«ԱԼԻՔ» – Իրանում զբօսաշրութեան շաբաթւայ առիթով կազմակերպւել էր «Կանայք առաջատար են զբօսաշրջութեան ոլորտում» համաժողովը:
Սեպտեմբերի 29-ին, Թեհրանի Սաադաբադ պալատ-թանգարանային համալիրի «Մելլաթ» պալատում կայացած համաժողովի ընթացքում, ներկայ էին Իրանի մշակոյթի եւ իսլամական առաջնորդութեան նախարար Ռեզա Սալեհի Ամիրին, Հանրապետութեան նախագահի կանանց հարցերով տեղակալ Զահրա Բեհրուզ Ազարը, Ֆաթեմէ Հաշեմին եւ այս հարցով փորձագէտներ: Հանդիպմանը հրաւիրւել էր Իրանի Հայ Աւետարանական եկեղեցու համայնքապետ վերապատւելի դոկտ. Միշէլ Աղամալեանը, ով հանդէս եկաւ ելոյթով:
Իր ելոյթի ընթացքում վերապատւելին ընդգծել է. «Մենք ապրում ենք Մերձաւոր Արեւելքում, սակայն այս բառը, աշխարհագրական իմաստ ունենալուց աւելին, արտայայտում է մի կոնկրետ հայեցակարգ. մի հայեցակարգ, որը ընդամէնը հարիւրամեայ պատմութիւն ունի եւ առնչւում է արեւմուտքցիներին, ովքեր մեր բնօրրանը բացատրում են իրեց ծննդավայրի հետ, այն անւանելով Մերձաւոր Արեւելք, եւ, քանի որ նրանք մեր աշխարհագրական դիրքը համեմատել են իրենց աշխարհագրական դիրքի հետ, այն անւանել են Մերձաւոր Արեւելք, այլ ոչ թէ Հեռաւոր Արեւելք։ Սա այն դէպքում, երբ նախկինում երկրները յաճախ անւանակոչւում էին իրենց բնակիչների անունով։ Սակայն զբօսաշրջութիւնը հնարաւորութիւն է ընձեռում թօթափել անձնական տեսակէտը, հատել սեփական սահմանները եւ դրա համատեքստում դիտարկել նոր կարգավիճակը»։ Իր ելոյթի ընթացքում վերապատւելին ընդգծեց, որ բոլոր կրօնները ձգտում են միաստւածութեան, մի ճշմարտութիւն, որի բազմակի դրսեւորումները տարածւած են ամբողջ աշխարհում, տարբեր մշակոյթներում, աւանդոյթներում եւ քաղաքակրթութիւններում, եւ իրաքանչիւր կառոյց, շէնք, շինութիւն եւ պաշտամունքի վայր արտացոլում է իր կառուցողների եզակի հայեացքը Աստւածային էութեան վերաբերեալ։
Նա աւելացրեց. «Նկատի առնելով վերը նշւածը, կարելի է համարել, որ կրօններն լաւագոյն հնարաւորութիւնը ունեն հոգեւոր եւ գեղեցկագոյն իմաստով խթանելու զբօսաշրջութիւնը: Զբօսաշրջութիւնը հնարաւորութիւն է ընձեռնում տեսնելու մշակութային ընդհանրութիւնները, մշակոյթների ազդեցութիւնն ու փոխազդեցութիւնը, ինչպէս նաեւ փոխադարձ յարաբերութիւնները»։ Վերապաեւելին զբօսաշրջութիւնը լաւագոյն միջոցներից մէկը բնութագրեց քաղաքակրթութիւնների երկխօսութեան եւ խաղաղութեան տարածման գործում:
