Արթուր Խաչատրեան. Փաշինեանը հող է նախապատրաստում Տիգրանաշէնը յանձնելու համար

Տիգրանաշէն գիւղը Ադրբեջանի վերահսկողութեանը հնարաւոր յանձնելը անմիջական սպառնալիք կը ստեղծի անվտանգութեան համար եւ կը կտրի Հայաստանի կենտրոնը նրա հարաւի հետ կապող առանցքային տրանսպորտային զարկերակները։ Այս մասին օգոստոսի 20-ին Ազգային ժողովում լրագրողների հետ զրոյցում յայտարարել է ՀՅԴ անդամ, «Հայաստան» դաշինքի խորհրդարանական խմբակցութեան քարտուղար Արթուր Խաչատրեանը։
Մեկնաբանելով վարչապետ Նիկոլ Փաշինեանի յայտարարութիւնները անկլաւների եւ սահմանների դելիմիտացիայի վերաբերեալ՝ պատգամաւորը շեշտել է, որ 1991 թւականի Ալմա-Աթայի հռչակագրին որպէս տարածքների փոխանցման իրաւական հիմք յղումները անհիմն են։
«Տիգրանաշէնը կենսական նշանակութիւն ունի Հայաստանի Հանրապետութեան համար։ Ադրբեջանի յենակէտի տեղակայումն ուղիղ երկրի մէջտեղում՝ դէպի հարաւ տանող մայրուղու վրայ, ստեղծում է ահռելի ռիսկեր։ Նոյնը վերաբերում է նաեւ հիւսիսում գտնւող տարածքներին, ինչպիսիք են Բարխուդարլուն եւ Սոֆուլուն։ Մեր ազգային անվտանգութիւնը պահանջում է ադրբեջանական զօրքերի անվերապահ դուրսբերում Հայաստանի ինքնիշխան տարածքից, այլ ոչ թէ ռազմավարական բարձունքների եւ ճանապարհների զիջում՝ դեմարկացիայի անւան տակ»,- ընդգծել է Խաչատրեանը։
Պատգամաւորը նաեւ ուշադրութիւն է հրաւիրել այն հանգամանքի վրայ, որ 2020 թւականից ի վեր Հայաստանը միայն հետեւողականօրէն զիջում է տարածքներ՝ փոխարէնը ադրբեջանական կողմից չստանալով որեւէ քայլ հայկական հողի օկուպացւած հատւածների ազատագրման ուղղութեամբ։



