Չորեքշաբթի՝ դեկտեմբերի 25-ին, Կարիքաւորներին Օժանդակող մարմնի (ԿՕՄ) նախաձեռնութեամբ եւ ԿՕՄ-ի մեծ ընտանիքի ներկայութեամբ՝ Հ. Մ. «Սիփան» միութեան «Նայիրի» սրահում տեղի ունեցաւ Նոր տարւայ դիմաւորում։
Ցաւօք այս տարւայ խրախճանքին, առողջական խնդրի պատճառով հնարաւոր չեղաւ վայելել Թեհրանի հայոց թեմի առաջնորդ Տ. Սեպուհ արք. Սարգսեանի ներկայութիւնը, սակայն Նրա հայրական օրհնութիւնն ու ջերմ բարեմաղթանքները փոխանցեց Տ. Առաքել աբղ. Գատեհճեանը եւ միասնաբար աղօթեցին Սրբազան Հօր շուտափոյթ ապաքինման եւ առողջութեան համար։
Ծրագրին ներկայ էին Թեմական խորհրդի ատենապետ Վարուժ Յովհաննիսեանը, փոխատենապետուհի Արմինէ Սէթխանեանը, ատենադպիրներ՝ Հայրիկ Աղանեանը եւ Մհեր Օհանեանը եւ Թեմական խորհրդի անդամներ՝ Դաւիթ Աբուլեանը եւ Ժորժ Հայրապետեանը:
Ծրագրի սկզբին, Հայրիկ Աղանեանն իր ելոյթի ընթացքում բարձր գնահատեց Մարմնի աշխատանքները: Նա ընդգծեց կարեւորութիւնը հայ ընտանիքի եւ այն համարեց ազգի կարեւորագոյն հիմնասիւներից մէկը։
Այնուհետ Կարիքաւորներին Օժանդակող մարմնի ատենապետ Մուշեղ Ծատուրեանը բացատրութիւն ներկայացրեց մարմնի ընդհանուր աշխատանքների մասին միաժամանակ շեշտելով, որ առկայ բոլոր դժւարութիւններով հանդերձ Մարմնի բոլոր անդամները իրենց առաքելութեանը հաւատարիմ մնալով, հնարաւորին չափով աշխատում են լաւագոյն կերպով կատարել իրենց վստահւած աշխատանքը:
Միջոցառման ընթացքում Տ. Առաքել աբղ. Գատեհճեանը սեղանը օրհնեց, եւ Նոր տարւայ նախաշէմին ողջունելով ներկաներին մաղթեց քաջառողջութիւն եւ յաջողութիւն:
Տօնական ուրախ մթնոլորտը աւելի ջերմացւեց երգիչ՝ Հարմիկ Տէր Մովսեսեանի գեղեցիկ կատարումներով, իսկ մանուկներին առաւել զւարճացրեց Ձմեռ պապիի ներկայութիւնը եւ նրանից ստացած նւէրները:
Ծրագրի աւարտին բաժանւեցին տօնական օրերի առիթով պատրաստւած պարէններն ու նւէրները։
ԿԱՐԻՔԱՒՈՐՆԵՐԻՆ ՕԺԱՆԴԱԿՈՂ ՄԱՐՄԻՆ
