Ս. Թադէի վանքի ուխտագնացութեան նախապատրաստական հանդիպում՝ Թաւրիզում

Ատրպատական, ազգային առաջնորդարան, Թաւրիզ – Ատրպատականի հայոց թեմի եկեղեցական ու պաշտամունքային կեանքի բարձրակէտը հանդիսա­ցող Աուրբ Թադէի վանքի եռօրեայ ուխտագնացութիւնը, այս տարի Աստծու հրամա­նով իրականացւելու է յուլիսի 31-ին, օգոստոսի 1-ին եւ 2-ին, որը Սրբավայրում իրականացւող ուխտագնա­ցութիւնների 71-րդ է հանդիսանալու:

Ն.Ս.Օ.Տ.Տ. Արամ Ա Մեծի Տանն Կիլիկիոյ Վեհափառ Հայրապետի բարձր հովա­նաւորութիւնը վայելող սոյն ուխտագնացութեան կազմակերպման համար, Ատրպա­տականի հայոց թեմի առաջնորդ՝ Տ. Գրիգոր արք. Չիֆթճեանի նախա­գահու­թեամբ, եւ հրաւէրով Թեմական խորհրդի, Երկուշաբթի, յուլիս 21-ին, երեկոյեան ժամը 6:00-ին, ազ­գա­յին առաջնորդարանի «Էմիլ Յակոբեան» դահլիճում հանդիպում կա­յացաւ, որին հրաւիրւել էր թեմի Վանքերի ուխտագնացութեանց յանձնախումբը, Թեմական խորհրդի միջոցով լրացւած նոր անդամներով:

Սրբազան Հայրը բացման աղօթք կատարեց, եւ ներածական խօսքով ողջունեց ներկաներին, փառք տալով Աստ­ծուն, որ խաղաղ օրերը շուտով վերադարձան եր­կիր, եւ պետական հսկողութեամբ ուխտագնացութիւնը տեղի է ունենալու Ս. Թադէոս ա­ռաքեալի եւ Ս. Սանդուխտ կոյսի տօնի առիթով: Նա յիշեցրեց ժողովականներին, որ Թեմական խորհրդի անմիջական օժանդակութեամբ, ամէն ջանք ի գործ է դնելու Վան­քերի ուխտագնացութեան յանձնախումբը, լաւագոյն պայմանները ստեղծելու համար ուխտաւորներին:

Թեմական խորհրդի ատենապետ Գագիկ Ջորջեանը հանդիպումը վարեց, եւ ու­րախութիւն յայտնեց, որ յանձնախումբը նոր անդամներով ճոխացնելու բախտը վիճակւել է Թեմին: Ուստի անձերի ներկայացումից յետոյ, ժողովը իր աշխատանքները շարունակեց, ծրագրելով յառաջիկայ ուխտագնացութեան ընթացքը, վրանների լար­ման եւ ուխտաւորների կեցութեան գծով:

Յաջորդ օրը, երեկոյեան նոյն ժամին, դահլիճ հրաւիրւել էին թեմի բոլոր միութիւնների եւ կազմակերպութիւնների ներկայացուցիչները: Առաջնորդ Սրբազանը ող­ջունեց բոլորի ներկայութիւնը, իսկ Թեմական խորհուրդը, գլխաւորութեամբ ատե­նապետ Գագիկ Ջորջեանի, յորդորեց բոլոր միութիւնների մասնակցութիւնը ուխտա­գնացութեան: Բոլոր միութիւնները, տարիների իրենց փորձառութեամբ առաջարկներ եւ ծրագրեր ներկայացրին, որոնք ցանկագրւեցին աշխատանքային ցուցակում:

Յայտնենք, որ իւրաքանչիւր միութիւն եւ Կազմակերպութիւն աշխատանքի իր բաժինը ստանձնեց հանդիպման պահին, ինչպէս Հ.Մ.Ա.Կ.-ի Թաւրիզի մասնաճիւղը իր սկաւուտական կազմով եւ կարգապահներով, ինչպէս նաեւ Խնամակալ մարմինը եկեղեցու կանո­նաւորութեան աշխատանքով:

Հանդիպման աւարտին, Սրբազան Հայրը բարեյաջող աշխատանք մաղթեց բո­լորին, իսկ Թեմական խորհուրդը յայտնեց, որ յառաջիկայ օրերին պետական համապատասխան կառոյցների հետ համադրման աշխատանքներ է կատարելու, Սուրբ Թա­դէի այս տարւայ ուխտագնացութիւնը նոր յաջողութեան հասցնելու հեռանկարով: