Ռէյիսին եւ Պուտինը քննարկել են իրավիճակը Մերձաւոր Արեւելքում
«ԱԼԻՔ» – Հանրապետութեան նախագահ այաթ. Սէյէդ Էբրահիմ Ռէյիսին երէկ՝ ապրիլի 16-ին հեռախօսազրոյց է ունեցել իր ռուս գործընկեր Վլադիմիր Պուտին հետ:
Հեռախօսազրոյցի ընթացքում կողմերը մանրամասն քննարկել են Մերձաւոր Արեւելքում իրավիճակի վատթարացումը՝ Դամասկոսում իրանական դիւանագիտական ներկայացուցչութեան վրայ Իսրայէլի օդային հարւածից եւ Իրանի ձեռնարկած պատասխանից յետոյ։
Նախագահ Ռէյիսին նշել է, որ Իրանի գործողութիւնները կրել են հարկադիր եւ սահմանափակ բնոյթ։ Միեւնոյն ժամանակ նա ընդգծել է, որ Թեհրանը շահագրգռւած չէ լարւածութեան հետագայ սրմամբ, սակայն համաչափ եւ համարժէք պատասխան կը տայ հնարաւոր նոր ագրեսիային:
«Վճռականօրէն յայտարարում ենք, որ Իրանի շահերի դէմ ուղղւած ցանկացած գործողութեան կը պատասխանենք աւելի ուժգին, աւելի մասշտաբային եւ աւելի ցաւոտ, քան՝ նախկինում»,- յստակեցրել է նա:
Վլադիմիր Պուտինն իր հերթին դատապարտելով Դամասկոսում Իրանի հիւպատոսութեան վրայ Իսրայէլի յարձակումն ասել է. «Այն, ինչ տեղի ունեցաւ Իրանի Իսլամական Հանրապետութեան կողմից՝ ի պատասխան այս յանցաւոր արարքի եւ ՄԱԿ-ի Անվտանգութեան խորհրդի անգործութեան ֆոնին, ագրեսորին պատժելու լաւագոյն միջոցն էր, եւ Իրանի ղեկավարութեան տակտի եւ ռացիոնալիզմի դրսեւորումը»:
Երկու գործընկերներն արձանագրել են, որ Մերձաւոր Արեւելքում տեղի ունեցող իրադարձութիւնների հիմնական պատճառը պաղեստինա-իսրայէլական չլուծւած հակամարտութիւնն է։ Այս համատեքստում կարեւորւել են Գազայի հատւածում անյապաղ հրադադարի, ծանր հումանիտար իրավիճակի մեղմացման եւ ճգնաժամի քաղաքական եւ դիւանագիտական կարգաւորման համար պայմանների ստեղծման վերաբերեալ Թեհրանի եւ Մոսկւայի սկզբունքային մօտեցումները։
Անդադառնալով երկու երկրների յարաբերութիւնների թեմային, Ռէյիսին եւ Պուտինը տրամադրւածութիւն են յայտնել տարբեր ոլորտներում երկկողմ համագործակցութեան հետագայ առաջանցիկ զարգացման, այդ թւում՝ փոխշահաւէտ ենթակառուցւածքային նախագծերի իրականացման համար։
