Իրանի Իսլամական խորհրդարանի նորընտիր պատգամաւոր Գեղարդ Մանսուրեանի առաջին պաշտօնական հանդիպումը Տ. Սիփան արք. Քէչէճեանի հետ

Իրանի Իսլամական խորհրդարանում Սպահանի եւ հարաւային իրանահայութեան նորընտիր պատգամաւոր Գեղարդ Մանսուրեանը, մարտի 17-ի առաւօտեան, ազգային առաջնորդարանում, իր առաջին պաշտօնական հանդիպումը ունեցաւ Սպահանի հայոց թեմի առաջնորդ Տ. Սիփան արք. Քէչէճեանի հետ։

Նախ Գեղարդ Մանսուրեանը շնորհաւորեց Սրբազան Հօրը՝ Արքութեան տիտղոսին արժանանալու համար։ Ապա պատգամաւորին ուղղւած շնորհաւորանքի խօսքով հանդէս եկաւ թեմակալ առաջնորդը եւ նրան մաղթեց յաջողութիւններ իր ստանձնած պաշտօնում։

Խօսելով խորհրդարանի գործունէութեան դժւարութիւնների վերաբերեալ եւ այն մեծ պատասխանատւութեան մասին, որը դրւած է պատգամաւորների ուսերին, Սրբազան Հայրը յոյս յայտնեց, որ նորընտիր պատգամաւորը ինչպէս միշտ լինելու է գործունեայ եւ հետեւողական իր աշխատանքներում, կանգնելու է ժողովրդի կողքին եւ բարձրաձայնելու է նրանց խնդիրները։

Գեղարդ Մանսուրեանը տեղեկութիւններ փոխանցեց Իրանի Իսլամական խորհրդարանի ընտրութիւնների ընթացքի եւ շտաբի գործունէութեան վերաբերեալ, որից յետոյ անդրադարձ եղաւ հայ համայնքի մասնակցութեանը՝ ընտրութիւններին։

Հանդիպմանը երկու մասնակիցները իրենց գոհունակութիւնը յայտնեցին իրանահայ համայնքին՝ թէ՛ խորհրդարանական, եւ թէ՛ Բանիմացների խորհրդի ընտրութիւններին գիտակից եւ խուռներամ մասնակցութեան համար։

Հանրային կապ՝ Ս. Հ. Թ. ազգային առաջնորդարանի