Արաղչին նոր մանարամասներ է յայտնել ՄԱԳԱՏԷ-ի հետ համաձայնագրի մասին

«ԱԼԻՔ» – ԱԳ նախարար Սէյէդ Աբբաս Արաղչին «Խաբար» հեռուստաալիքով հեռարձակւող «Յատուկ թողարկում» հաղորդաշարին տւած հարցազրոյցոմ նշել է. «Միջազգային ատոմային էներգիայի գործակալութիւնն խոստովանել է, որ Իրանի հետ համագործակցութեան ձեւաչափը չի կարող լինել նախկինի պէս, եւ այն, որ խորհրդարանի սահմանած օրէնքը պարտադրող է, եւ, որ համագործակցութիւնը գործակալութեան հետ պէտք է լինի այս շրջանակներում»։ Նա տեղեկացրել է, որ գործակալութիւնը եւս ընդունել է, որ համագործակցութիւնը շարունակւելու է Ազգային անվտանգութեան գերագոյն խորհրդի անմիջական ներկայութեամբ, եւ պէտք է տարբերակել ռմբակոծւած օբիեկտների դիտարկումները չռմբակոծւած կենտրոններից:

Իրանի եւ Եւրոպայի միջեւ բանակցութիւնների վերաբերեալ Իրանի արտաքին գործերի նախարարը յայտնել է, որ բանակցութիւնները կրում են շարունակական բնոյթ, նոյնիսկ 12-օրեայ պատերազմի ժամանակ։ Նա յաւելելով, որ նրանց հետ մեր հիմնական տարակարծութիւններից մէկը «Snapback»-ի գործարկման թեման է, որով նրանք օգտագործում են սպառնալու նպատակով, ընդգծել է. «Մենք՝ Իրանը, Ռուսաստանը եւ Չինաստանը, ընդգծել ենք, որ E3-ը նման իրաւունք չունի։ Պահի տակ նրանք «Snapback»-ի հետաձգումը պայմանաւորեցին նոր պահանջներով, ինչը մեր կողմից մերժւեց, քանի որ ոչ միայն նրանց ցանկութիւնները համատեղելի չեն մեր ազգային անվտանգութեան հետ, այլեւ ըստ էութեան, նման հարցերում չունեն որեւէ իրաւասութիւն»։

ԱԳ նախարարն ընդգծել է նաեւ, որ գործակալութեան հետ Իրանի համագործակցութիւնը որեւէ կապ չունի եւրոպական կողմի դրած նոր պահանջների հետ։

Արաղչին գործակալութեան հետ համագործակցութեան մասին յաւելել է. «Չռմբակոծւած օբիեկտների վերաբերեալ հսկողութեան նոր ձեւաչափն այն է լինելու, որ գործակալութիւնը յայտ է ներկայացնում իւրաքանչիւր կենտրոնի այցի համար, եւ եթէ այն ընդունւի, նրանց կը տրամադրւի մուտքի իրաւունք»։

Նա յաւելել է. «Ռմբակոծւած օբիեկտների վերաբերեալ իրավիճակը բարդ է։ Գործակալութիւնը համաձայն է, որ Իրանի դժգոհութիւններն այս առումով արդարացի են եւ պէտք է փարատւեն մտահոգութիւնները։ Պէտք է ձեռնարկւեն շրջակայ միջավայրի պաշտպանութեան միջոցառումներ։ Համաձայնագրի հիման վրայ որեւէ գործողութիւն չի ձեռնարկւի, եթէ Իրանը հաւանութիւն չտայ: Համաձայնագիրը ստորագրելուց ես ընդգծել եմ, որ այս համաձայնագրի վաւերականութիւնն ուժի մէջ է այնքան ժամանակ, քանի դեռ Իրանի դէմ թշնամական գործողութիւններ չեն ձեռնարկւել, այդ թւում՝ «Snapback»-ը։ Եթէ այն տեղի ունենայ, այս համաձայնագիրն այլեւս կորցրած կը լինի իր վաւերականութիւնը»: