«ԱԼԻՔ», Կ. Դ. – Հայ ժողովրդի համազգային միասնականութեան ամենավառ արգասիքին է հայոց տօների տօնը՝ Մայիսի 28-ը:
Այդ միասնականութեան ոգով տոգորւած ,այս տարի Թեհրանի հայկական համայնքում Մայիսեան յաղթանակի 107-ամեակի տօնակատարութիւնը իրականացւեց միասնական ու համատեղ ջանքերով: Քոյր միութիւնների համագործակցութեամբ բանախօսական – գեղարւեստական յայտագրով յագեցած միջոցառումը տեղի ունեցաւ մայիսի 28-ի երեկոյեան՝ Հ. Մ. «Սիփան» միութեան «Նորայր Էլսայեան» մարզադահլիճում:
107-ամեակի համատեղ ծրագրին իրենց մասնակցութիւնն էին բերել՝ Հ. Մ. «Արարատ» կազմակերպութիւնը, Հ. Մ. Մ. «Նայիրի» միութիւնը, Հ. Մ. «Սարդարապատ» միութիւնը, Հ. ՈՒՍ. «Չհամրմահալ» միութիւնը, Իրանի հայ Արհեստաւորների միութիւնը եւ Հ. Մ. «Սիփան» միութիւնը:
Իրանի եւ Հայաստանի պետական օրհներգերով մեկնարկած ծրագրի բանախօսն էր հրաւիրւել Իրանի Իսլամական խորհրդարանում Թեհրանի եւ հիւսիսային իրանահայութեան նախկին պատգամաւոր դոկտ. Կարէն Խանլարեանը: Մասնակից միութիւնների անունից խօսք փոխանցեց Հ. Մ. «Արարատ» կազմակերպութեան կենտրոնական վարչութեան նախագահ Սոֆի Ջաղարբէգեանը: Խօսք ունեցաւ նաեւ Թեհրանի հայոց թեմի առաջնորդ Տ. Սեպուհ արք. Սարգսեանի օգնական Տ. Առաքել աբղ. Գատեհճեանը:
Գեղարւեստական հատւածը բաւականին յագեցւած էր: Իրենց անզուգական կատարմամբ ելոյթ ունեցան վոկալիստ մեներգիչներ, միութիւնները ներկայացնող պարի համոյթներ եւ գեղեցիկ ելոյթ ունեցաւ համատեղ երգչախումբը: Ծրագրի բաղադրիչ մաս էր կազմում նաեւ օրւան համահունչ տեսաերիզները:
Ծրագրին ներկայ էին ՀՅԴ Բիւրոյի անդամ Սեւան Դանիէլեանը, Իրանի Իսլամական խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը, «ԱԼԻՔ» հաստատութեան ներկայացուցիչներ, «ԱԼԻՔ» օրաթերթի գլխաւոր խմբագիր Արամ Շահնազարեանը, Իրանի Հայ Աւետարանական եկեղեցու համայնքապետ դոկտ. Միշէլ Աղամալեանը, Թ. Հ. Թ. Պատգամաւորական ժողովի ատենապետ Սուրիկ Աբնուսեանը եւ դիւանը, Թ. Հ. Թ. Թեմական խորհրդի ատենապետ Վարուժ Յովհաննիսեանը եւ դիւանը, ազգային մարմինների ու միութիւնների ներկայացուցիչներ եւ մեծ թւով հայրենակիցներ:
Մայիս 28-ի յաղթանակին նւիրւած միջոցառումներ են տեղի ունեցել նաեւ Նոր Ջուղայում եւ Ատրպատականում:
Մանրամասնութիւնները յառաջիկայ համարներից մէկում:
