Ատրպատականի հայոց թեմի առաջնորդը՝ Ուրմիայի հայոց ազգային դպրոցում
Ատրպատական, ազգային առաջնորդարան, Թաւրիզ – Չորեքշաբթի, փետրւարի 21-ի առաւօտեան ժամը 8:30-ին, Ատրպատականի հայոց թեմի առաջնորդ Տ. Գրիգոր արք. Չիֆթճեանը այցելեց Ուրմիաի հայոց ազգային «Մասիհա» դպրոցը: Դռան մուտքին ընդունւեց տեսչուհի Ադրինէ Մեջլումեանի եւ ուսուցչական կազմի կողմից, եւ տեսչարանում կարճ հանդիպում ունեցաւ տեսչութեան կազմի հետ:
Սրբազան Հօրն ընկերակցում էր Ուրմիայի Գործակալական խորհրդի ատենապետ Վանիկ Յակոբեանցը: Հանդիպման ընթացքում արծարծւեց դպրոցի ներկայի ուսումնական վիճակը, դասարանային բաժանումներն ու մի քանի այլ խնդիրներ, որոնք նահանգի կրթական նախարարութեան հետ հարթւելու են մօտ ապագային:
Հանդիպումից յետոյ, Սրբազան Հայրը իր ընկերակիցներով, տեսչութեան կողմից առաջնորդւեց դասարանները, մօտկից շփւելու աշակերտութեան հետ: Դասարաններում մի պահ սովորական դասընթացին դադար տալով, Սրբազան Հայրը հրաւիրւեց խօսելու աշակերտների համար, յատկապէս կրօնագիտական նիւթերի շուրջ: Իր տւած սուրբգրական բոլոր հարցերին ճշգրիտ պատասխանեցին աշակերտները, ցոյց տալով իրենց ուսուցիչների ջանքն ու բծախնդրութիւնը, յատկապէս կրօնական առարկաների մատուցման գործում: Յայտնենք, որ իւրաքանչիւր դասարանում նախ աղօթք կատարւեց եւ յետոյ՝ կրօնագիտական հարցեր արծարծւեցին:
Այս առիթով Սրբազան Հայրը ո՛չ միայն գնահատեց տեսչութեան եւ ուսուցչակազմի աշխատանքը, այլեւ աշակերտութեան աչալրջութիւնն ու հետեւողականութիւնը, յատկապէս հայերէնով աւանդւող նիւթերի ընկալման գործընթացում:
