ՄԱԿ-ում Իրանի մնայուն դեսպան. Անվտանգութեան Խորհուրդը պէտք է յստակօրէն արձանագրի Իրանի դէմ ԱՄՆ-ի խախտումները
«ԱԼԻՔ» – ՄԱԿ-ում Իրանի Իսլամական Հանրապետութեան մշտական ներկայացուցիչ Ամիր-Սաիդ Իրաւանին միացեալ ազգերի Անվտանգութեան խորհրդի նիստում կոշտ նախազգուշացում է հնչեցրել Վաշինգտոնի հասցէին՝ ընդգծելով, որ ԱՄՆ-ը շարունակաբար խախտում է միջազգային իրաւունքն ու ՄԱԿ-ի կանոնադրութիւնը։
Իրաւանիի խօսքով՝ ԱՄՆ նախագահը բազմիցս եւ բացայայտօրէն սպառնացել է Իրանին ուժի կիրառմամբ եւ ռազմական միջամտութեամբ՝ վտանգելով միջազգային խաղաղութիւնն ու անվտանգութիւնը։ ԻՍՆԱ-ի համաձայն, նա շեշտել է, որ Անվտանգութեան խորհուրդը պարտաւոր է ԱՄՆ-ի կատարած խախտումներն արձանագրելով յստակ կերպով իրերն իրենց անունով կոչել:
Իրանի դեսպանը յաւելել է, որ միակողմանի եւ անօրինական գործողութիւնները քայքայում են իրաւական կարգը միջազգային մակարդակում, թուլացնում բազմակողմ համագործակցութիւնը եւ լուրջ սպառնալիք են խաղաղութեան համար՝ ընդգծելով, որ ոչ մի պետութիւն, անկախ իր ռազմական կարողութիւնից, իրաւունք չունի իրեն օրէնքից վեր դասել։
