտրոմետրիան, իզոտոպների պիտակաւորումը եւ համակարգչային վերլուծութիւնը, թոյլ են տւել թիմին այս խառնուրդից որոշել 12 առանձին ինդոլային մետաբոլիտների քիմիական կառուցւածքները, այդ թւում՝ վեցը, որոնք նախկինում երբեք չէին յայտնաբերւել: Այնուհետեւ Կիմը, Լին եւ գործընկերները հետազօտել են, թէ արդեօք ինդոլի մետաբոլիտները կարող են մեղմել մարդու մաշկի ծերացման հետ կապւած վնասակար գործընթացները։

Նրանք իւրաքանչիւր ինդոլ պարունակող հեղուկ լուծոյթներ են կիրառել մարդու մաշկի վրայ։ Փորձի սկսւելուց առաջ բջիջները մշակւել են ռեակտիւ թթւածնային տեսակների՝ բորբոքման եւ կոլագենի վնասման համար պատասխանատու միացութիւնների, բարձր մակարդակի առաջացման համար։

Փորձարկւած 12 ինդոլներից երեքը, այդ թւում՝ երկու նոր յայտնաբերւածները, նւազեցրել են թթւածնի վնասակար ռեակտիւ տեսակների քանակը ստրեսի ենթարկւած մարդու մաշկի բջիջներում՝ չմշակւած բջիջների համեմատ։ Երեք մետաբոլիտներ նաեւ նւազեցրել են երկու բորբոքային սպիտակուցների եւ կոլագենը քայքայող սպիտակուցի մակարդակը։

news.am