Արցախի «Մենք ենք, մեր սարերը» յուշարձանի պատկերով կանթեղներ ու ժենգեալով հաց. քահանաները Տեառնընդառաջի նախատօնակի առթիւ շրջել են Երեւանի փողոցներով

Արարատեան Հայրապետական թեմի հոգեւորականները եւ հաւատացեալները, շրջելով Երեւանում, լոյս, ջերմութիւն ու Աստծոյ օրհնութիւնն են փոխանցել անցորդներին: Քահանաների ձեռքին խորհրդանշական նւէրներ են եղել՝ Արցախի յայտնի «Մենք ենք, մեր սարերը» յուշարձանի պատկերով կանթեղներ ու արցախեան ժենգեալով հաց։

Այս մասին հաղորդում է Արարատեան Հայրապետական թեմի տեղեկատւական բաժինը։

«Միջոցառումն իրականացւել է Տեառնընդառաջի նախատօնակի առթիւ՝ Արարատեան Հայրապետական թեմի առաջնորդական փոխանորդ Գերաշնորհ Տէր Նաւասարդ արք. Կճոյեանի օրհնութեամբ։

«Լոյսից ու ջերմութիւնից բացի, մարդկանց փոխանցւել է նաեւ Արցախ վերադառնալու յոյսը»,- նշել է Նորք-Մարաշի Սուրբ Աստւածածին եկեղեցու հոգեւոր հովիւ Տ. Զաքարիա քահանայ Աւետիսեանը։

Երեւանում անցորդներին կանթեղներ ու ժենգեալով հաց են փոխանցել նաեւ Զօրաւոր Սուրբ Աստւածածին եկեղեցու հոգեւոր հովիւ Տ. Գրիգոր քահանայ Գրիգորեանը, Կաթողիկէ Սուրբ Աստւածածին եւ Սուրբ Աննա եկեղեցիների հոգեւոր հովիւ Տ. Զենոն քահանայ Բաղդասարեանը, Սուրբ Երրորդութիւն եկեղեցու հոգեւոր հովիւ Տ. Արարատ քահանայ Օրդոյեանը՝ համայնքի անդամների հետ միասին։

Բնակիչներին հրաւիրել են տօնի օրը` փետրւարի 14-ին, մասնակցել Ս. Պատարագին»,- ասւած է հաղորդագրութեան մէջ։

Tert.am