Ամանորի եւ Ս. Ծննդեան տօների առիթով կայացած հանդիպումների շարանում ազգային առաջնորդարան այցելեցին Հանրապետութեան նախագահի հասարակական եւ սոցիալական հարցերով յանձնակատար՝ Ալի Ռաբիին, Հանրապետութեան նախագահի տեղակալ եւ երկրի հասարակական եւ սոցիալական կազմակերպութեան ղեկավար Մոհամմադ Բաթհային եւ Թեհրանի Բեհզիստի կենտրոնի ընդհանուր տնօրէն Մոհամմադ Նասիրին:
Ազգային առաջնորդարանի դահլիճում հիւրերին դիմաւորեցին՝ Տ. Առաքել աբղ. Գատեհճեանը, Իրանի Իսլամական խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը, Թեմական խորհրդի ատենապետ Վարուժ Յովհաննիսեանը, փոխատենապետուհի Արմինէ Սէթխանեանը, ատենադպիր Մհեր Օհանեանը, Հանրային կապի հոգեւոր խորհրդատու՝ Տ. Գրիգորիս քհնյ. Ներսիսեանը եւ ազգային առաջնորդարանի դիւանապետ՝ Զօրիկ Կարապետեանը:
Հանդիպման սկզբին, Արմինէ Սէթխանեանը ողջունեց հիւրերի ներկայութիւնը եւ ուրախութիւն ու երախտագիութիւն յայտնեց կատարւած այցի կապակցութեամբ:
Տ. Առաքել աբղ. Գատեհճեանը՝ Թեհրանի հայոց թեմի առաջնորդ Տ. Սեպուհ արք. Սարգսեանի եղբայրական ողջոյնները փոխանցելով, շնորհակալութիւն յայտնեց հիւրերին՝ ներկայութեան ու շնորհաւորանքների համար: Նա իր արտայայտութիւններում նշեց, որ Իրանի հայ համայնքը, որպէս Իրանի հասարակութեան անբաժանելի մաս եւ որպէս Իրանի հողում խաղաղ համակեցութեամբ ապրող, օրինակելի է եղել եւ Իսլամական յեղափոխութեան առաջին իսկ օրերից եւ իր հաւատարմութիւնն է ցոյց տւել յեղափոխութեան եւ սեփական երկրին՝ Իրանին:
Առանձին ելոյթներով արտայայտւեցին եւ Ամանորի եւ Ս. Ծննդեան տօների առիթով շնորհաւորեցին Ալի Ռաբիին, Մոհամմադ Բաթհային եւ Մոհամմադ Նասիրին: Արտայայտութիւններում անդրադարձ կատարւեց Իրանում զանազան կրօնների հետեւորդների խաղաղ համակեցութեան նաեւ ընգծւեց, իրանահայութեան դերակատարութիւնը տարբեր բնագաւառներում, որոնք նպաստել են երկրի զարգացմանը եւ վերելքին:
Իրանի Իսլամական խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը նաեւ իր հերթին ողջունելով, շնորհակալութեան խօսք ուղղեց՝ կատարւած այցի եւ ցուցաբերւած ուշադրութեան համար: Նա երախտագիտութեամբ անդրադարձաւ տօնական օրերի առիթով իրականացւած այցելութիւններին մատնանշելով, որ դա ինքնին վկայութիւն է պետութեան եւ փոքրամասնութիւնների միջեւ առկայ փոխյարգանքի եւ համագործակցութեան, որը հարկ է աւելի սերտացնել:
Հանդիպման աւարտին, հիւրերին նւիրւեցին «Իրանի հայկական եկեղեցիներ» խորագրով եւ «کلیسای ارمنی» խորագրով գրքերը:
Ազգային առաջնորդարանի Հանրային կապ
