Բարեկենդանի տօնը նշւեց Ուրմիայում ՀՕՄ-ի կազմակերպութեամբ

Ատրպատական, ազգային առաջնորդարան, Թաւրիզ – Կիրակի, փետրւարի 11-ին, հովանաւորութեամբ Ատրպատականի հայոց թեմի առաջնորդ Տ. Գրիգոր արք․ Չիֆթճեանի եւ նախաձեռնութեամբ Հայ Օգնութեան միութեան Ուրմիայի մասնաճիւղի վարչութեան, Ս. Ստեփանոս ծխական եկեղեցու «Արամ Մանուկեան» սրահում տօնւեց Բուն Բարեկենդանը:

Ներկայ էին շուրջ հարիւր անձեր, միութենականներ եւ հիւրեր: Օրւայ համար պատրաստւել էր աւանդական ղափամայ (դդում): Վարչական մարմնի անդամներ եւ միութենականներ տնային խմորեղէններով եւ քաղցրաւենիքով հիւրասիրեցին բոլոր ներկաներին, հաճելի ժամեր պարգեւելով նրանց:

«Նայիրի» մանկապարտէզ-նախակրթարանի սաները իրենց քաղցր թոթովանքով արտասանութիւններ ներկայացրին սրահում համախմւածներին, նւիրւած ե՛ւ Վարդանանց Զօրավարաց ե՛ւ Բարեկենդանին: Երեխաները Բարեկենդանի տօնի յատուկ հանդերձանքով եւ դիմակաւորումով ներկայացան սրահ, իրենց ուսուցչուհիներ՝ Օֆելիա Սայեադեանի եւ Ռուզան Մուրադեանի ընկերակցութեամբ, եւ կատարեցին իրենց սովորած հատւածները: Սրահի յարդարանքի գլխաւոր բաժինը կենտրոնացել էր տօնի յատուկ յարդարանքով պճնւած ղափամայի շուրջը:

Հաւաքի բացման խօսքը կատարեց վարչութեան փոխ ատենապետուհի Լալա Արշակեանը: Նա բարի գալուստ մաղթելով, բոլորին շնորհաւորեց Իրանի Իսլամական յեղափոխութեան 45-ամեակի առիթով, բարեբեր ու յաջող տարիներ մաղթելով իրանական հայրենիքին, եւ ապա ներկայացրեց օրւայ ծրագիրը:

Վարչութեան ատենադպրուհի Լինետ Հախվերդեանը խօսք առնելով, ներկայացրեց Բարեկենդանը կատարելու ազգային-աւանդական ձեւերը, Հայաստան աշխարհից սկսեալ մինչեւ տարբեր երկրների գաղութներում ապրող մեր ժողովրդի զաւակների կիրարկած ձեւերը: Նա Բարեկենդանի առիթով բարի պահեցողութեան ժամանակահատւած մաղթեց բոլոր հաւատացեալներին, որպէսզի օգտւեն եկեղեցու ընձեռած սոյն կարեւոր ժամանակից:

Երեխաների ելոյթներից բացի, տեղի ունեցաւ ոտք կողպելու արարողութիւն, ինչպէս վիճակախաղ, որը արդէն նման հաւաքներում աւանդութեան է վերածւել:

Եզրափակիչ խօսքը կատարեց միութեան վարչութեան ատենապետուհի Սեդա Մեջլումեանը: Նա զեկուցական տեղեկութիւններով մի շարք բացատրութիւններ տւեց ներկաներին, ՀՕՄ-ի Ուրմիայի մասնաճիւղի կատարած ներքին աշխատանքների մասին, բացի տօնակատարութիւններից եւ հանդիսութիւններից: Այս առիթով Սեդա Մեջլումեանը շնորհակալութիւն յայտնեց օրւայ ընթացքում սրտաբուխ նւիրատւութիւններ կատարած անձերին, եւ այն բոլորին, որոնք միշտ զօրավիգ են կանգնում սոյն միութեան մարդասիրական եւ կրթական առաքելութեան:

Օրւայ հաւաքն ու տօնական ծրագիրը բոլորին ուրախ պահեց եւ միմեանցից ժպտերես հրաժեշտ առնելու պատճառ հանդիսացաւ: