Տեղի է ունեցել «Հայ հասարակական-քաղաքական միտքը 19-րդ դարի վերջին եւ 20-րդ դարի առաջին կէսին. պատմութիւն եւ արդիականութիւն» խորագրով գիտաժողովի յօդւածների ժողովածուի շնորհանդէսը

«Համազգային» հայ կրթական եւ մշակութային միութեան Երեւանի գրասենեակի եւ Խաչատուր Աբովեանի անւան հայկական պետական մանկավարժական համալսարանի պատմութեան ֆակուլտետի համատեղ նախաձեռնութեամբ՝ նոյեմբերի 24-ին ՀՊՄՀ դահլիճում կայացաւ «Հայ հասարակական-քաղաքական միտքը 19-րդ դարի վերջին եւ 20-րդ դարի առաջին կէսին. պատմութիւն եւ արդիականութիւն» խորագրով գիտաժողովի յօդւածների ժողովածոյի շնորհանդէսը։

Ժողովածուի մասին խօսք ասացին «Համազգային»-ի կենտրոնական վարչութեան անդամ Արտաշէս Շահբազեանը, «Համազգային»-ի Երեւանի գրասենեակի տնօրէն Ռուզան Առաքելեանը, գրականագէտ Դաւիթ Գասպարեանը, նոյն ԲՈՒՀ-ի Համաշխարհային պատմութեան եւ նրա դասաւանդման մեթոդիկայի ամբիոնի վարիչ Խաչատուր Ստեփանեանը։

«Այս գիրքը մեր օրերի համար փնտրւող ու անհրաժեշտ գիրք է, այն նաեւ կարող է ուղեցոյց հանդիսանալ մեր պատմաբանների ու քաղաքական գործիչների համար, որպէսզի վերջապէս կարողանան հասկանալ մի ճշմարտութիւն՝ մինչեւ մեզանում ազգային գաղափարախօսութիւնը ձեւ ու բովանդակութիւն չունենայ, մենք չենք կարողանայ հասարակութեանը համախմբել»,- նշել է Ռուզան Առաքելեանը՝ շեշտելով, որ պէտք է կարողանալ դասեր առնելով անցեալից՝ ճիշտ քաղաքական ուղով ընթանալ։

Արտաշէս Շահբազեանն էլ, անդրադառնալով անցեալի ու ներկայի մարտահրաւէրներին, կարեւորեց․ «Միայն լուսաւորեալ ու կրթւած ժողովուրդն է, որ ունենում է ինքնութեան գիտակցութիւն, ազգային իդէալի գիտակցութիւն, ազգային տեսլական։ Երբ այդ գիտակցութիւնը ժողովրդի մէջ պակասում է, ազգի ճակատագիրը դառնում է անորոշ»։ Շահբազեանը յոյս յայտնեց, որ ժողովածոն հնարաւորութիւն կը տայ ուսումնասիրելու անցեալը, վերլուծելու եւ կատարելու ճիշտ հետեւութիւններ՝ յատկապէս ներկայիս ներքին եւ արտաքին բազում մարտահրաւէրների պայմաններում։

Պատմութեան եւ հասարակագիտութեան ֆակուլտետի դեկան Էդգար Յովհաննիսեանը կարեւորեց «Համազգային»-ի հետ համագործակցութիւնը, ինչպէս նաեւ գրքի հրատարակումը՝ նշելով, որ հայ քաղաքական եւ հասարակական մտքի ակունքները բիւրեղանում են հէնց այդ շրջանում։

Բոլոր ներկաները «Համազգային»-ի Երեւանի գրասենեակի կողմից ժողովածոյի օրինակներ նւէր ստացան։

Yerkir.am