Ծովի ալեկոծումների տագնապն ու առաջացրած մտահոգութիւնները բոլոր քաղաքական նաւաստիների միտքը զբաղեցնող նիւթեր են, որոնք իրենց նաւի կործանման առաջն առնելու համար, ծովակուլ ալիքների դիմաց են պայքարում:
Մերձաւոր Արեւելքի աւազանը ներկայումս աշխարհի մարդկութեան աչքերի առջեւ է բացել սպանդի եւ կոտորածների մի շարժապատկեր, որի ամենօրեայ տեսարանների վկաներն են լինում համայն բնակիչները այս մոլորակի:
Ազատ թողնւած եւ իր անխնայ ռմբակոծութիւնները իրականացնող Սիոնիստական կառավարութիւնը, զինեալ ուժ եւ հակառակորդ է համարում ո՛չ միայն կռւող այդ մարդուն, այլեւ կանանց, ծերերին եւ նոյնիսկ խանձարուրի երեխաներին:
Մերձաւոր Արեւելքի «հարս»-ին նմանեցւած Լիբանանը, որի ազատութեան անսահմանելիութիւնը, ինչպէս նաեւ համայնքային դրութեամբ ղեկավարման օրինակը դժւար է տեսնել աշխարհի այլ երկրներում, այսօր տանջւում է՝ Սիոնիստական կառավարման իշխանութիւնը վարողների ձեռքում, համայն աշխարհի անտարբեր հայեացքի առջեւ:
Իրենց մայրերի թեւերի մէջ յաւիտենապէս քնած երեխաները, իբրեւ անմեղ հրեշտակներ, տեղափոխւում են երկինք, այնտեղ հանգչելու համար աշխարհում տիրող պատերազմական իրավիճակից, եւ վայելելու երկնքի արքայութիւնը…:
Արաբական աշխարհի հետաքրքրութիւնը նաֆթային եւ այլ ուղղութիւններով, սեփական անապատի շքեղացման հեռանկարով է պարուրում մարդկանց միտքը, անձնասիրութեամբ այլափոխւող քաղաքականութեամբ, իսկ Իրանի Իսլամական հանրապետութիւնը դեռեւս պահպանողն է մարդասիրական հաւատքի, ինչպէս նաեւ պատմութիւնը վերակերտելու աշխատանքի համար:
Երկրորդ համաշխարհային պատերազմի հետեւանքներից վերապրած այսօրւայ ծերունիներին ի յարգանս կազմակերպւած պետական յայտագրերը, նրանց գնահատելու ձեռնարկից աւելի, աշխարհին զգուշացնելու կոչեր են, նման պատերազմների անկրկնելիութիւնից խուսափելու համար:
Մեծ հարցականը այն է սակայն, որ նոյն մարդիկ մտածո՞ւմ են Միջին Արեւելքի աւազանում վերջնական խաղաղութիւն կերտելով, արդարութեան հիմնադիրները լինել…: Կասկածելի գործարք է այս նրանց համար, որովհետեւ իրենց միջեւ իսկ տարուբերւող անհամաձայնութիւնների լուծումը տեսնում են Միջին Արեւելքի շրջապատում, որտեղ լւանալու են իրենց կեղտոտ ձեռքերը, եւ ապա հաշտութեան համար ձեռնւում են իրար հետ…:
Հազա՜ր ափսոս Միջին Արեւելքի պատմական «նաւ»-ին, որը կապոյտ ծովում նաւում էին՝ նոյն տարածքում ծնունդ առած կրօնների համերաշխ ճամբորդները: Նրանցից ոմանք, միեւնոյն «նաւ»-ի հաւասար սեփականատէրերը կամ նաւավարները լինելով հանդերձ, այլ ծովափներում ծնունդ առած ազգերի սին բարեկամութիւնից են շփացել եւ հարստացել: Նրանք իրենց մեծամտութիւնը պարտադրում են ա՛յն ազգերին, որոնց փողերը արժեզրկելով, խորտակում են նրանց տնտեսութիւնը, ու կեանքը խեղդում՝ երեխաներին իսկ չխղճալով, ու սովածարաւ անելով:
Գալիլիոյ ծովակի հսկայ փոթորիկը Յիսուս խաղաղեցրեց, դաստիարակելու համար այն ազգին որին ընտրեց, նրանից մարմնապէս ծնւելու համար այս աշխարհում: Առաքեալները ճանաչեցին Յիսուսի աստւածութիւնը, եւ աշխարհով մէկ քարոզեցին այն. սակայն նոյն քարոզներին կարօտ է ամբողջ աշխարհը, սկսեալ երեք միաստւածեան կրօններից, որոնք եղբայրաբար ապրելուց բացի, այլ ուղի չունեն:
Ինքնագիտակցութեան եւ ինքնարթնացման գործը՝ ամէնից առաջ ապագայ սերնդի համար է…: Ժամ չկորցնենք:
Ատրպատականի հայոց թեմի հրատարակչութիւն «Արտազ» ամսագիր (թիւ 11, նոյեմբերի 2024 թ.)
