Արման Թաթոյեան. «ՀՀ պետականութեան դէմ բացայայտ ուղղւած քայլ է իշխանութիւնն առաջ տանում` ցեղասպանութեան զոհերի անունների ցուցակ կազմելը համարելով «Ցեղասպանութեան հետ կապւած իրական հիմքերի կառուցում»
Բացարձակ անընդունելի, հայկական ինքնութեան, Հայաստանի պետականութեան դէմ բացայայտ ուղղւած քայլ է իշխանութիւնն [Կառավարութիւնն] առաջ տանում` Հայոց Ցեղասպանութեան 1,5 միլիոն զոհերի անուն-ազգանունների ցուցակ կազմելը համարելով «Ցեղասպանութեան հետ կապւած իրական հիմքերի կառուցում»։
Այս մասին «Ֆէյսբուք»-եան իր էջում գրել է ՀՀ նախկին ՄԻՊ, «Թաթոյեան» հիմնադրամի տնօրէն Արման Թաթոյեանը:
«Թուրքական իշխանութիւնն է մշտապէս առաջ տարել Հայոց Ցեղասպանութեան զոհերի թիւը կասկածի տակ դնելու գաղափարը` դրանով առաջ տանելով իր ժխտողական քաղաքականութիւնը։
Ցեղասպանագէտ գիտնականները, ինչպէս նաեւ Հայոց Ցեղասպանութիւնը ճանաչած պետութիւնները երբեւէ կասկածի տակ չեն դրել 1,5 մլն. զոհերի թիւը: Դա երբեք քննարկման առարկայ էլ չի եղել: Աւելին, զոհերի թիւը բոլորովին կապ չունի ցեղասպանութիւն յանցագործութեան հետ։ Ցեղասպանութիւնը մարդկանց խմբի ոչնչացմանն ուղղւած մտադրւած յանցանք է, որ հիմքում ունի ռասայական, էթնիկ, ազգային կամ կրօնական պատկանելիութեան հիմքով ատելութիւնը, այլ ոչ թէ ուղղակի որոշակի թւով մարդկանց սպանութիւնը կամ նրանց վերացումը։
Այս մօտեցումը նաեւ բացայայտ անարգանք է անմեղ զոհերի յիշատակի նկատմամբ: Անթոյլատրելի է յայտարարութիւնը, թէ «Մեծ Եղեռն» եւ «Ցեղասպանութիւն» հասկացութիւնները նոյնական են։ Այս հասկացութիւնների միջեւ հաւասարութեան նշան դնելն անթոյլատրելի է ինչպէս Հայաստանի շահերի, այնպէս էլ ցեղասպանութիւնների միջազգային կանխարգելման գործընթացի տեսանկիւնից։
Ցեղասպանութիւնը միջազգային իրաւական ամրագրում ունեցող հասկացութիւն է, միջազգայնօրէն ճանաչւած յանցագործութիւն է։
Դրա համար սահմանւած է կոնկրետ քրէական պատիժ, քրէական հետապնդման մեխանիզմ։ Աւելին, հէնց ցեղասպանութեան յանցագործութեան համար պատասխանատւութեան ու պատժի իրագործումն է, որ կոչված է կանխարգելելու ցեղասպանութիւնները։
«Եղեռն»-ը միայն հայոց լեզւի, հայկական նշանակութեան բառ է, որն ունի առաւելապէս պատմական եւ ոչ միջազգային իրաւական նշանակութիւն, չի առաջացնում յանցանք ու հետեւաբար՝ չունի իրաւական նշանակութիւն»։
Յիշեցնենք, որ ԱԺ «Քաղաքացիական պայմանագիր» խմբակցութեան պատգամաւոր Անդրանիկ Քոչարեանը «Ազատութեան» եթերում ասել է, որ եթէ ասում ենք, որ Ցեղասպանութեան ժամանակ միլիոնուկէս հայ է կոտորւել, պէտք է կարողանանք միլիոնուկէս ազգանուն ինչ-որ արխիւներում հանել ու դնել։
«Ես գիտեմ, որ վարչապետը նպատակ ունի նաեւ Ցեղասպանութեան հետ կապւած իրական հիմքեր կառուցել, աւելի առարկայական դարձնել ցեղասպանութեան ենթարկւած մեր հայրենակիցների ամբողջ ցանկը»,- նշել է Քոչարեանը՝ պատասխանելով այն դիտարկմանը, թէ կայ մտավախութիւն, որ վարչապետ Փաշինեանն իրական Հայաստանի փիլիսոփայութեամբ Ցեղասպանութեան ճանաչման նպատակներից հեռանալու հրաժարւելու հիմք է ստեղծում։
Նրա խօսքով՝ մինչեւ հիմա մենք այդ անւանական ցանկը չենք կարողացել հաւաքել, ուստի պէտք է կենտրոնանալ այդ ցանկը փաստարկւած հաւաքագրելու համար:
