Բարեկենդանի բացառիկ ճաշկերոյթ՝ «Արարատ»-ի Թաւրիզի մասնաճիւղի կազմակերպութեամբ

Ատրպատական, ազգային առաջնորդարան, Թաւրիզ – Բարեկենդանի կենսուրախ տօնի առիթով, չորեքշաբթի, մարտի 12-ի երեկոյեան ժամը 8:30-ից մինչեւ յաջորդ առաւօտեան ժամը 2:30-ը, Հ.Մ.Ա.Կ.-ի Թաւրիզի մասնաճիւղը, ազգային առաջնորդարանի «Համազասպ Ոսկանեան» սրահում կազմակերպել էր Բարեկենդանի Ճաշկերոյթ-խրախճանք, որը մեծ խանդավառութեամբ ի մի էր խմբել բազմաթիւ թաւրիզահայերի եւ Հայաստանի սահմանամերձ Ագարակ գիւղից հարազատ բարեկամների:

Ձեռնարկին իր բարձր հովանաւորութիւնն էր ընծայել Ատրպատականի հայոց թեմի առաջնորդ՝ Տ. Գրիգոր արք. Չիֆթճեանը, ինչպէս եւ Թեմական խորհուրդը: Ներկայ էին հրաւիրեալներ, մեծ թւով «Արարատ»-ականներ, եւ մշակութասէր թաւրիզահայեր, մինչեւ իսկ Երեւանում հաստատւած նախկին թաւրիզահայեր, որոնք այցելութեան էին եկել իրենց ծննդավայրը:

«Արարատ»-ի Թաւրիզի վարչութեան հրաւէրով սահմանամերձ Սիւնիքի մարզից Թաւրիզ էր հրաւիրւել երգիչ Նւէր Ջանեանը (Կապանից), ինչպէս նաեւ ստեղծնաշարի նւագող Աւագ Յովհաննիսեանը (Կապանից): Կլարինէթի վրայ մեծ մենակատար եւ խմբի հետ բացառիկ ելոյթով հանդէս եկաւ Նւէր Աւետիսեանը (Ագարակից), ինչպէս նաեւ խմբի ընդհ. պատասխանատու եւ երգեհոնահար՝ Գրիշ Յովհաննիսեանը (Ագարակից):

Երգացանկի առաջինը Նահապետ Ռուսինեանի «Կիլիկիա»-ն էր, որը ներշնչեց Կիլիկիոյ կաթողիկոսութեան հովանին վայելող Ատրպատականի հայոց թեմի ժողովուրդը: Ապա, սիրային ու ազգային երգերը, գաւառականն ու ռաբիզը անընդմէջ իրար էին յաջորդում, ո՛չ միայն ֆիզիկապէս շարժման մղելով մարմինները պարային կշռոյթով, այլեւ ազգային հոգին՝ հպարտ ապրումներով:

Հանդիսավար Կարէն Սարգսեանը բացման խօսքը կատարեց, յիշեցնելով, որ ամբողջ գիշերւայ համար բազմաթիւ անակնկալներ են վերապահւած բոլոր մասնակիցների համար: Ներկաներին ողջունեց Հ.Մ.Ա.Կ.-ի վարչութեան ատենապետ Նժդիկ Աբրահամեանը: Նա երախտագիտութիւն յայտնեց առաջնորդ Սրբազանին եւ Ազգային իշխանութեան, սոյն ծրագիրը հովանաւորելու համար, ինչպէս նաեւ պետական պատասխանատուներին, դիւրութիւններ ընծայելու համար: Նա շեշտեց գաղութի երիտասարդութեան կեանքը ծաղկեցնող «Արարատ»-ի կարեւորութիւնը համայնքի կեանքում:

Հաղորդավար Կարէն Սարգսեանը ներկաներին բարի երեկոյ մաղթեց, եւ աւանդութիւնը պահպանելով, մի քանի կենաց առաջարկեց, որպէսզի անսասան մնայ Ատրպատականի հայոց թեմը, իր բոլոր ազգային կառոյցներով: Նա ներկայացրեց նւագախմբին եւ երգչին, ինչպէս նաեւ ձայնի բացառիկ հաղորդավար՝ Սեւադա Սաֆարեանին, բարի վայելում մաղթելով բոլոր ներկաներին:

Գիշերւայ կէսից յետոյ սրահ մուտք գործեցին ծաղրածուները, բոլորի ուշադրութիւնը կենտրոնացնելով իրենց վրայ: Մնջախաղերը  աւարտելուց յետոյ, նրանք սրահի կենտրոնում դրւած աթոռի վրայ թոկով կապեցին իրենց զոհին, մինչեւ որ ներկայ բազմութեան մէջ գտնւող նւիրատուներ գումարներ խոստանան, իբրեւ նւիրատւութիւն «Արարատ» կազմակերպութեան Թաւրիզի մասնաճիւղին, որպէսզի ազատ արձակւի «կալանաւորւած» անձը: Հանգանակութեան ծանրագոյն բաժինը կառավարեց, տարիների փորձ ունեցող հանդիսավար Կարէն Սարգսեանը:

Բոլոր նւիրատուների անունից խօսք առնելով, պատգամաւորական ժողովի անդամ դոկտ. Արա Մելիքեանը յատուկ խօսք ուղղեց, շուտով բացելու համար. կալանաւորւածի ոտքերը, առատ նւիրատւութիւններով օժանդակելու Հ.Մ.Ա.Կ.-ի Թաւրիզի մասնաճիւղին:

Այս պահին, առաջնորդ Սրբազանը իր խօսքը ուղղեց ներկաներին, մասնաւոր գնահատանք յայտնեց «Արարատ»-ի Թաւրիզի մասնաճիւղի վարչութեանը եւ բոլոր յանձնախմբերին, գլխաւորութեամբ ատենապետ Նժդիկ Աբրահամեանի: Սրբազանը աշխարհացրիւ բոլոր գաղութների եւ թեմերի ամենաերջանիկը համարեց Ատրպատականը, «որը մեր հայրենիքի ամենամօտ թեմն է, մէկ սրտի երկու մասերը խորհրդանշելով»,- ասաց նա: Ապա Սրբազանը ողջունեց Հայաստանից ժամանած հիւրերին եւ բոլոր թաւրիզահայերին, որոնք միասնաբար երջանիկ պահեր ապրեցին: 

Կէս գիշերից յետոյ դարձեալ շարունակւեց խրախճանական մթնոլորտը, իսկ վիճակախաղի թիւը սակառից դուրս բերելով, տիրամայր Շուշան Չիֆթճեանը, բախտաւոր յայտարարւեց փոքրիկն Վանէ Բահադորեանը, որը ստացաւ իր նւէրը:

Բարեկենդանի սոյն մի քանի քաղցր ժամերի վրայ երկարած ծրագիրը քաղցր յիշատակներ թողեց բոլորի հոգում, Քառասնօրեայ պահեցողութեան դռների առջեւ: